眾新聞 Logo
眾新聞 CitizenNews
眾聞

龍景昌離開《香港01》自資搞紙媒:如果于品海打本,我使鬼走咩?


 

《香港01》周三(28日)向員工發通告,宣布龍景昌將於本月31日離任《香港01》總經理/總編輯職務。創辦人兼投資者于品海將於4月1日起出任行政總裁,「直接管理各體系業務發展」,並會暫代總編輯職務。通告未有交代龍景昌離職原因及去向。

眾新聞翻查公司註冊資料,發現龍景昌早於今年1月,已與筆名「三三」的黃寶玉及藝名「又一山人」的黃炳培,共同創辦「就係媒體有限公司(Being Media Limited)」。三人均先後任職於《明報周刊》及《香港01》。

龍景昌昨日接受眾新聞電話訪問時表示,他今年踏入65歲,冀於有生之年投入時間、精神籌辦其「新project」──就係媒體,遂決定離開任職3年的《香港01》。他坦言鍾情紙媒,「就係媒體」會是印刷媒體。龍景昌指,《香港01》老闆于品海與新平台「 零關係」,對方並非「金主」,他本人才是「就係媒體」的主要投資者,「如果佢(于品海)打本俾我做,我使鬼走咩?佢認為我做呢個紙媒係唔掂㗎,係幾廿歲人嘅『浪漫主義』。」 

龍景昌離開《香港01》前,寫了一封信給行家朋友,眾新聞獲授權原文刊登:Print matters 給朋友

龍景昌將於本月31日離任《香港01》總經理/總編輯職務。《香港01》影片「01人 - 龍景昌」截圖

《香港01》 周三(28日)晚上發通告,宣布這項高層人事變動消息。通告指,龍景昌作為機構的始創成員,「帶領公司從0到1,兩年多時間獲取多個媒體及新聞報導獎項,由寂寂無名到現在每天穩定的數百萬流量,成績有目共睹!」通告對龍景昌在職期間的貢獻致謝,並祝他一切順利,亦表明「期待未來再有合作機會」。龍景昌2015年加入《香港01》之前,在老牌娛樂周刊《明報周刊》任職逾20年。

根據公司註冊資料,龍景昌目前仍是南海控股有限公司(680)及旗下大地傳播(香港)有限公司、多維傳媒(香港)有限公司,以及香港01有限公司、香港零一媒體有限公司的董事。于品海為南海控股的主要股東及董事會主席。龍景昌另與已離開《香港01》的黃寶玉及黃炳培,在今年1月9日註冊成立「就係媒體有限公司(Being Media Limited)」。

為何離開《香港01》?

眾新聞向龍景昌查詢離職原因,他回覆指:「我自己做我自己嘅嘢,有新project。」他承認「新project」所指的是「就係媒體有限公司」。龍景昌透露,他早就有成立新媒體公司的想法,「冇1年都有9個月」,而于品海一直都知情。

就係媒體即是什麼,是紙媒還是網媒?龍景昌坦言,其興趣在於紙媒,「你哋咁後生一定擁抱互聯網,未來係互聯網嘅世界,但我哋啲老人家,都嗰頭近,我估有生之年,我諗紙媒都唔會死住啩?咪做紙媒囉。」他稱,今年將踏入65歲,他希望在自己還能夠做事的時候,做自己喜歡做的事,否則難保日後還有時間、精神去做。「點解要做紙媒?我覺得網媒要追求好多商業上PV(Page View)呀盛呀咁嘅嘢,形式限制咗個內容,有啲深度嘅文章係唔適宜喺網上㗎嘛。我覺得香港今日好多嘢需要思考,需要沉澱,我會覺得紙媒係應該做嘅嘢囉。」

龍景昌加入《香港01》將近3年,是否認為目前《香港01》已經上軌道,才於此時離開?他回應指:「01做成點,你哋自己去評價啦。客觀數字嚟講,PV呀、盛呀,起碼兩年裡面都揼咗個叫做媒體啦,一個叫做有影響力嘅媒體啦。我就覺得我都做咗我可以做嘅嘢。事實上,將來(跟《香港01》)仲會唔會有合作呢?我可能要用另一個平台,我都同阿于(于品海)講咗,但我跟住都同其他行家講我可能做另一個平台。平台有咩所謂啫?而家問題唔係平台,係內容。(就係媒體)同01係有少少唔同嘅嘢。阿于係基本上都理解我做呢樣嘢。」

誰是金主?

記者問到「就係媒體」是否與跟于品海有關,龍景昌斷言否認:「完全冇關,零關係。」那麼誰是新公司的「金主」?龍景昌答:「金主咪我囉,佢哋(黃寶玉、黃炳培)少啲,主要係我。好奀㗎咋,我哋得幾條友㗎咋,使唔使金主呀?」他不願意透露具體投資金額,只稱多於100萬元,但如果買樓則「唔夠俾首期」,新公司「捉襟見肘」,故各人都要減人工,惟「大家覺得值得去做、應該去做」。龍景昌又指,就係媒體已投入運作,目前規模很少,只有「3幾個」員工。

《香港01》有印刷周報,龍景昌為何仍要另辦紙媒?他解釋:「佢(《香港01》周報)係好大嘅,policy方面、政治方面好強,呢個係成個周報個定位。我做嗰份嘢,等於你見我以前做《明周》Book B,都唔係咁樣嘅,兩個唔同嘅product嚟㗎,所以(就係媒體)係一樣唔同嘅嘢。」何不向老闆于品海建議另立《香港01》副線?「如果佢(于品海)肯做,我唔走啦。如果佢打本俾我做,我使鬼走咩?佢認為我做呢個紙媒係唔掂㗎,係幾廿歲人嘅『浪漫主義』。佢就話,你同我做多幾年啦,做多幾年先去『浪漫』啦。」

會否辭任南海控股董事?

