眾新聞 Logo
眾新聞 CitizenNews
眾說

【政治小劇場】黃牛治港


 

【撰文:吳尚水】

【特首辦】

阿茂:特首,正呀喂,新鮮熱辣,黃子華棟篤笑門票兩張,請享用。

林鄭:吓?炒到成萬五蚊張架喎,你竟然搶到兩張?

阿茂:哦,係我D前黨友撲俾我嘅。

林鄭:吓?白鴿黨?我啱啱先捐左三萬蚊俾佢哋,又安排佢個吳思諾入青年委員會,佢竟然益你唔益我?

阿茂:特首息怒,或者佢哋唔方便呢,你知啦......

林鄭:咁又係,佢地係慘豬D嘅,入西環又俾人鬧,收三萬又俾人鬧,再同我眉來眼去請我睇SHOW,就更加......

阿茂:係囉,佢哋一定識做嘅,唔方便太出面咁解啫。嗱, 快D收咗佢先

林鄭:但我咁收咗會唔會公職人員行為失當呀?好似Donald咁咪弊?同朕check check佢有冇問題先。

【肥驊、建宗入】

肥驊:放心啦,特首,我好忙架,咁小事我邊得閒理呀?而且阿CY又不在朝中了,冇事嘅!

建宗:係囉,宜家大和解架啦,社會和諧,四海昇平,唔使擔心咁多啦!

林鄭:但我真係唔係好識欣賞黃子華囉,我驚我去到唔識笑呀。

建宗:人地笑你就跟住笑就得架喇,依D係管治學上叫與民同樂呀特首。

阿茂:係呀特首,公民黨梁家傑就最醒目,係佢最早係FB呻黃牛問題架,佢就最識玩,因為佢知道子華係神,一定吸到睛。所以你一定要去,仲要入後台同子華合照POST上IG呀,hashtag唔寫大和解就寫「#我和神有個約會」,D網民實LIKE爆了。

林鄭:經濟方面我真係唔係好識,一個人齋吹水吹兩個鐘竟然有人願意俾萬五蚊聽?

阿茂:哦,飢餓營銷啫,特首你個仔係小米做,應該很清楚這招呀? 一萬張飛,我公開發售100張,咁仲唔排到入沙頭角搶到上月球咩? D地產商都係一樣架,佢地D單位永遠都係唧牙膏咁推架啦。

建宗:係囉,其實依招好簡單,我地政府根本用咗幾十年,全港土地全部我哋扣起,逐塊地逐塊地拍賣,價高者得,一樣道理之嘛。

肥驊:其實黃牛黨現象真係好平常,完全不值得大驚小怪,就算法律講什麼人人平等一視同仁,一樣有所謂司法黃牛現象,以前民國上海就「有錢放生冇錢判死」,就算我哋宜家法律服務好多時根本係有錢人先享受到,冇錢就可能乞都乞唔到。

林鄭:照咁睇,政府根本就係世界上最大嘅黃牛黨呀!D人買唔到棟篤笑就恨不得殺咗D黃牛黨,但對政府就冇人反感,呢個現象其實幾好笑。

眾笑,呵呵而退

【特首香閨】

林鄭:老公,有兩張黃子華棟篤笑呀,記住同我去睇。

林生:幾時?我準備緊篇論文呀,又要溫拉丁文,唔去啦。

林鄭:唔去唔得呀!乜嘢論文呀?

林生:論宇宙貨幣發行的數學基礎

林鄭:宇宙貨幣?係咪U-COIN呀?

林生:唔係,係太空支付用架....

林鄭:唔好講無聊嘢住,講返公事先,我D同事要我唔好離地,要打多D親民牌。宜家黃子華就最HIT,要同佢影番張相...

林生:黃子華?係咪拍戲唔掂俾人叫票房毒藥,然後學人stand up comedy嗰個?

林鄭:佢宜家好紅架,D黃牛飛炒到萬五蚊張架。

林生:根本係全球泛發貨幣搞到D錢賤過泥,唔代表D飛好有價值。同埋有一張飛萬五蚊,唔代表所有飛都賣到萬五蚊架?

林鄭:起碼有人願意出萬五蚊買呀,始終係勁嘅。

林生:你點知唔係有人造馬先?有人造馬MARK咗個價你就用呢個價去買,不是很傻嗎?

林鄭:那也不是傻,如果你想睇,不用萬五蚊你就冇辦法買到飛,那你也是要買的呀。

林生:如果你係有錢就有「買」呢個選擇啫,如果你係窮人,你就會選擇「唔睇」架啦。那去睇的人就變成了最有錢的人而不是最想睇的人了。政府要想想辦法解決這個問題才對。

林鄭:不用,今日我已同同事傾過,黃牛根本係一種治國理政的一種哲學,由法律到經濟都係好正常的現象,我宜家先明中央唔俾香港民主有他道理......

林生:牛頓講過,我可以計算星辰的軌跡,卻計算不出人類的瘋狂。看來我都係唔適合近人類太多呀Carrie.

林鄭:你估我好想睇咩?宜家形勢大好,我要親民谷高D民望呀,廿三條要上馬架喇!一定要去呀!

【靜默片刻】

林生:唔係呢Carrie,如果你去好可能會俾黃子華擺上枱笑架,佢最鐘意講政治嘢架, 實笑死我哋啦,話唔定佢已經準備咗講我哋封情書添啦,同埋佢姓黃,應該係黃絲嚟架,如果你搵佢影相佢拒絶, 你咪偷雞蝕把米?

林鄭:吓?咁呀?唔通波叔又想跣我?咁,再睇下點先囉。

【熄燈,瞓覺】


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe