眾新聞 Logo
眾新聞 CitizenNews
眾說

用手撑廣東話!



最近,「廣東話係我哋母語」呢個事實,政府竟然將佢變成問題,無風起浪,林鄭月娥仲三次唔認母語,加埋有啲學者話香港學生功課太多,應識繁寫簡,火上加油,撩到我哋好㷫。喺挪威,都有語言爭抝– 兩種書寫語Bokmål (book language)同Nynorsk(New Norwegian)之爭。

Nynorsk由源起發展到今日,係一個由「獨立英雄」變成好多人喊打嘅狗熊,from hero to zero嘅古仔。Nynorsk嘅古仔話俾我哋知,捍衞母語,唔單止用口,仲要用手,香港就有一班後生仔完美示範 ;仲有,如果北京要硬推普通話同簡體字,唔會有好結果。

Hero – 「獨立英雄」Nynorsk

點解要講Nynorsk嘅古仔?因為挪威成功獨立,Nynorsk嘅功勞唔小。
 
先講兩句歷史。挪威先被丹麥統治咗大概三百年,之後,挪威同瑞典組成聯盟(Union),聯盟聽落好似好平等,但實際係瑞典呢個大佬先係話事人,所以挪威人追求獨立,但獨立其中一個敵人,係自己。係自己,咁得意?原來挪威人長期被丹麥統治,結果,喺大城住嘅挪威人,唔單止生活被丹麥同化,連講同寫嘅,都俾丹麥話影響得好犀利,當時寫嘅bokmål,就係丹麥文嘅變奏, 唔係由挪威傳統口語發展而嚟。語言,係將民族黐埋一齊嘅一支膠水,冇咗呢支膠水,挪威人嘅國族意識,就比較薄弱,咁點爭取獨立?
 
好彩喺鄉下,仲保存挪威啲傳統。為咗捍衞傳統母語,一班知識份子,開始去鄉下尋根,揾番挪威人嘅文化傳統同語言,呢個重新建構挪威人身份認同嘅運動,就係The Norwegian romantic movement 。呢班知識份子,兵分幾路,上山下鄉搜集同有系統整理挪威嘅傳統文化同語言,例如:
1.    童話同民間古仔
2.    民歌同音樂
3.    將各地(主要係西部)方言嘅字詞、俚語同文法,整理綜合成挪威語,呢個就係今日Nynorsk 嘅前世。

結果,佢地嘅努力冇白費,挪威人嘅國族意識提高咗,團結到挪威人一條心爭取獨立,最終挪威脱離瑞典獨立,你哋話Nynorsk 係咪hero ? 但Nynorsk 下場就唔係咁好,from hero to zero。

Zero -  必修Nynorsk乞人憎

Nynorsk 戴住「獨立英雄」嘅光環,喺1885年起,同主要係城市人寫嘅Bokmål,一齊成為挪威嘅官方書寫語,推廣Nynorsk主要嘅語言政策仲有:

1.    地方政府決定當地初中生係咪Nynorsk 同Bokmål 都必修,地方自主,所以各地情況唔一樣
2.    訂立用Nynorsk嘅目標:所有政府部門,仲有國營廣播NRK(電視台同電台)嘅公開資訊,最少25%要用Nynorsk 寫
 
但現實係:上面講挪威嘅城市人慣咗寫Bokmål ,Bokmål 係佢地寫嘅母語,一啲西部鄉郊人就寫Nynorsk多啲,而全世界包括挪威嘅趨勢係:城市人口越嚟越多,鄉郊人口越嚟越少,城鄉差距擴大,結果寫Bokmål嘅挪威人有85%,Nynorsk 好少人寫。

仲有,如初中學生必修Nynorsk 嘅話,即係要同Nynorsk好鬼似嘅Bokmål 一齊學,天下大亂。

網絡圖片,作者製圖

學生家長同唔少人,好鬼㷫,鬧到政府飛起,話Nynorsk嘅粉絲仲有政府,唔明白Nynorsk嘅歷史任務已光榮完成,佢哋話唔係要忘記傳統,但選修Nynorsk 咪得囉,唔使強逼初中生必修。爭抝最激烈嗰陣,仲有學生燒Nynorsk 嘅書!
 
你哋都諗到,強逼冇好結果。Nynorsk今日嘅情況,再次證明,政府推廣Nynorsk嘅政策冇咩用:
・必修Nynorsk嘅地方,一直喺下降軌,初中生選Nynorsk 嘅人數,而家只12%

網絡圖片

・「公開資訊最少25%要用Nynorsk寫」呢個目標:政府冇以身作則,大部份政府部門都唔達標,有啲低到只有幾個%,國營廣播NRK 比政府好啲,但唔係所有頻道都達標。

如果第日北京要否定廣東話係我哋母語呢個事實,要硬推普通話同簡體字,睇吓Nynorsk嘅失敗下塲,就知唔會有好結果。
 
再睇番香港捍衞廣東話嘅情況,同當初捍衞Nynorsk都有啲相似。

用手撑廣東話!

為咗捍衞母語,當年挪威嘅知識份子上山下鄉,落手落腳搜集整理各地方言,佢哋建立Nynorsk 語系嘅同時,亦建構同加強咗國民身份認同。今日,我哋香港人一樣咁叻,我哋都有一班有心有力嘅年青人,用手捍衞廣東話– 深耕細作,無償自發建立粤典網站,整理香港嘅廣東話字詞,唔係淨識打機同抽水剝花生。呢班奮青同硏究廣東話嘅學者,有系統整理香港廣東話,對識講但唔係幾識寫嘅人(包括骷髏小姐),會令我哋加深認識廣東話,同埋加強對香港嘅身份認同。

喺廣州,中國共產黨已成功邊緣化咗廣東話,除咗敎學語言規定用普通話之外,學生落堂休息都要講普通話,離晒大譜!仲有,電視台節目要用普通話,用廣東話嘅節目買少見少等等,呢種高壓語言政策,結果激發咗2010年幾千廣州人集會撑廣東話事件。昨日廣州,明日香港,去香港化去廣東話化去繁體字嘅日子,會唔會好快殺到嚟?

網絡圖片

粤典網站編輯組話,佢哋需要每星期可貢獻一粒鐘嘅義工,你有冇時間?冇,唔緊要,咁以後上facebook同whatsapp,用多啲廣東話囉,一位硏究廣東話嘅日本學者話,八九十年代後用廣東話寫嘅書,已好少好少;我哋寫多啲,廣東話先會更強大更有活力。


心水清嘅你,或者已留意到呢篇文,全部用廣東話,冇錯,上面挪威訂嘅25%目標,骷髏小姐或者做唔到,但以後會寫多啲廣東話。研究廣東話,用廣東話寫posts寫文甚至出書,細水長流,都可以幫手捍衞廣東話;撑廣東話,除咗表態,仲需要我哋嘅手!
 
附:回帶重溫2010年廣州人撑廣東話事件(有線電視節目)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe