眾新聞 Logo
眾新聞 CitizenNews
眾說

【政治小劇場】葉劉慧卿論政


葉劉:喂主席,主席...

卿姐:喂喂喂,唔好亂叫,普通黨員嚟啫我

葉劉:講笑啦卿姐,民主黨冇咗你邊得呀?

卿姐:你真係搞笑,有乜唔得啫?我哋個黨底子咁厚,冇話冇咗邊個唔得嘅

葉劉:哈哈,如果一個普通黨員隨便講句嘢都可以無風起浪,張張報紙都報,白鴿黨咪仲勁過共產黨?

卿姐:你唔使單單打打喇,想講乜嘢隨便放馬過嚟

葉劉:卿姐,唔使咁緊張,我撐你架,你睇吓阿志偉塗緊身,小小事就打瀉籮蟹咁,仲要係死蟹,真係一D大將之風都冇!卿姐就唔同, 一句就聲震雷霆、屋瓦亂飛...

卿姐:我哋D老嘢講嘢隨口發噏風啫,邊有人理呀?

葉劉:傻啦卿姐,有人用大數據分析呀,痴峯搶機由幾大建制媒體合力狂推,但都推唔起,本來關注度已經衰退,俾你金口一開, 即刻爆SEED變十級風暴,搶晒FO呀,真是game changer呀你卿姐

卿姐:咁小小牙力我都仲有!

葉劉:咪就係!宜家D政治人物同卿姐邊有得比呀?就算係我都自愧不如架,我都係最多幫人起機之嘛,幾辛苦先起到一架,想交配起個雙飛都唔得...

卿姐:吓,你想交配?

葉劉:吹過你,係家佩,我徒弟陳家佩...

卿姐:哦...唔係鄭家佩咩?

【葉劉尷尬地笑】

葉劉:我最多都係起到架航拍機之嘛,卿姐你就唔同呀,一出聲就好似金正恩D導彈咁,唔好話小小一隻乳鴿,747都隊冧啦;我最多係幫D徒弟仔泊到個好碼頭,卿姐就好以超級魚雷,唔好話TITANIC呀,美軍D航空母艦都俾你打沉呀!

卿姐:你宜家係咪話我累到民主黨翻艇先?真係豈有此理!

葉劉:卿姐休怒,我真係覺得你勁架,最衰你嗰時冇改黨章終身續任啦!你睇吓你哋個主席胡志偉,叫痴峯鞠躬叫唔到,自己同幾個老臣子鞠躬又鞠到一鍋泡,張枱遮住唔好睇再鞠過喎,慌死人唔知佢做戲咁,要NG話俾人知,真係睇見都眼冤,你去靈堂鞠躬個死人都睇唔到啦,你咪要鞠到天黑?

卿姐:咁又係呀,胡志偉講嘢拖拖拉拉,真係冇D威嚴

葉劉:奇實點解胡志偉唔撐痴峯咁奇怪嘅呢?

卿姐:我哋民主黨從來是其是非其非,錯就認打就企定,你估我哋係建制派禮義廉藏污納垢咩?政府狗仔從來都係跟住建制派之嘛,你個傻仔理佢做乜啫?

葉劉:唔係呀卿姐,狗仔隊本來係服侍建制派,但宜家痴峯哥證明到佢哋招呼埋民主派,70個議員幾時係邊都知道喎,你知啦,宜家D 大數據分析好勁架嘛,知道你呢樣嗰樣,就可以預知你嗰樣呢樣架喇 !唔係冇得打架喎?!

卿姐:真係豈有此理!根本係小學雞行為,佢非禮我都未計!

葉劉:唔係喎卿姐,你話要佢辭職民主黨開會終止黨籍嗰時,你哋仲未睇片架喎!係咪未審先判先?

卿姐:傻嘅都知冇得打啦,佢未做議員我已經知佢唔掂架喇!真係令人噁心

葉劉:咁你即係對人不對事啫?

卿姐:你唔好同我講廢話!我選七屆未輸過呀,邊個掂邊個唔掂我唔知?真係豈有此理!

葉劉:咁又係,痴峯今勻係涉及刑事架,你哋及時止蝕割蓆係果斷明智嘅決定嚟!

卿姐:唉,有乜用呀,連胡志偉都唔聽我支笛啦,見民意反彈勢色唔對即刻轉軚,話彈劾未必支持,仲話我只係普通黨員...

葉劉:咁白鴿黨又係冇雷氣D嘅,永遠都郁D就割蓆

卿姐:唉,總之宜家我就裡內不是人,全香港都話我變態、投共,民主黨又唔認我...

葉劉:咦卿姐,乜唔係你哋夾好嘅咩?有好多人話呢個不過係你嘅策略,仲話你高招添,兵行險着,置諸死地而後生,先出手往死裡打, 咁樣反而贏得市民同情...

卿姐:真是豈有此......係咩?有人咁講咩?咁許智峯點都好過周浩鼎嘅.....


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe