Nick （化名）與梁天琦曾經都是香港大學利瑪竇宿舍（Ricci Hall）宿生。Ricci Hall名人輩出，已故才子黃霑、「歌神」許冠傑、前立法局主席黃宏發、民主黨創黨主席李柱銘等都是鋒芒畢露的「Ricci仔」，梁天琦也是宿舍的風頭躉。
Nick記得，他首次見梁天琦就留下深刻印象，「因為無見過男仔會留咁長頭髮，仲要係直髮。」那些年，大學唸三年就畢業，熱衷社會事務的Nick在學運中漸漸擔任更重要的角色，而醉心舍堂活動的梁天琦，在三年級時出任Ricci Hall舍堂主席。兩人在這段港大日子幾乎是「道不同，不相為謀」，Nick甚至說：「原本係覺得同佢唔係好夾，麻麻哋佢」。
不過，Ricci Hall 的精神是「團結、忠誠、犧牲」，宿舍設計亦務求令宿生融為一體，例如主張晚上不關門，所以二人仍有很多機會接觸。Nick回想幾年前的宿舍生活：「去唔同人嘅房，可能睇AV、聽下歌、傾下鳩嘢、瞓喺度傾下偈。有時候會無啦啦堆晒喺一間房，出面全部都係拖鞋。係好interact（互動），同埋好一體化。」
記者問Nick私下接觸到的梁天琦是怎樣的，話音未落，Nick直截了當：「鳩嘅。」他猶記得，在某年一個社交活動中，主題是「天堂與地獄」，梁天琦塗白整塊臉、身穿的黑色衣服上面印有白色骨架，整個人像個活骷髏，「佢係扮嗰種鳩嘢，即係其實佢係band友、文青、飲酒、彈結他、夾band，係咁嘅人嚟嘅，佢好玩得。」Nick更在手機即時找到這張有梁天琦經典造型的照片。
Nick又透露，梁天琦全情投入舍堂活動的同時，學術成績卻是糟糕到不得了，他再三強調「係差得好恐怖」，他說：「係糟糕到大家驚佢唔可以繼續住呢間Hall。因為佢真係好投入，佢鍾意一樣嘢真係可以好投入。之後個情況好轉咗，最終係畢到業嘅。」梁天琦主修哲學、副修政治，最終他的畢業成績，Nick說不清楚。梁天琦由於投入舍堂活動以及傘運後積極參與社會事務，令他本來3年的大學生涯延長至5年。2016年2月，他參加新界東補選時，還是個大學五年級生。
大學三年級時，梁天琦當上Ricci Hall主席，帶領Ricci贏得港大舍堂最高體育殊榮「馬來人盃」（Malayan Cup）。在這面冠軍錦旗的背面，有他的簽名「長琦」（因為他是長頭髮），簽名下方是過往獲得的榮譽，其中有「LAX1314MVP」，Nick 解釋：「即係Ricci Hall Lacrosse（棍網球）Team 13/14年度嘅MVP（最有價值球員），其實佢真係好鍾意Lacrosse。」梁天琦因打棍網球有不同傷患，曾動過手術，但都沒有放棄。
Nick又表示「馬來人盃」錦旗的顏色有特定意思，Ricci Hall門口有三面錦旗，兩紅一黑，紅色是Ricci的顏色，他說：「其實頭三名都可以揀錦旗顏色，但通常覺得只有冠軍先係贏，第二、三名係輸就會用返黑色。總之，係一個對勝利好執著的精神。」他又記得，舍堂每年都有一個「莊名」，梁天琦領軍的那一年叫「雪狼」，意謂一雪前恥，因為過去4、5年都失落了「馬來人盃」冠軍，今次終於凱旋歸來，再度升起紅旗。
梁天琦，要贏。
這是2013/14年度的事，舍堂間的戰役是贏了，但社會醞釀着的，是自主權移交以來最大規模的社會運動。本身較熱衷社會時事的Nick這樣看：「佢（梁天琦）好似好中意Hall的事務，但我的想法是當時出面有很多事發生。」Nick想要為社會做點甚麼，早早以學生的身份投入梁振英做特首後的社會運動當中。
時間去到2014年「928」當晚，據梁天琦自辯稱身在現場，Nick當時也在金鐘並記得：「當時有消息，警察已經開槍，但我仍然留喺嗰度，當時覺得係關鍵時刻，定義香港普選係乜嘢，覺得咁樣就走的話，一切都完。」Nick不知道梁天琦同樣在金鐘，只在翌日晚上的港大中山公園集會上，見到梁主動走出來發言，但發言內容已經記不起來，「嗰下我都有少少意外，因為無諗到佢會出來講嘢嘅。感覺上佢以前唔係一個咁熱切關心，甚至會去投入、去發言嘅人。」Nick 說。
在Nick的記憶裡，梁天琦沒有向他提及過往參與過反高鐵、反政改、反東北撥款等社運，也沒有循學生會或時事委員會的途徑參與社會事務，而是一心專注在Ricci Hall。
Nick猜想梁天琦投入社會運動，可能與梁剛剛結束Ricci Hall主席任期有關，「2014年9月嘅時候，佢已經贏咗支旗加落埋莊，配合返Nora條片（梁天琦紀錄片《地厚天高》），就係剛剛走過了低谷嘅時候，發現有啲嘢值得關心，我估計應該係。因為嗰下個人都幾無着落嘅，贏就贏咗，咁然之後要搵工，或者有啲course未讀完，剩返自己一個人在學校，點呢？」因為梁天琦要延期畢業，他身邊的同學卻大多準備走入職場。
在雨傘運動開始後，Nick與梁天琦才真正熟稔起來，Nick記得：「他早期都係好素人，會幫手組織下Hall裡面嘅人，開telegram group呀，會組織下、報下人數。」後來，學聯與政府談判無結果，觸發二人都認為要裝備自己，Nick指：「談判破裂之後好快諗到呢樣嘢，好快諗到要強身健體、要用護甲保護自己。其實係一見到啲人用膠地墊，即刻諗到呢樣嘢。嗰個係應急措施，唔好浪漫化呢件事，你真係要保護到自己、保護身邊嘅人，你受傷你都害到身邊嘅人，所以要對自己負責、對大家負責。」
直到2014年11月30日行動升級，他們稱之為「龍和之役」，Nick 憶述：「我哋嗰時著電單車甲、跆拳道甲、木盾。本身已經有班人拎紙皮盾在前面頂住嘅，之後我哋在中間行過，好似摩西開紅海咁，嗰下都幾觸動。其實你會好驚嘅，但你見到其他人更加無助嘅眼神，即係喺佢哋眼中，你就係準備得更加好嘅人。嗰下明白，你自己係好怯，但你無得怯，夾硬要頂。」結果，Nick被警察打傷，身邊有同學血流披面，有同學被捕；梁天琦沒有受傷。
Nick對於「龍和之役」的詮釋，就是「成件事都喺一個失敗嘅狀態下完結。」他相信此役的失敗促使了梁天琦與本土民主前線（本民前）愈行愈近。《端傳媒》2016年訪問梁天琦時寫道：「從那天開始，梁天琦說自己逐漸認定，暴力才可能帶來勝利，而相對和平的公民抗命並不會帶來實質改變。」
之後，梁天琦應黃台仰之邀加入本民前，Nick 認為：「我覺得好冒險嘅，但係似佢囉。即係佢定了目標就會一往直前，by all means necessary（用盡所有方法）。你見到嘅，其實佢demonstrating（證明緊）。」接下來的幾年，本民前多數時間在沙田、屯門等地區搞光復行動、反水貨客，包括媒體上見到一堆人踢篋的畫面。
在龍和一役中受傷的Nick ，卻沒有成為本民前的一員，「龍和對我來說係一次深刻嘅教訓，那次之後，我覺得為呢個地方汗血都付出過，但要對返屋企人負責，所以我在小小協調之下無再企咁前。但梁天琦嘅文宣，早期係我幫佢寫嘅，即係第一次選舉嘅，係我同佢夾出來。」
