【撰文：吳尚水】
林鄭：班環保人又吵填海，眾卿家，點搞？
肥驊：法律方面應該冇問題，憲法同基本法都冇寫明禁止政府為所欲為的條文。
林鄭：怕唔怕佢地司法覆核？
肥驊：佢地敢？睇下公民黨俾人鬧得咁甘邊個仲咁？
林鄭：我意思係怕不怕佢地司法覆核又搞到工程費用超支？
建宗：我們當然唔怕，要怕的是他們，哈哈
眾大笑
林鄭：咁係咪可以去馬？
肥驊：法律上應該冇問題，如果反對聲音實在太大，我地就係憲法搵有「發展」兩個字的條文，邊個反對就話佢違反憲法冇得選立法會，班飯民就聲都唔咁聲架喇！
建宗：哈哈，殺雞焉用牛刀，飯民不是已經俾特首三萬蚊搞掂咗喇咩 ？
眾大笑
林鄭：飯民就不足為患，不過我哋都係應該避免成日拿憲法出來，你知啦，宜家全世界都議論緊我們偉大祖國部憲法，一個不小心......
劏房波：特首說得對，憲法的本質其實係規限政府權力保障人民權利，我們要避開這個焦點才對，不要為國家添煩添亂。
林鄭：咁點搞？
建宗：聲東擊西吧，話如果佢哋唔反對填海我哋就唔郁郊野公園！一定掂！
林鄭：依招用咗啦建宗！俾人鬧到飛起！
劏房波：依招太膚淺啦，況且就算講都應該搵媒體放風，唔使自己講咁核突架。
林鄭：咁宜家點拆先？
劏房波：群眾路線啦，我記得特首講過從群眾中來到群眾中去，誰贏得人民就就贏得了勝利......
眾沉寂片刻
林鄭：我幾時講過？
劏房波：我意思係前特首CY，佢做到特首就完全體現咗群眾路線的優勢性。如果係CY主政，佢應該會發動群眾，叫佢哋發聲支持填海起樓。
林鄭：吓？人哋一開始已經話我CY2.0，你仲叫我學佢個套？
建宗：咪就係，CY都要落台冇得連任啦。同埋佢哋會話我哋填咗海要嚟起豪宅，我諗我哋要將公私營房屋發展比調整成七比三或八比二才能真正贏得民心。
林鄭：咁就睇怕我不單冇得連任，仲要即刻落台都似！
劏房波：特首英明！CY冇得連任，但佢做咗國家領導人喎！
林鄭：咁又係，不過CY好勇鬥狠的性格好乞人憎，鼓吹鬥爭的思維實在要不得，咁啦，班環保人就話幫海出聲，我會叫D人為咗小朋友未來發展着想，幫佢哋出聲，以守為攻，借力打力，既能發動輿論，又佔領道德高地，咁就sure win啦？
劏房波：特首英明！但會不會我講會好D呢？
林鄭：傻的嗎？你講咪搶晒我鋒頭？我自己唔講中央點知我好打得？D人點知我好關心窮人福祉？日後我點做國家領......
