眾新聞 Logo
眾新聞 CitizenNews
眾說

【政治小劇場】教育不可自決


潤雄:唔制呀,特首,唔制呀~~

林鄭:喂,又乜樹呀?阿波叔派錢又搞唔掂,一哥撞車又搞唔掂, 你教育局又乜事呀?哀家唔係奶媽呀!

潤雄:唔係呀,特首,真係搞唔掂呀!

林鄭:我忙緊土改呀,土地大辯先係大事,唔衰得架!

潤雄:但係你請咗羅永聰幫手,唔使驚啦,可唔可以借佢過嚟用住先呀?

林鄭:唉!西環已經一直潤我,話強將手下無弱兵,話我好打得座下冇個打得,你哋醒D得唔得呀?再係咁,中央對我哋更加指指點點架喇!

若蓮:特首,使唔使我出手?

潤雄:但真係好難拆呀特首!之前個局長就旅行睇書鬼咁輕鬆,我一上場就俾人鬧我D細路讀國際學校,宜家仲要搞D咁難搞嘅嘢!唔係講笑呀特首,你唔幫手我真係要辭職呀!

林鄭:咁大件事?你講嚟聽吓乜嘢事先

潤雄:香港位於中國南方,你話有冇問題?

林鄭:有乜問題?我哋以前就係俾人叫南蠻的嘛?

潤雄:錯喇!特首!南方可以係外部架!咁講港獨架! 應該講香港位於中國境內南部。

林鄭:吓!?咁麻煩?

潤雄:咪以為咁就搞掂呀特首,我係立法會耍到立法會議員啫, 但係D老左又話要寫香港位於祖國南部先啱呀!

若蓮:其實,咁講都唔啱, 香港之南其實仲有三百六十萬平方公里領土係屬於我國架! 香港根本不能算是中國南部!

林鄭:係喎,南海喎!D主權問題真係好麻煩好敏感架, 你地小心D先得

潤雄:邊有得小心呀特首?我原先都好似你咁天真,點知有個老左又話,香港位於中國南部根本大逆不道呀,因為個主語係香港,冇可能香港行頭中國跟尾喎!咁你話香港歷史點寫好?

林鄭:吓?咁都得?又幾煩喎真係!

若蓮:放心啦特首,只要局長學我咁講,叫人無須過份解讀就得架喇

林鄭:冇錯,你哋話教科書送審係一如既往、按照行之有效既程序處理就架喇!嗱,局長係呢方面要進修下喇,呢度有本書,局長可以參考吓,經典嚟架!聽講宜家係考AO必備天書呀

【林鄭遞予潤雄一書,書名曰《高官廢話公式寶鑑》】

潤雄:唔係呀特首,依件事其實唔係咁簡單架,香港人乜都嘈餐飽係乞人憎D,但係連我都覺得有D無所適從呀!我而家真係有D身不由己的感覺

林鄭:點解咁講?

潤雄:你話我哋機制行之有效,咁點解突然一向冇問題又變咗有問題先?教育係屬於香港自治範圍嘅事,但係呢個問題我哋睇到,到最後我哋都要睇中央點講內地D教科書點寫我哋先可以跟從,香港根本就冇SAY。

若蓮:特首,局長此言差矣!而家港獨分子猖獗,大肆在校園播毒,千方百計對青年人進行洗腦。面對國際國內複雜的意識形態鬥爭大環境,需要我們加強教材建設,幫助廣大青少年學生,從小就打好中國底色,植入紅色基因,從源頭上加強抵禦意識形態滲透的能力。

潤雄:成件事令我覺得我哋香港官員而家冇晒主動性,還要被逼處理一D無中生有而且毫無價值的問題,你明白嗎?

若蓮:特首,如果中央政府不掌握教育主權,進行本國教育,國家的根本將被破壞。國家尤其對於九年義務教育中的語文、歷史、道德這幾個涉及意識形態和國族認同的領域,應該緊緊握住其設置權和執行權。

林鄭:係呀,我哋由吳克儉局長開始已經同國家教育部建立咗會商機制,局長你只要配合內地專家就可以與時俱進架喇,不用擔心

潤雄:......

若蓮:特首放心,如果局長害怕,我隨時都準備好的

林鄭:哈哈!局長唔會真係辭職的,他辭了職誰供兩個孩子讀書呢? 局長,對不對?

潤雄:為了孩子的教育,我一定會堅守崗位,和副局長一道, 把工作做好!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe