眾新聞 Logo
眾新聞 CitizenNews
眾說

打砲二十一響 送御妹過海


 

「打炮二十一響 ,送御妹過海 」——據說擬這標題的編輯,韓中旋老前輩,當時也只是隨手一揮 ,竟然成為五十年來,最幽默抵死大膽報紙政治標題 。小韓也一炮成名。
寫文章也一樣,有時寫到嘔心瀝血,卻被讀者狂抦,但有時幾分鐘靈感塗鴉,卻又呃到少少like。

英國瑪嘉烈公主1966年訪問香港。網絡照片

原來1966年三月,英女皇個妹瑪嘉烈公主訪港,坐港督遊艇送御妹,由啟德機場過中環皇后碼頭,並有禮炮21響 ,其實頗有一番英式氣勢。當時韓仔,靈感一到,寫出此題——至於題中「打炮」、「過海 」——你自己諗啦。

這樣的標題 ,當然是相當不敬啦!而且含藴仇英意識 ,但當然是玩嘢。

第二天,英國佬看到,當然唔老嚟,於是出動什麼「華民政務司 」,向這報紙——《明報》老細金庸施壓——「你玩嘢呀阿哥 !做少少嘢我交差啦!」

但金庸當時竟然頂住英國佬 ,冇炒韓中旋,只是把他「內部調職」——以表示「做咗嘢」。後來英國佬可能覺得字面上真是不容易鋤入佢——不像今日的港共般千方百計捉字蚤——加上英國人畢竟有些幽默感,於是亦算數。

如果當時英國佬真係想玩殘《明報》,你估佢有冇辦法呀嗱?

當時的萬惡殖民政府 ,查良鏞也敢頂住,因為知道英國人都還講道理。但到今天 ,你夠膽如此玩嘢 ?你夠膽擬題——「打炮二十一響,送雜夫人過海 」,我俾個頭你坐。
呢啲咪自律囉!因為我們回到偉大祖國的懷抱 ,這個母親,是無氣度,無幽默感,無信心的「三無母親」,永遠是兇巴巴的。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe