當王祖藍穿著筆直西裝、打灰藍色呔，加頂深灰色禮帽，胸前扣上一個紅色名牌，那不是參加台慶，而是出席今年年初的廣西政協會議。原籍東莞的他，為何當上廣西政協？
王祖藍接受眾新聞專訪時，道出他做政協的背後：「其實好多人推薦嘅，過往有無論係演藝界，還是青年界別、文化界別呀⋯⋯咁啱我喺廣西嗰到，又做咗好幾年慈善。」
「我自己事前，老實講，我問過好多界別，文化、娛樂咁樣，佢哋都有唔同嘅政治喜好，暫時我問咗好多人，佢哋都話『祖藍，你做。』佢哋話『如果我係呢個界別，我寧願同你溝通定同某某某溝通呢？』」
王祖藍點解做政協？他說，不僅是為了與演藝界人士溝通，也希望與當地官員溝通，「因為你要去嗰個地方，唔去就唔使溝通。」他指許多具體事項，例如去當地劇場、電視台，都需要官員鋪橋搭路才能夠成事。廣西政協目前僅於年初開過一次會，王祖藍趁機造訪當地南寧藝術中心，了解劇場運作，看能否讓香港舞台劇在那邊上演。他又透過中間人聯絡當地電視台，以及逛了幾間書店，但有日因發燒錯過了一個演出。
談到政協開會，王祖藍說：「我以前冇去過，但今年據聞係好嚴格......譬如你唔可以無緣無故地請太多假，譬如你要好嚴守紀律，你真係要嚟做嘢，唔可以話出去仲有咩玩、應酬，盡量唔可以分心，集中政協嘅會議。」
王祖藍擔任政協的時間雖短，但他已經提過議案，希望推動廣西與香港的影視文化合作。他又提到「一帶一路」及「大灣區」，「老實講，香港人唔會知係咩嚟，即係等於我去做政協嘅時候，大家發言嗰啲，香港人唔會聽得慣咩『六個堅持、八個不、九個積極』呀，哈哈哈哈哈。我都唔識寫嗰啲咁嘅『提案』，我都要請教下人。」
那麼會議上可有討論中國修憲，例如取消國家主席連任限制？「我冇討論過呢樣點。（你有冇睇法？）其實嗰個我冇去到好了解，哈哈哈哈哈，呢排做緊影展，好忙。呢啲又要由頭到尾做下功課，可能真係要搵啲乜鬼嘢國情班呀，解釋你聽，咁嗰啲可能再要了解下。因為講真，佢哋有時同我提嗰啲，咩部委呀、咩處長呀，我哋香港人嘅秘書就係我個助手，但原來佢哋個秘書長係好大嘅，呢啲我都未搞清楚。」王祖藍一邊講一邊笑不停。他表示，唯一較易明的是反貪，他亦非常同意，認為與香港的ICAC類似。
就在廣西政協名單公布當日，王祖藍被許多香港網民批評他「親中」、「賣港」，他回應這些批評指：「我真係覺得我唔介意嘅，同埋我成日都諗係......點都會有人做呢啲嘢，你想個咩人做？點都會有人去做政協，即係今日我唔做，文化界都可能會有另一個人嚟。」
他不怕因而流失fans，「我從來唔係一個小生，所以我冇死忠粉。我一般嘅觀眾可能係小朋友、可能係太太們、可能係一啲好想開心嘅後生仔。政治調番轉係有死忠粉嘅，佢係死忠嘅藍絲，你點講佢都係死忠嘅藍絲；佢係死忠嘅黃絲，佢點講都係黃絲。」王祖藍認為自己要做的，是為想開心的人提供娛樂，「我唔覺得積極參與社會事務、或者積極參與政治嘅人係好多，所以我覺得呢班人都需要娛樂㗎，我都要娛樂佢哋。」
在政治上，他說自己是「有立場但不表態」，他的選擇表現在選票裡，因為他覺得作為一個公民、一個藝人，政治表態並不是自己的本份。「或者有啲人佢真係會強烈地去表達佢嘅政治立場，我講藝人，咁慢慢佢真係會從咗政囉，但我諗我唔會，哈哈哈哈哈。」但擔任廣西政協，已經踩了入政治？「係，呢個係因為我能夠服務番我嘅行業。」
記者跟王祖藍提到，許多荷里活影星關注人道事務或作政治表態，例如梅麗史翠普（Meryl Streep）曾不點名諷刺美國總統特朗普、李安納度狄卡比奧（Leonardo DiCaprio）關注氣候暖化問題，他們藉著自身的知名度令人關注自己所相信的價值。王祖藍曾於抗戰勝利70周年閱兵當日發「敬禮照」、就南海問題爭議轉發「中國一點都不能少」圖片。記者問他所相信的價值是甚麼，他回答：「我最老土嗰句，在我呢個崗位，最大嘅係『快樂』，呢個係我覺得最緊要嘅價值觀。」
記者追問他對一些社會大事的立場，例如佔中、一地兩檢、DQ議員等，王祖藍一概表示「冇乜立場」，例如對佔領運動，他稱：「我冇一個好強烈嘅立場，我嘅立場就係......我喜歡觀察，點解有一班人會想咁樣做，點解有一班人會好反對咁樣做。其實就係，如果我用一個好膚淺嘅形容......死啦我會唔會講錯嘢呢，我會覺得係代溝，哈哈哈哈哈。」
當進一步講到，學生在政府施放催淚彈的情況下仍然堅守爭取真普選，王祖藍又是否認同這是為了公義？「我永遠嘅立場都係『一人讓一步』，我唔會呢一刻去下個定論，特別我係公眾人物，我下個定論，之後大家又鬧交，哈哈哈哈哈，鬧我又好、鬧人又好。」
他以電影《廣告牌殺人事件》為例，認為電影的主題是講「遷怒」，他手指篤著檯面說：「成日講緊遷怒，講緊你在一個唔啱嘅地方發洩你嘅憤怒，呢個係而家呢個社會......而家個憤怒係去到咁，即係你哋鬧緊政治，但唔係對準嗰班人。」「原諒」是王祖藍認為現時社會最需要的東西。
佔領運動2014年9月開始，王祖藍編劇和演出的《老表，你好hea！》（《老表2》）則於同年10月20日首播，正值運動中段。王祖藍當日在Facebook宣傳新戲時寫到：「我們未必能解決複雜的社會問題，但至少希望每一位市民有一個中場休息的機會，歡笑、安靜和反思。」《老表2》是時裝喜劇，但內容講的是選舉。
王祖藍為此劇做足功課，「嗰時我都約咗唔同嘅議員朋友、做政治嘅朋友出嚟傾偈。某程度上，而家係公關為王。你嘅形象緊要過你每日其他時間做緊嘅嘢，因為大家望到嘅是你的形象。」他認為這導致政治人物的精力集中在網絡宣傳、形象工程，所以他很佩服那些默默耕耘，不理會宣傳、形象的人，他認為政治不難「捱」，這些人才是最難「捱」。
王祖藍隨即將話題帶回政協，「而我點解會接受政協或者香港演藝界內地發展協進會個post呢，就係在我做嘢嘅過程裡面，我遇到好多實幹嘅人，而佢哋唔係好識做公關同搞關係。」在記者追問下，王祖藍再三澄清，言下之意並非指「在政協的崗位上見到許多實幹的人，而香港有很多人搞關係」。他說：「我係覺得內地同香港都有唔識搞公關嘅人，都有唔識搞政治嘅人，但內地同香港都有實幹嘅人。」他說，希望吸引實幹的人聚集起來，使所在界別形成實幹的氣氛。
王祖藍說，看到香港青年對社會有不滿、對政府有訴求，但強調需要「實幹」，「我諗佢哋有呢啲訴求，係向某啲人去表達，即係一啲幫到佢哋嘅人去表達。但係我諗，呢條路唔會係短嘅，呢樣嘢社會有共識之前，咁係咪就唔做嘢？唔可以㗎嘛。」所以他認同青年同政府之間要繼續溝通，但指自己不是「政治icon」，故不會在這方面花心力。
王祖藍覺得，他負責的是另一條路線，他有自己要做的事，例如爭取香港藝人北上的工作機會、讓學生到不同地方交流的機會，「我覺得嗰樣有共識之前，唔可以阻咗我手頭上真係做緊嘢嘅工作。呢件事（政治議題）上面我冇立場，但我覺得我要繼續做嘢。」
王祖藍引用聖經說：「凡事都可行，但不一定都有益處。」所以他覺得年輕人甚麼都可以試，但要自己分析是否有益。被問到會否鼓勵香港青年北上發展，他說：「你舒服嘅你咪北上囉，唔舒服嘅咪留喺到。」
訪問尾聲，王祖藍提起黃霑，「霑叔係國民黨嘅，哈哈哈哈哈，霑叔完全係國民黨嘅，佢嘅成長背景、佢嘅政治立場，所有嘢，但係你睇霑叔成個路線圖，霑叔去到中間，佢係頭個批上內地嘅電視同創作人。」在王祖藍的解讀裡：「佢係國民黨，但佢都話我先放低少少呢樣嘢，我去睇下究竟可以explore到啲咩。而霑叔個人，我諗佢唔係為利益嘅，佢係真心地諗緊，我係咪淨係咁樣堅持，我就對呢個社會有貢獻呢？」
王祖藍最後寄語年輕人：「都係嗰句，在呢個環境未完全改變得到嘅時候，我自己決定點面對呢個環境，我唔係賴個環境係其他人造成。個環境係咁困難喇，咁點？你可以鬧，但仍然要搵中間、你嘅生存空間。你搵到，你就係奇跡。」
相關文章：