這些文宣包括2016年2月梁天琦參加補選時，那55萬份寄不出的選舉郵件，當時選舉事務署認為當中的「自治」、「自決」、「自決前途」、「自給自主」、「香港歷史異於中國」等字眼有違《基本法》，所以拒絕寄到各家各戶。本民前來不及重印全部郵件，惟有招募義工撕走每封郵件上面的郵寄地址，以便自行派發。Nick在受訪當天更特意帶來一份郵件，「我寫嘅呢份，好傷心啊，寄唔出。（特登收藏起來？）係呀，留咗兩份，放在Ricci個folder，恍如隔世。」
但真正讓「本土派候選人」受到注目的，不是文宣內容，而是2016年年初二的旺角衝突。衝突過後，本土派聲勢一度壯大，當年2月立法會新界東補選，梁天琦取下6萬票，得票率15%，眾人期待同年9月立法會換屆，他將會成功取得議席，卻沒料到會殺出「確認書」這隻攔路虎。梁天琦千方百計挑戰「入閘」，更與Nick 討論「係咪入到閘屎都食」，但結果是當了「政棍」（簽確認書並表明不再推動港獨）都入不了閘。「Plan B 」青年新政梁頌恆選上了，梁天琦問過Nick做不做議助，但Nick那時候因工作纏身，未能答應，之後就發生梁頌恆游蕙禎的宣誓風波、人大釋法、DQ⋯⋯香港的政治生態起了翻天覆地的變化，本土派被重重打擊。
2016年尾，梁天琦接受Now TV訪問，回應他為何未有在宣誓風波中走到前線抗爭，「要畀答案的話，就係我懦弱，我唔想而家就要即時還柙。好對唔住，我做唔到大家期望我能夠做到嘅事，我冇負到呢個責任、企喺最前線去對抗呢次釋法，我今次選擇咗自己。」
Nick當時見到梁天琦在鏡頭前的剖白，感覺是：「理解得到囉，始終人係咁真實，唔會有個絕對強者，始終都有呢一刻。同埋會覺得，佢用咁誠實的方法，係對自己的傷害好大。佢大可以完全不理所有的回應，逃去外國，但佢無選擇呢個便宜的做法。呢個做法切合他的人物性格，但會好痛囉，佢會好痛。」現實世界裡面，梁天琦當時的言論，的確引來了很多人批評，只有少數人欣賞他身為從政者的誠實。
今天，梁天琦被控的一條暴動罪名成立或要入獄，令Nick想起了一個故事：「我們這些A-level讀過文學嘅人，都讀過一篇魯迅的『人血饅頭』，講有個革命烈士夏瑜（其實魯迅是想講秋謹），講他被人處決，街邊的人反而拿他的血，做人血饅頭救自己兒子，最後兒子也死了，證明革命烈士為了祟高理想犧牲，但在大眾眼中其實是徒勞的。」
Nick為梁天琦感到不值：「其實一己的犧牲，在香港或者華人社會，真係好快就會歸於平靜。我好明白他那種感覺：『總要有人為理想而犧牲』、『總要有人去貫徹這一點』，這是好的，有嗰種日本幕末志士精神，但在香港或者華人社會，我估個反應始終會未如理想，亦都係預見得到、理解得到，這才是最大的感慨。我猜他自己都預計得到，大家都明，但他要繼續做。」
梁天琦下月27歲，當想到梁天琦或要在獄中度過一段時間，Nick深呼吸一口氣，「唉⋯⋯我個感受就係，呢啲嘢真係由成年人做，唔應該由莘莘學子去做。真係，胡適嗰段quote。」
荒唐的中年老年人鬧下了亂子，卻要未成年的學生拋棄學業，荒廢光陰，來干涉糾正，這是天下最不經濟的事。— 胡適
「最大感受都係呢段引文，唔應該咁樣發生，好悲劇囉，其實佢自己預見到個結果嘅，即係，唉⋯⋯佢自己願意去充當夏瑜呢個烈士嘅位置。我覺得，梁天琦無咩虧欠呢個地方、呢個地方嘅人。」Nick 說。