被問到是否與《香港01》「和平分手」,龍景昌強調:「我仲係南海嘅board member嚟㗎,你哋唔好諗到……唔好用咁樣樣嘅方式去諗落去啦。」他坦言,未有計劃辭任南海控股、多維等的董事職位,而于品海亦沒有要求他離開,「呢個我冇所謂,我叫阿于去諗……其實冇乜關係,我直情諗唔到(需要辭任),你提我先至諗。」他解釋,離任《香港01》總編輯的職位主要基於時間考慮,他目前每日都要參與《香港01》的運作,與他在南海控股、多維等公司任董事性質不同。至於不辭任董事職位會否涉及潛在利益衝突,他稱:「我哋係舢舨,佢嗰隻係航空母艦。你唔好咁抬舉(我)先得㗎。」

龍景昌早於1月成立就係媒體,是否當時已向南海控股申報?龍景昌表示:「阿于知道,我請邊個、我點樣諗嘢,佢全部都知道晒。」被問到于品海有否挽留,他則指:「佢同我識咗咁耐,佢知道有啲嘢唔會話挽留我㗎嘛。佢只係話,你考慮清楚呀,可唔可以做多幾耐呀?」

龍景昌接受樹仁大學新傳網訪問。新傳網畫面截圖

就係媒體是什麼?

就係媒體的定位,屬時事、生活、文藝,還是娛樂、財經?「死喇,你一陣間又話我玩語言偽術喇。我嘅意思就係,我哋唔可以好簡單地,將一樣嘢歸類去講,究竟係娛樂定邊啲樣嘅嘢,譬如而家香港嘅唱片業,你覺得係娛樂,抑或經濟、社會,抑或係lifestyle?所以我做《香港01》嘅時候,已經將你哋嗰啲記者唔分beat㗎喇,我就係用keywords,當然呢樣嘢實行起上嚟好難。呢個就係,我自己覺得,記者將來走嗰個方向。譬如我俾你個keyword係『林鄭』,所有林鄭嘅嘢你要留意,佢嘅政策、身體狀況,乜嘢都留意嘅時候,兩年後咪一個好資深嘅記者,『林鄭』咪係你嘅keyword囉。咁有冇分究竟你係做人物專訪,抑或政治、經濟?It doesn’t matter。你唔使只係話林鄭今日有記者招待會係講房屋,搵個社會(beat)嘅(記者)去做。呢個就係我自己理想嘅記者,而係廿年、卅年之後,你要退休,你可以寫一本(關於)林鄭嘅書,因為你跟咗佢咁耐,呢個咪你喺呢個行業嘅得益囉。」

記者追問,社會重視新聞媒體的風骨,尤其是媒體對「敏感事件」的取態。龍景昌回應表示,他曾經寫過文章解釋其想法,或可與記者分享該文章,惟不想被炒作。(相關文章:Print matters 給朋友

記者問及紙媒成本高昂的問題,龍景昌回應指:「你做《蘋果日報》、《壹週刊》成本梗係高啦,你有錢咪做日報囉,冇錢次之咪做周刊,再唔得咪做月刊囉,再冇錢咪做年報囉,再唔係你兩年出一本書囉,冇問題㗎。」那麼就係媒體是日報、周刊、月刊、年報,還是書?龍景昌表示:「仲喺度傾緊。如果你夾硬要個名,就係類似一個bookazine之類嘅嘢,但個(出版)frequency係點我哋未傾,所以我唔係好想……大家仲係brainstorm嘅階段。但我要做嘅係一個紙媒,我只可以話。」

就係媒體會否是《明周》2.0?「任何嘢都有一個原因、承傳……你自己個出身、屋企背景係咁樣,我唔會做一樣嘢出嚟完全唔同《明周》,但係咪做返以前嘅嘢?梗係唔係啦。我希望個紙媒水準,一定係超越我以前做嘅嘢。之前做嘅嘢,比較接近個水準,係好耐、10年之前我喺大陸同陸智昌佢哋做嗰個《明日風尚》,真係好有心地利用到印刷媒體所能提供到嗰個tangible、嗰個觸感嗰樣嘢。」

龍景昌透露,新平台出街已有時間表,「一定係今年」,他亦對此感到期待,「我諗咗咁多年嘅嘢,你問我心情點,quite excited。我都想睇吓龍景昌係咪做到啲自己滿意嘅嘢。互聯網你唔滿意都冇所謂,你可以話我唔熟、成世做紙媒。我做咗咁耐紙媒喎,點樣做出嚟嗰樣嘢,嗰條線都應該夠高啩?咁囉。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe