【撰文：我係黃子華】
各位，有冇睇March For Our Lives呀？唔係美劇，係美國個反槍遊行。嘩，萬人空巷人頭湧湧場面震撼，有冇D似曾相識既感覺呀各位？曾經我哋香港都有過咁熱鬧咁輝煌嘅時候架，五十萬人上街反立法，一百萬人上街反鎮壓，幾勁呀？係咪好懷念呀？
不過我同你講，冇用架！五十萬人又點啫？好多人話五十萬人上街董建華腳痛落台，咪咁天真啦，五十萬人上街之後換來的只是董生一句早晨而已，董係2005年3月10日先辭職架！根本從來都沒有五十萬人上街董建華腳痛落台呢回事，OK？
所以你話美國人上街有乜用呢？奧巴馬執政都搞唔掂，特朗Trump又點會跪低呢？什麼GUN FREE WORLD，你話要求全民派槍就可能得，乜嘢叫GUN FREE WORLD先？槍械免費呀？平民冇槍啫，但警察有槍軍人有槍，咁點叫GUN FREE 呢？同埋美國人始終有個謬誤以為美國就係全世界，叫GUN FREE AMERICA唔得嘅，係要叫GUN FREE WORLD，其實嚴格嚟 講，佢地只可以叫GUN FREE NORTH AMERICA，你話係咪先？
美國人不代表全世界，不過好多問題又的確係美國冇問題就全世界都冇問題的了，所以美國好多時都係全世界嘅問題根源來的。
當然啦，關於槍械暴力問題，我地隔岸觀火難免幸災樂禍，其實人哋美國人根本就強大到殺不死，全世界冇人够佢打，佢就自己打自己，好似周伯通咁，冇人同佢打就發明左右互搏，自得其樂；低端人口太多就定期種族清洗俾D你使，所謂小病是福，可以控制的小混亂可使國家保持健康政府繼續強大。
有時聽到新聞連我哋外人都驚，嘩又一單，又一單，又......頻密程度比我哋香港D警察出事仲要高，但美國人就係強到咁，話之你死，話唔改就唔改，所以人地個憲法地位咁高權威咁高就係咁解。
各位，人地個憲法基本上係一粒字由寫落就冇改過架，最多係後面加D修正案，唔會換個總統就加個人名落去，你話佢不能與時並進，但人哋個權威同超然就係建立係不與時並進之上。你睇李嘉誠戴錶就知道呢個道理啦，窮到燶戴精工，輸到暈戴星辰，但李嘉誠就偏偏要戴精工同星辰，呢D咪首富風範囉。一時金勞一時陀飛輪嗰D，只不過叫暴發戶、土豪而已。
講真，美國人嘅槍械問題係捉蟲入屎忽，但係我哋邊有資格笑人？自從秦始皇盡收天下兵器，中國人造反就好鬼落後，陳勝吳廣就揭竿起義，去到香港魚蛋暴動都係赤手空拳，最多挖地用磚頭，幾千年都冇進步過。如果你問我哋是否應該贊成美國廢槍，這真是一條好深奧的問題，你怎能問一些沒有槍的人是否贊成人哋廢槍呢？你可以問如果香港政府派發萬億儲備我哋會點用嗎？你可以問如果你同張柏芝結咗婚你會同佢離婚嗎？首先你要假設你是謝霆鋒才有資格思考這個問題，那你是謝霆鋒嗎？
睇March For Our Lives個集會D演講真係勁，你會覺得，講，美國人真係天下無敵。有個講法係話美國人越戰根本冇輸到，因為後來荷里活拍的越戰片風靡世界，乜都贏返曬。誰掌握了話語權誰就掌握了世界。
領導這場反槍運動的學生都是十七八歲，但她們的演說和專業級政治家有什麼分別呢？朝氣蓬勃，堅定無畏，飽含激情，美國人真是天生就是演說家。好似Emma Gonzalez就是憑一場11分鐘的演說一躍而成全球觸目的icon，她在集會上以5分鐘的靜默去代替演講，真是令人動容。
我看了篇文章說，美國這次新世代領導的運動有希望，所以香港也有希望。我不禁搖頭嘆息。
如果單單是論口才，香港十七八歲的學生照理也不輸美國人。只要你看看最近DSE口試，有條題目叫學生討論什麼港鐵站名最能代表香港特色，任何成年人都未必講得掂，但我們香港的學生就厲害了，他們竟懂得一致訛稱自己姓黃，所以黃大仙就最能代表香港好多人姓黃這個特色了，頭腦之靈活、想像之新奇、邏輯之完備，真是令人佩服稱奇！
但各位，政治除了口舌便給，更加需要的是真實的信念和勇氣。你們有沒有任何印象聽過香港的政治人說過什麼捉得住人心的話呢？香港最出名的政治家有什麼經典的演說留存呢？他們在大台演講，類似係咁嘅：梁振英係咪好無恥呀？梁振英係咪應該落台呀？我哋今日係度就係要增加我哋嘅談判籌碼，係中央手上奪回我哋嘅普選，你哋話好唔好呀？
九州生氣恃風雷，萬馬齊喑究可哀，言論自由真係好重要，唔理反槍係幾咁mission impossible，單單係見到聽到年輕人咁勇猛堅定地說出自己的希望和訴求，已經令人覺得好有力量。但你睇吓香港眾志，最喜歡喊無畏無懼，什麼和我們一起勇敢，但被人無理DQ之後，竟然走去修改黨綱，刪去敏感詞，初心拋腦後，看來以後是提都不敢提自決二字的了。
至於中國，修改憲法邁向專政，有什麼人出過聲呢？飯民連屁都不敢放一個，毫無殺傷力的口號喊了幾十年了突然都不敢再喊，唯一令人看到一絲人性光輝的就是三個北大教授辭職並留書《挺直脊樑拒做犬儒》，但好快就好似話係流料，有兩個根本就冇辭職。
所以，中美貿易戰打不打不要緊，但千萬別和美國打口水戰呀，輸梗架。
