藝人王祖藍以扮嘢起家，今年初他以「梁浸英」造型為福祿壽演唱會宣傳，其中一句「我係真金白銀喺我嗰5000幾萬到，攞咗5000幾蚊出嚟買嗰啲飛。」戳中不少人的笑穴。王祖藍接受眾新聞專訪，記者問他觸及這個全城關注的5000萬話題，難道不怕敏感踩界？
「我有考慮過，我有考慮過，但通常扮一個人係講talking point，呢樣大家一定記得㗎啦。但係如果好細緻地，我又唔想話去到好盡，所以script嗰到呢，係話有呢個錢啫，但冇話呢個錢係啱定唔啱，哈哈哈哈哈。」
王祖藍在訪問中，不時會擲出幾聲「哈哈哈哈哈」，夾雜他細說游走中國與香港之間、娛樂與政治之間的種種故事和看法。
王祖藍原來一早就想過扮前特首梁振英，「其實啊梁生呢，我係睇新聞睇到嘅， 因為我日日都睇新聞，我睇好多新聞，我老婆叫我『你可唔可以唔好再睇新聞，其實已經重複緊。』」在梁振英任特首的5年間，王祖藍就在新聞裡捕捉梁的說話神態，而且梁的聲音低沉，王祖藍自信能扮得神似。
梁振英的說話神髓有何特別？「如果從語氣上面呢， 佢除咗個『我』字未必咬得咁正，其他佢咬字係好正，好傳統粵語正音嗰啲。『改善民生、促動社會經濟』佢啲尾音係會調一調咁樣，係好搞笑嘅。」王祖藍在捕捉梁振英的神情時，形容梁一般發言時都較嚴肅，像沉思般不怎麼笑，再加上他一雙塗深了的粗眉，更起了點睛之效。
扮梁振英的講稿內容由王祖藍親自操刀，他看了一些梁振英在立法會的發言片段，滲入梁的talking point，再加入福祿壽演唱會的宣傳內容。網民回應除了大讚好笑，還有人對講稿內容提意見：「把聲堅似689， 5000幾萬嗰度好好笑，真係等收律師信」、「嘲諷國家領導人？ 等坐監啦你」、「夠薑提5000幾萬，好嘢，對你另眼相看！」
有人認為王祖藍在踩鋼線，但他定過抬油：「講真，我有時睇番啲comment，譬如我扮梁特，我唔覺得我係咁大膽，我並不覺得自己特別大膽，其實只係正常、以前香港不嬲都玩開嘅嘢。」但他之後補充：「只能夠咁講，相對哋我大膽咗。」
記者追問，為何他會選擇扮演一個在某些香港人心目中具厭惡性的人物？「我哋嘅責任就係，譬如你睇完之後可能都覺得笑一笑囉，嗰兩分鐘輕鬆一下，只不過係咁啫。我又唔覺得嗰件事之後，更多人鬧佢喎。講真，鬧佢嘅人不嬲都有，就繼續鬧佢。鍾意佢嘅人，又冇特別覺得我踩咗佢，所以呢個位其實好難把握。」
他強調，扮嘢內容沒有人身攻擊、沒有評論事件的對與錯，界線需要拿捏得十分準確，「獎門人 （曾志偉）成日教我哋，你扮一個人唔好踩到好盡，即係你輕輕咁樣，大家開心下好啦。」
王祖藍形容他是個「娛樂法官」，「我哋娛樂，我唔諗住有個立場係到，不過嗰排時事hit乜嘢、娛樂hit乜嘢、新聞hit乜嘢、話題hit乜嘢，我哋咪攞嗰樣嘢玩，但係我冇乜特別立場。」用在「梁浸英」的例子中，「我會攞佢一啲 talking point，但嚴格嚟講，我冇下一個定論嘅，個定論係每個人嘅個人感受去反映。」
記者問及他對梁振英任內的評價，王祖藍說：「我又唔會在這一刻真係下一個定論......點解咁講呢......我去投票，我會盡一個公民嘅責任，嗰到已經係我嘅立場，但係當我做一個娛樂人嘅時候，我未必會時常好公開地表達我嘅立場，我多多少少會有啲避免嘅，因為我唔想變成咗一個政治icon。我本身嘅職業係娛樂人者，係一個entertainer。咁，其實就算扮梁特，我都係從娛樂出發。」這段話，王祖藍說得謹慎，收起了他的招牌「哈哈哈哈哈」。
王祖藍說，扮嘢片段出街後，他未有聽到梁振英的反應。他與梁振英並不相識，只在某個場合碰過一次面、影了一張相，「據聞，哈......佢而家負責粵港澳大灣區，我諗之後都好多合作，到時我問下佢『你覺得我扮你扮成點』，哈哈哈哈哈。佢都好似提倡粵港澳大灣區好多嘢嘅，我諗我哋演藝界之後好多嘢都要傾到呢到啦。我估有機會見啦，哈哈哈哈哈。」
王祖藍以往扮過幾個政治人物，例如葉劉淑儀，「開頭我都驚佢話扮佢扮成點，啲人會唔高興，但點知我據聞葉劉好高興。」他又扮過陳淑莊，透過中間人得悉對方都覺得好好笑。現任特首林鄭月娥，可會是他下一個模仿對象？王祖藍說：「林鄭......我又唔覺得自己扮得好似，但係似乎要扮下，我望落去又好似冇所謂，我要摸一摸先，因為佢上次喺我哋個會（新成立的「香港演藝界內地發展協進會」）嘅視頻裡面，話會約我哋見面，我親自見下，睇下佢係咩樣先，哈哈哈哈哈。」
上月，「香港演藝界內地發展協進會」正式成立，王祖藍是創會成員之一，會長為成龍、副會長汪明荃、執行會長曾志偉。成立典禮上播出林鄭月娥的短片，表示支持協會的成立。
香港藝人北上「搵人仔」已經不是新鮮事，協會的成立也說明了「北風」只會愈吹愈強。王祖藍早於2016年，與曾志偉、邵氏兄弟電影有限公司合資創辦「手工藝創作」，經營藝人管理、影視投資等，在香港及北京都設有工作室。此外，大大小小的演藝騷，有傳他每集的演出酬勞起碼過百萬人民幣，記者向他求證，他說不會透露「商業秘密」。
內地演藝界的玩法雖然與香港有所不同，但絕對難不倒王祖藍：「我係好世界仔㗎，你俾咩我都適應得到，哈哈哈哈哈。」他續指：「我上去之前，獎門人（曾志偉）俾我嘅錦囊就係，你先望人哋想點，再講自己想點。」
在參與內地模仿表演的時候，王祖藍曾經想過扮美國總統，結果被打消念頭，「我問嘅時候就預咗一半唔得啦，只不過我不斷測試緊嗰條線係乜嘢。」在他經驗裡面，他發現大陸的文化很重視尊重前輩，「但嗰陣時，因為我唔識死呀嘛，我唔係好熟個環境，變咗我好大膽地扮咗好多個佢哋本身唔會諗住玩嘅前輩。佢地過往係連前輩都唔敢玩，唔好話政治人物。」
「政治人物唔扮都好正常，但係調番轉頭講，可能、如果、香港......大家想我扮係因為大家對佢嘅討論度多，或者大家可能不滿嘅情緒多，咁你扮會OK囉。內地嘅問題係，佢哋唔係去到好不滿，佢地覺得而家經濟咁好，我哋國家起飛，覺得我哋強國，你做乜要玩我哋嘅領導人？」王祖藍承認，「上面」不想藝人扮政治人物。
在內地表演，王祖藍表示一半是考慮政治上是否容許，另一半是娛樂因素，例如觀眾的共鳴感大不大。這樣可有構成他模仿時的限制？「我又唔係覺得好大限制，有嘅限制我頭先都講咗俾你聽，即係政治上面係會啦......另外係乜嘢呢，有一個係比較多嘅，正能量。」他解釋指，在內地不論是小品或是遊戲節目，最後都要帶出正面訊息，例如孝順父母、愛惜資源等。「有時我覺得，搞笑啫我做乜要搞咁多嘢，但好嘅係，你對下一代呀、小朋友嗰啲，佢睇咩節目都有小小健康嘅嘢。」
訪問中，王祖藍強調，內地娛樂圈有很多值得香港學習的地方。「我從娛樂圈嘅角度，佢哋太多嘢學，太多嘢學，我唔想大家誤會咗我係踩香港，即係我唔係踩緊香港無人才、唔係踩緊香港點樣水平唔好定乜嘢，只不過嗰個叫交流。」
王祖藍覺得，香港人不能總以為，中國演藝界停留在香港80年代的階段。他舉例說，香港人看內地的笑片，會「先天性」覺得不好笑，但其實如《羞羞的鐵拳》、《夏洛特煩惱》等的劇本很紮實。「如果你永遠淨係覺得人哋只係我哋80年代嘅香港嘅話，你就唔知人哋而家好緊啲乜嘢。所以我去之前，獎門人（曾志偉）都話，好多香港人真係會講『我都唔識笑』，有冇諗過係調番轉頭，而家港產片上到去，佢哋都唔識笑。」
王祖藍表示許多內地朋友被指不文明、愚蠢、無自我思想，但他看到的恰恰相反：「佢哋唔聰明，今日就唔會咁啦呢班人。佢哋勁在，幾多限制都有生存空間，呢個係佢哋厲害嘅地方」、「如果內地嘅創作人對政府有不滿，佢哋其實唔係完全冇表達，佢搵方法，你又覺得可以接受，我又表達到。有啲作品係好聰明，佢嘅暗喻係好聰明，但係又冇引起一個好大嘅咩嘢。」
他又覺得內地影視娛樂界正處於上升期，有點像香港黃金起飛的年代，香港藝人北望神洲屬平常事，「我成日會問，點解大家咁介意香港人返內地搵人民幣，美國人都係咁啦，點解你要歧視香港人、唔俾香港人搵人民幣？點解你OK美國人去搵人民幣，點解OK俄羅斯人、日本人、韓國人搵人民幣，點解你唔俾香港人去搵人民幣，好慘呀我哋，哈哈哈哈。」
記者追問，若全心全意搵人民幣，是否要放棄一些香港人堅信的價值，王祖藍說：「以前King Sir（鍾景輝）教，商業和藝術無矛盾，睇係點樣去表達，唔係完全無表達方式。」
王祖藍現時大多數時間接拍內地的綜藝節目，包括《奔跑吧！兄弟》，節目參考自韓國的《Running Man》，他北上幾日拍完節目便可以回港三幾日陪老婆李亞男。「收入就當然係內地會多少少，但唔係真係九一比咁樣囉。」
那麼，王祖藍會否放棄香港，全力搵人民幣？「從來都無。」
「我而家係，衰啲講句，我可以唔番嚟，你今日見我唔到。（點解咁講？）幾多錢搵，幾多錢搵！如果你要問心，我唔話人啦，但係你眼裡面可以望得到，有班返咗上去冇返過落嚟㗎喎。」他說，即使被人罵，仍會繼續在香港這個他成長的地方演出。
但會否拍《老表》系列的續集，王祖藍就表示要視乎TVB，「呢個係一個商業嘅問題，因為TVB而家轉緊佢嘅方向，可能會同騰訊、愛奇藝等好多內地網站合作，香港又搞Big Big Channel呀。同埋香港嘅觀眾好似又轉緊個觀賞口味同習慣，嗰到我都要再摸索一輪先。暫時唔會再拍第4集。」被問到是否TVB不准再拍攝《老表》這類含諷刺中港矛盾題材的節目，王祖藍說：「又唔係。」
北方的主旋律奏起，藝人和電視台都要隨之起舞，香港人確切看到的轉變是：以往不足為奇的事，現在卻可能是「大膽」的表現。這是「梁浸英」帶給大家的訊息。
相關文章：
