眾新聞 Logo
眾新聞 CitizenNews
眾說

【政治小劇場】程序霸政


盧偉:特首,大件事喇,大件事喇...

林鄭:卿家,何事驚慌?

盧偉:係咁嘅,前排我哋人肉路障咗幾部私家車.....

林鄭:哦,炒埋一碟,死咗兩件呀嘛,我知呀,小事嚟啫

盧偉:唔係呀,特首,好大件事呀

林鄭:到底乜事呢?

盧偉:其實除咗死咗兩個疑犯之外,俾我哋人肉嗰幾個市民都受咗傷架,又腦出血又盛,佢哋D車又炒晒,又話再買全保要DOUBLE保費......

林鄭:咁到底有乜嘢問題先?都過咗九世啦,而家D人掛住嘈防波堤同戴耀廷,邊鬼個仲理呢D雞毛蒜皮事呢?

盧偉:唔係呀特首,我哋之後就發咗擬檢控通知書俾幾個人肉路障,跟住D人又嘈了

林鄭:吓?做乜嘢你要檢控人肉路障呀?人哋冇功都有勞呀?

盧偉:ERR...我哋諗住用震懾tactic,先發制人,等佢哋識機唔好輕舉妄動呀嘛!

林鄭:咁又係,佢哋分分鐘告我哋謀殺索賠都幾煩,我哋先話要告佢等佢驚到瀨尿再話唔告, 佢哋就會覺得皇恩浩蕩架喇!卿家,你冇做錯到!

盧偉:多謝特首,不過班人肉路障好唔妥我哋份擬檢控通知書呀,又搵晒傳媒訴苦又搵埋涂緊身.....

林鄭:哦,涂緊身是白鴿黨自家人,卿家無須過慮。

盧偉:唔係呀特首,個涂緊身爆響口話佢有核彈,掌握我哋罪證,如果我哋唔聽話就引爆,要我落台就落台,要保安局局長落台就落台,仲寸到話要你落台就落台添呀!你睇~~

 【盧以手機播放涂在香港01的訪問片段

林鄭:哈哈哈~~阿緊身真係識做戲!

家超:咪係,真是政治戲子!佢不如話佢要做特首都要俾佢做?!

盧偉:吓,特首,你唔驚咩?

林鄭:驚?驚我就唔做特首啦!戴耀廷仲話我係馬騮,中央殺雞就係要儆我,話我會好似Donald咁喎!

盧偉:佢話你搞唔掂中央俾你嘅任務就要小心後尾幾年呀嘛,睇嚟特首胸有成竹,咁就冇有怕啦!

林鄭:唔係你估我好打得流架?擬檢控通知書單嘢等我教你啦,你只要話係既定程序去做就得架喇!

盧偉:唔係呀特首,我都係咁講,但即刻俾涂緊身踢爆咗話冇呢個程序喎!

林鄭:傻嘅嗎?你話有佢話冇,呢D唔係叫踢爆,呢D係口同鼻拗!難道我官字三個口還拗不贏一個大鼻嗎?唔通D港豬信D垃圾會議員多過我哋政府咩?

【家超、盧偉笑】:哈哈哈~~特首英明~~

林鄭:卿家呀,我為官三十年,等我點醒你哋啦,如果我哋官家講嘅嘢咁輕易俾人推翻,我哋成個統治嘅基礎就蕩然無存架喇!我哋全部嘅統治技術同埋權威都係建基喺「程序」兩個字上面架!一百七十六年的殖民統治建立嘅權威同信念係無可撼動的!知道嗎?

家超:特首,我哋好似冇176年嘅殖民統治喎!

林鄭:1842開始,今年2018,你自己計

家超:ERR~~~

盧偉:其實我哋開埠好似係1841年,應該係177年才對

林鄭:唔好咁執着啦,一年半年豪俾佢啦!個重點係治民要術,governance technology, OK?

家超:係,殖民政府建立嘅程序的確係我哋嘅遺產

林鄭:D人成日以為我哋話會有程序處理就真係會處理,其實程序之妙係妙在我哋可以唔處理。例如我哋有程序要表決,就可以剪布;又如我哋冇一個程序叫公投,有D傻鴨蛋就會自然話自決不可能......

盧偉:中央政府先勁呀,普選三步走,一變變成五步走,循序漸進地把一場政治風暴化解於無形,唔使普選咁煩!

林鄭:呢D咪程序之妙囉。任何事只要你一講「我哋會按既定程序處理」、「我哋有既定機制調查」,D人即刻就冇聲出架喇!

家超:係,聽到會令人有一種非常安心、非常安全,everything under control嘅感覺,非常美妙

盧偉:對,會令人覺得政府好有經驗,好有把握,好公正咁處理到所有問題,美妙非常

林鄭:哈哈哈,兩位卿家醒目,以後我哋要加大力度推廣程序哲學!同我傳令落去,由社署到房署到1823政府熱線,我哋前線員工以後要多加持誦「我們會一如既往按既定程序公正處理你的問題」, 咁就一定大和解了!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe