眾新聞 Logo
眾新聞 CitizenNews
眾說

靚鬼妹英國旗當波褲着,應該打靶


 

鄭松泰倒插國旗,建制佬,準備動議圍插佢行為不檢,好向中聯辦領功,表示有做嘢。

鄭松泰的博士學位,是在偉大祖國讀的。當年他返大陸讀,肯定比你建制佬更愛國——比你那個自稱在外國野雞大學得博士的女人——你咁愛國,又唔見你當年返大陸讀?——講開又講,可唔可以俾你那篇野雞大學博士論文來見識吓?

然而 ,阿泰在大陸讀完博士,回來做議員,竟然倒插國旗?!——你建制佬應該馬上行上去——博士阿哥,你點解咁做呀?有乜嘢唔老嚟呀?high tea傾傾呀?毛主席話——「批評和自我批評,是我們成功的武器」喎!謙虛吸收意見。

而家完全唔係,一聲不問,就準備一嘢插死你為止 ——行為不檢 ——準備釘你出局搣你柴才收科,根本是你死我活那副德性。

行為不檢?人家外國勢力——鬼仔靚鬼妹,英國旗當波褲着,國旗聞屁,以你建制佬愛國愛黨標準呀——打靶都似!

靚鬼妹英國旗當波褲着,應該打靶。照片來源:www.boausa.com
還把英國國旗當鞋着。網路照片

你去坎培拉,澳洲國會開會時睇吓——兩邊陣營議員,個個坐到歪歪斜斜,塲中嘈喧巴閉,一個議員正在講話,其他反對黨議員——竟然大大聲隨時插嘴搭嗲,還指手劃腳,卻無人制止。見到一個女議員 ,揸住杯水,高踭鞋在腳尖fing吓fing吓,一面同旁邊的肥仔議員,談笑傾偈,憑其口形及表情——我幾乎可以肯定 ——她們的話題與議會無關,但耳邊一聽有議題是啱嘴型的,她們竟然馬上可以彈起狂吹幾分鐘——真是神出鬼沒!已經習慣如此了。整個議會,都可以話係「行為不檢 」,最衰會議中不能影相俾各位睇吓。

但人哋澳洲政府,又運作良好喎!

香港議會 ,其實已經是十分斯文得老土的了。

冇嘢嘅,現在班建制怪,最想就將香港變成人民大會堂,人人殭屍咁坐定定——其實心中在想如何洗黒錢及情婦——有議案就人人舉手通過。

鄭松泰所言,這件國旗事,真是十分荒唐,這才是真正的內耗。成日見撐建制的集會後,國旗亂插垃圾桶,隨地踩,卻從未見建制佬出聲指責。同建制佬玩泥漿摔角,真是香港愈來愈低B。

反完佔中,國旗踩在腳下,又有幾尊重國旗呀!《蘋果日報》照片

請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe