2017年的暑假，蘇敬恆幾乎話別主持兩年多的香港電台老牌節目《城市論壇》，轉任食衛局政治助理；據悉，蘇敬恆更獲香港大學醫學院院長梁卓偉推薦。港台「唞暑」前，已安排後備主持視察《城市論壇》準備接棒。前議員（兼大前輩）劉慧卿和蘇敬恒、吳璟儁兩名前「大台男神」午膳時，贈言「一入侯門深似海」。
世事難料，席上兩人只有吳璟儁成了政治助理，蘇敬恆臨門一腳觸礁，與「熱廚房」擦身而過。
由廣播道坐看獅子山山脊線，夕陽幾分鐘內由紅變紫，蘇敬恆借題發揮，嘗試輕輕帶過：「正如頭先日落一樣，世事就係充滿變化。」
記者當然不會就此罷休。會否有想過不做主持？「咁一定有嘅。」話畢，他補充，當下仍然享受做記者、做主持。
或許不做傳媒，可以用新的身份推動社會改變？「其實，我覺得大家都推動緊」。記者還擊說：「你呢句，最適合做官喎！」蘇敬恒禁不住大笑。笑罷，他又是一臉嚴肅說：「我覺得唔係做咩位，而係你係一個咩人，先係最緊要。」
2000年高考失手，蘇敬恆未夠分入讀心儀的傳理系，選擇了入讀港大社會科學系，是特首林鄭月娥N屆後的師弟，更重要是社會學改變了他看世界的視角，接受社會不同光譜、不同意見對碰。鏡頭外的蘇敬恆直率、愛笑、愛說道理。蘇敬恆說，一場論壇的爭議點，往往離不開前後矛盾、邏輯推理、雙重標準。
外界以為男拔萃畢業的蘇敬恒，一如無綫前輩方東昇、呂秉權是辯論隊出身，今日「順理成章」做主持。他卻說，當年只是愛打羽毛球、唱歌的小伙子，「其實我唔係特別鍾意同人理論，反而好多係一些感受，因為感受無得deny。就算係錯誤的事實，但感受都係真㗎嘛！」
入行14年，蘇敬恆感受最深的新聞，始終是2008年四川汶川地震。十年前的5月11日，時任國家主席胡錦濤結束訪問日本，蘇敬恆與無綫同事潘蔚林剛回港，翌日下午2時許發生地震，蘇訪日的行李都未打開，只得一件恤衫便往機場。
蘇敬恆離開四川時曾在個人fb撰文憶述災場採訪點滴，「每次把鏡頭對着痛哭的家人，心中就充滿罪疚感」，在當地期間也曾莫名地流淚，寄語朋友爭名逐利之外，「生命中，還是充滿了人性」。汶川地震滿月、一年、五年到今年第十年，他多次重訪川震跟進報道。
畢竟，要先做人，再做記者。
由記者轉為論壇主持，蘇敬恆說不太察覺自己的變化，但認為論壇有其有趣及感染力的地方，「我經常覺得所有討論到最後，都係價值觀的辯論。」
「DQ咗被選權、參選權重要，定係愛國愛港穩定社會重要啲呢，呢個就係價值觀取向。」
去年七一後，盛傳蘇敬恆獲邀加入問責班子擔任政治助理。據悉，蘇敬恆當時獲港大醫學院梁卓偉推薦擔任政治助理，食衛局現任局長陳肇始當初亦由梁卓偉推薦加入政府。有別於外界傳言，據悉蘇敬恆已完成品格審查，並已口頭知會港台可能辭職，只是一直等不到政府委任通知。
去年10月《城市論壇》討論中策組邀請年輕人時，學聯前副秘書長岑敖暉以收買形容政府，蘇敬恆追問，加入政府是否必定「無腰骨」。當時蘇敬恆是否同樣面對相同價值觀的掙扎，曾經思考過不做《城市論壇》主持？
「哈哈哈哈哈！」蘇敬恆仰天大笑。「咁一定有嘅。有人問我，阿峰（《城市論壇》前主持謝志峰）做到退休，你係咪做到退休？我心諗，我36歲咋喎，我咪要做多廿年？做多廿年，即係做多四屆（政府），我點樣可以做20年城市論壇呢！」
記者以蘇敬恆當日問岑敖暉的問題轉贈給蘇。他想了足足15秒後才說：「我諗，好多年輕人都有思考呢個問題，我當然有思考。」
大耍太極下，蘇敬恆承認與梁卓偉「有傾吓偈」，「佢同我分析而家形勢係點，但我覺得到最後，就係你點睇年輕人同政府、建制關係。」
「大家都知道宜家（年輕人同建制）咁樣嘅關係唔健康，就要諗吓點樣健康一啲，呢個係大家都要諗嘅嘢。但我諗更大責任喺政府度，因為佢有權力，對住一班無權力嘅人你無得要求點點點，更加要有權力嘅處理而家問題，到最後係睇建制點回應年輕人對建制恐懼、不滿的局面。」
蘇敬恆說，自己接觸的年輕人仍然抱有理想、渴求爭取改變，希望社會上有地位經驗的人可以多給機會，更要實質地認同年輕人感受。他表示，有時理解如新界東北示威者背後對建制的感覺，一方面他們不是完全不相信制度，否則「衝擊都費事」。「你衝擊得，就係因為值得你衝擊，你會唔會衝擊完全唔關心的地方？你一定有情感先有舉動。」他也相信，建制對外面的意見並非「零反應」，但反應快慢，建制內則有不同，如果政府沒有反思的話，則難以得到年輕人支持。
至於他自己，一次被拒官門，日後再受邀是否再入官場？蘇敬恆不肯用「永不說不」（never say never）形容。「我覺得唔係做咩位，而係你係一個咩人，先係最緊要。你係嗰種人，就係咩位都會……我唔敢話好成功、乜嘢都推動到，但首先要係嗰種人，而唔係首先喺嗰個位。」
他舉例說，一次遇到內地工程系畢業生來港，聽完一個有關言論自由論壇後，對方想轉行做記者。
「我第一個諗法係，千祈唔好。我唔係話記者唔好、人工低，工程師人工高，而係如果你覺得做記者有正義感，好似推動緊啲嘢、追求緊價值觀，點解做工程師唔得？做一個工程師都可以相信公義、推動公平，例如下次到某個城市建設，有不公義有貪污，你就舉報佢。」
「每一個崗位都需要有正義感的人，唔係淨係記者先要有正義感，如果一個社會得記者先有正義感，咁就唔得喇，係每個崗位的人都要有正義感！唔係我有正義感，我唔做嗰樣嘢而走去做記者，應該任何崗位，如果對工程有興趣，你有能力、技術、學識，更加要留喺呢個行業，做一個有正義感的工程師嘛！」
蘇敬恆形容，人生如一個散點，永遠不知道最後連成一條什麼線。「你唯一可以做的，就是做好自己，相信自己相信嘅嘢，做自己喜歡嘅嘢，啲點就會連埋。」
走出政助爭議，蘇敬恆恢復每周日節目主持角色。他說，最希望鼓勵年輕人嘗試面對不認同的立場仍勇於表達自己。過去曾經有出席《城市論壇》的學生被阿伯罵哭，蘇敬恆慨嘆希望同學仍然有勇氣表達看法，不論立場，仍有免於恐懼表達己見的自由。
對「維園阿伯」甚至「愛字頭」，蘇敬恆也是一視同仁。「曾經有朋友講，你唔好俾啲阿伯講咁多啦，我就話『但伯伯每個禮拜都嚟，伯伯為咗自己發言權每個星期都嚟，山長水遠花兩三個鐘，就為咗三十秒，我點解唔俾佢講呢？』你覺得伯伯講得唔好，咁你講囉？你自己唔願意花時間把握發言機會、時間，你咪做觀眾囉。」
