眾新聞 Logo
眾新聞 CitizenNews
眾聞

主流戲院拒放映《地厚天高》 監製嘆政治審查:商業市場應有位置


以本土民主前線前發言人梁天琦為主角的紀錄片《地厚天高》,本周一、二在兆基創意書院上映,4場逾千張門票在不足兩星期內全數售罄,觀眾反應熱烈。《地厚天高》早於去年底在藝術中心上映,其後在電影資料館、兆基創意書院、科學館等放映多場,場場爆滿。不過,至今卻未有一間主流商業戲院,願意上映《地厚天高》。

《地厚天高》監製、「影意志」藝術總監崔允信估計,累積觀眾有約6,000人次。電影總製作費剛達6位數字,目前已有錢賺。「今次《地厚天高》,好明顯反應好好,因為唔止係滿,頭幾場次我都嚇親,係可以藝術中心幾百個位,兩個鐘賣晒。報道非常之多,電影評論學會又俾咗個獎(年度推薦電影之一)。以我經驗,套戲咁樣反應,又有電影評論學會對佢一啲肯定,我哋做開電影放映,單憑呢個判斷,戲院一定會做嘅。」但事實並非如此。

以梁天琦為主角的紀錄片《地厚天高》,由港大校園電視新聞部前總監林子穎執導。資料圖片

崔允信所屬的「影意志」是由獨立電影人組成的非牟利團體,在1997年成立推廣香港獨立電影。崔允信表示,今次推廣、發行《地厚天高》,是參考雨傘運動紀錄片《亂世備忘》的做法。《亂》同樣由崔允信監製,前年上映。他憶述,《亂》入圍第53屆台灣金馬獎最佳紀錄片提名名單、初期放映反應熱烈,「喺香港做10場、8場都滿」,影意志遂向全港所有商業電影院線發信,邀請它們讓《亂》上映,「最後好辛苦地有一間筲箕灣L Cinema,韓國資金嘅,同我哋做咗幾場,而且幾場都滿咗,(門票)賣得好快。」

惟今次崔允信邀請各大戲院放映《地厚天高》,卻困難得多,甚至連租場放映都不成。崔允信指,有些戲院沒有回音,有些推說「冇期」。他跟一些戲院代表見過面、傾過偈,但最終對方不願意上映。部分相熟的影院向他坦言「難做」,「《中英街一號》有戲院上,我有啲朋友做(相關戲院),我有問過吓,佢哋有個幾婉轉嘅答覆,話我哋個紀錄片『太直接』喇,講緊一啲嘢,咁佢冇講係乜嘢,我諗係人都明白。」崔允信坦言感覺「奇怪」,他形容業界「冇好赤裸裸嘅打壓」,但政治審查卻不言而喻,因為梁天琦主張「港獨」,令商業戲院退避三舍。

將於本月底上映的《中英街一號》,故事以六七暴動為背景。《中英街一號》海報

崔允信說:「香港唔應該係一個地方,我放《地厚天高》就等於支持梁天琦嘅政治理念。你專業、一個在商言商嘅社會,就係唔應該咁樣睇嘢㗎嘛。如果係咁,點解你又放《紅海行動》、《建軍大業》呢?佢都有政治理念喺後面。大家就好似有一個咁樣嘅包袱喺度。」

崔允信認為,商業戲院是較理想的電影放映場地,他們不想一開始就搞「社區放映」,「始終有啲觀眾認為呢啲嘢(社區放映)唔同,佢唔會覺得呢啲嘢係『電影』,所以呢個亦都有少少點解我哋唔想咁快做所謂『社區放映』,嗰啲一定接觸得(觀眾)好快,但呢樣嘢好容易令人分開咗,好似呢啲唔係『電影』嚟嘅,『文化活動』至係咁樣做啫。但明明呢啲戲,喺商業市場應該都有佢嘅位置。」

崔允信說,目前只有兆基創意書院、藝術中心、電影資料館願意提供場地放映。他計劃,趁暑假檔期,再盡量找場地放映《地厚天高》,任何場地都會「盡做」,最後才會考慮出DVD、放上網等。

眾新聞向幾個主流電影院線查詢,包括百老匯、嘉禾、洲立影藝(包括MCL、Grand Cinema、Star Cinema)、UA院線,查詢為何不放映《地厚天高》,均未獲回覆。

崔允信指,近年觸及政治議題的電影,亦未能在主流戲院持續放映,「《十年》明明係(票房)好收得,攞埋金像獎。攞埋金像獎之後有啲戲會推番出嚟,但《十年》就冇再喺戲院上過,之後搞咗一次好大型嘅社區放映,好多個社區有睇,咁就完咗件事。」崔允信再舉例指,以學民思潮時期的黃之鋒及社民連馬雲褀為主角的《未夠秤》,觀眾反應也很好,但在主流商業戲院「做做吓就停止」,「呢啲係其他商業作品唔會發生,一定係開始冇人睇先會停。」

《地厚天高》由香港大學比較文學及法文系畢業生林子穎執導。梁天琦在《地厚天高》中,剖白他參與社運的心路歷程,提到他讀港大時投入利瑪竇宿舍(Ricci Hall)的舍堂活動,但他要延期畢業,身邊朋友相繼離開,他有感前路茫茫患上抑鬱症,病發時會在劏房踱步自言自語。直至雨傘運動的出現令他有了新目標,之後認識黃台仰並加入本土民主前線、參加立法會補選。

梁天琦在片中提到2016年大年初一的旺角衝突發生當晚,他的祖母從牀上墮地,後來祖母在他首次參加選舉論壇當日離世。他說,旺角衝突是他人生「最差的一晚」。他在補選落敗後及想到要面對旺角衝突官司,抑鬱症再病發。

梁天琦之後出戰立法會換屆選舉卻被DQ,在替梁頌恆助選後,梁天琦便到美國哈佛大學進修,遠離香港的政治風眼。梁天琦在片中問道:「我係咪真係呢個chosen one呢,係咪真係要肩負香港嘅命運,成為你哋嘅英雄呢?」他又提到如果沒有官司在身,會找一份hea工,其餘時間用來彈結他。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe