眾新聞 Logo
眾新聞 CitizenNews
眾說

「咁樣侮辱國旗,殺無赦!」


5月17係挪威國慶,人哋喜慶洋洋旗海飄揚,但諗起香港嘅國旗法,同殺到埋身嘅國歌法,就笑唔出。講開國慶,不如講下好鬼愛國嘅挪威人,同埋佢哋愛國旗愛到嘅瘋癲程度。

帶住國旗去旅行,仲.....

好多年前去德國柏林旅行,有朝喺酒店食早餐 ,聽到有人講挪威話,於是擰轉頭睇吓,見到一對挪威中年夫婦,用挪威話同佢哋講咗聲早晨,之後,唔覺意睇到一件不可思議嘅事…………佢哋將一支挪威旗仔插喺枱面某物體上面!已經唔記得佢地插喺咩物體上面,亦都唔記得有無唐突問佢哋,出嚟玩,都帶埋支挪威國旗仔,仲食早餐都插旗咁得意?只係記得當時有啲驚奇。不過,諗深一層,挪威人咁鬼愛國,咁鬼愛國旗,仲愛得鬼咁狂熱,咁柏林遇到嘅不可思議嘅事,又唔係好驚奇啫。
 
挪威一年有16日官方國旗日,即係政府機關要喺呢16日特定時間升國旗同收國旗,雖然呢個法例唔關平民百姓事,但好鬼愛國嘅挪威人,竟然自動波– 唔少屋宛都有支固定嘅旗杆,自發喺國旗日升旗。5月17國慶,好多仲喺屋企露台/花園掛國旗。
對香港人嚟講,挪威人呢啲行為,簡直係外星人行為,佢哋係咪愛國爆晒燈?

仲有,挪威人愛國旗嘅其他方式,都幾盞鬼,不過,如果我哋抄下面挪威人嘅橋,香港果班牛鬼蛇神,同埋班奴才高官,一定七情上面仲突晒啲青筋,大大聲跳出嚟鬧:「咁樣侮辱國旗,要嚴重譴責,要刑事檢控/殺無赦!」

食國旗落肚、愛你365 天

國慶果日,淨係掛國旗,滿足唔到挪威人對國家滿到瀉嘅愛,於是,佢哋屋企裏面都會有好多國旗,咁係咪全屋都掛滿國旗?咁又唔係。
挪威人覺得淨係掛國旗,好鬼悶,愛國唔能夠咁馬虎,於是,國慶佈置咩都用國旗圖案,同埋紅白藍三色,搞搞新意思。

挪威人甚至連甜品都唔放過,國慶蛋糕幾乎獨沽一味——國旗蛋糕 。

國慶果日,挪威人陶醉喺旗海世界同民族自豪感,好鬼happy,但國慶一年只有一日,如果想365日同國旗朝夕共對,咁點算?有網店將國旗大量商品化,形形式式,梗有一款啱挪威人。

圖源:www.patriotisk.no,作者製圖

挪威人隻臭腳踩住國旗,連國旗泳衣同底褲都有添!係咪唔尊重國旗?

咩係尊重國旗?

其實,以上國旗蛋糕、國旗商品,同國旗泳衣底褲呢啲好玩嘅嘢,歐洲美加同好多國家,都好普遍。
 
挪威人鍾意用國旗show國民身份認同,將國旗蛋糕食落肚,將愛國情懷同身體融合,認為咁係愛國嘅一種方式。喺香港,將國旗旗製成商品售賣係非法,先唔講合唔合法,如果食國旗蛋糕,相信按中國共產黨同林鄭月娥政府嘅思維,佢哋一定話呢啲係侮辱國旗嘅行為。食國旗蛋糕,挪威人覺得係愛國,林鄭月娥政府肯定話唔愛國。至於國旗底褲,喺香港,賣國旗底褲,肯定被政府告到甩褲!

挪威人,係世界上最愛國嘅民族之一,但佢哋唔覺得國旗係神聖不可侵犯,國旗唔係淨係儀典先用,可以用唔同形式出現,融入生活,政府亦都有雅量,同寬鬆嘅尺度去睇咩係尊重國旗;佢哋用自己方式去愛國,唔係由政府規定咩先係愛國,咩先係尊重國旗國歌。
 
所有國家都會要求國民尊重國旗,但咩係唔尊重?如果唔尊重嘅話,罰唔罰?點罰?呢啲分別細節位,就睇到一個國家文唔文明。只有虛怯冇自信嘅所謂強國,先會有嚴苛、動輒得咎,同唔合情理法嘅國旗法國歌法,先會逼人表態示忠,先會逼人愛國,先會逼人學國歌。
 
睇吓挪威人冇人逼,但咁鬼愛國,就再次證明呢句已講得好鬼濫嘅説話:「國家唔愛你唔尊重你,你又點會愛國家? 」

文中圖源: 網絡圖片,作者製圖


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe