每周日舉行的《城市論壇》都討論當期社會大事，在一小時直播節目中，嘉賓直接互相質詢，不乏火花四濺場面。《城市論壇》主持蘇敬恆接受眾新聞專訪時，透露一般是周三開始討論主題，但邀請嘉賓無硬性「死線」。「我最遲最遲試過星期日朝早10點鐘先約到最後一個嘉賓，12點開始喎 ，10點佢先話『好喇好喇（嚟啦）』。我仲有兩個鐘咋喎，哈哈哈！」
《城市論壇》節目組一般在星期三初步討論節目主題及接觸嘉賓，星期四及星期五密鑼緊鼓約好嘉賓。不說不知，節目組實際只有蘇敬恆、監製及導演三人，蘇敬恆往往都是親力親為參與。
與此同時，節目組一般選定多於一個議題，並留意事態發展，最終在周五左右拍板。「例如到星期四，呢個議題約人有啲困難，咁就要諗係咪要轉一個（議題）呢？甚至要睇星期四、五輿論及社會氣氛係點，係咪要轉？例如DQ周庭嗰次都轉咗題目，原本都計劃講浸大（學生反對普通話試）件事，都係到星期六先轉，好彩都搵得晒嘉賓。」
他解釋，這樣安排一方面因為《城市論壇》是直播節目，同時希望星期日可以討論社會最關心的議題，「你知香港生態就係咁，有一件事發生，可能過一兩日大家就唔記得，或者被另一件事蓋過咗。唔係本身件事唔值得探討，而係本身節奏好快，資訊流通量好大，好多嘢好快就突然之間無咗關注度。」
由於《城市論壇》周日舉行，偶爾有政界或受邀人士推說是家庭日或照顧子女而婉拒出席。也有嘉賓「關心」嘉賓出席名單，蘇敬恆說，無從考究是否有人因避免同場拒絕出席論壇，但提醒如果因此顧忌，會失卻表達自己立場的機會。
「我知道因為係一個直播節目，好多時候大家覺得對答好尖銳，要好即時反應。但我覺得呢個就係開放、文明、高水平嘅社會應該要做到即時表達我們的想法。我們嘅立場係經過我們做人經驗、讀書教育、認識社會內化，你唔需要揸住張紙嚟讀，你嘅價值觀，你坐低咪同人傾囉！」
至於個人準備，蘇敬恆翻看頗多背景資料，例如哥爾夫球場建屋爭議，則要翻看《遊樂場條例》、租賃條款。
「當然要靠平時，但到星期日前當溫書咁再睇一次，如果唔係某嘉賓突然提出時，起碼有個基本概念。例如上星期講疫苗，起碼要知幾多支疫苗來港，幾多支分給醫管局、私家醫生。」
「有時做一個題目要睇好多資料，其實坦白到最後未必講到，背後要花的時間唔少。一個直播節目，嘉賓講一啲野，你唔可以一啲概念都無。當然有時無諗過嘉賓會提出呢樣嘢，始終你唔係百科全書、唔係Google，唔會咩都知，唯有靠自己平時勤力啲。」
《城市論壇》多年來困境，是出席政府官員不多，有時在政策議題，則由技術官僚出席。上屆政府少有例子，是現任政務司司長張建宗上屆擔任勞副局局長時，曾經出席討論取消強積金對沖，時任環境局副局長陸恭蕙也曾出席討論電力公司利潤管制協議。本季《城市論壇》去年9月播放後，雖然嘗試邀請，但至今暫未有任何官員出席。
蘇敬恆說，期望政府官員多出席論壇講解政策，例如政府面對人手及資源難處，不妨可與市民解釋。「100蚊係唔夠啦，但100蚊分去邊，係可以傾嘛，唔係我決定就咁。我希望政府願意多啲嚟解釋自己政策背後邏輯理論，點解50蚊要分配係呢個環節，30蚊放呢度，點解呢度得30蚊、50蚊，總有一個原因嘛，點解唔同人解釋呢？」
