聽到有些自修生，爆曬粗——「本來免DSE考試費，畀你班人惡搞人，搞到要交番！」
你咁樣就又中咗政府招啦！劏房波今次——成功爭取 ——把考試費的矛盾，轉移到自修生和惡搞者的身上，自己卸膊。
其實當然是政府的責任，這對自修生不公平。
預算案Day one開始，劏房波被記者問免DSE費，就大大聲話——多啲人考試，多啲人讀書，是好事呀！根本未想過 ，如此大鑊。
到當天晚上DSE話題紅爆——靚女師奶話：「我乾炒牛河好叻，淨考家政，睇吓有冇五星星 ！」馬拉松佬話——我報PE，淨考跑步。有人話考中文 ，淨考痾佬，口試時可大談什麼是真正愛國給後生仔聽，更多人索性話淨報名，攞准考證不考試，當打卡，做紀念⋯⋯「百萬雄師齊考DSE！」這百萬雄師口號一叫，政府當堂腳軟——試塲、監考、改卷安排，已經不得了，到考試時，全世界電視台set好晒機對住十室九空的hall，更加成為國際笑柄！
於是，把事情攤凍十天八天，現在終於宣佈自修生要自費，等自修生自己去痛罵惡搞佬，政府冇責任。
其實深層次去想，這是市民對特區政府的反感——愈來愈做事荒唐霸道，我就同你添煩添亂，睇吓你個狼狽相都好。
不過今日這特府，邊會反思呀！只識話人惡搞。
其實市民多是口噏居多，真正去惡搞的人，應該絕少。
至於給了劏房波、蔡若蓮十天去度橋，度來度去原來也只是免日校考生考試費，真正怎樣才能幫到自修生？你想了沒有？當然是你去度，你收我人工的，一定要度下點様幫到這班近萬名「N無自修生 」，別以為自己好醒，連消帶打，把矛盾推到市民和自修生，事情是你搞出來的。
