眾新聞 Logo
眾新聞 CitizenNews
眾說

【政治小劇場】公關秘技


林鄭:眾位卿家,今日我哋要評選吓本周最佳公關大獎,睇吓邊個同事把口最三寸不爛,化風波於口水之中,我特登搵咗我嘅愛將羅永聰做顧問,阿聰,本周有乜心水推介?

肥仔聰:我哋個團隊經過大數據分析之後,選出以下兩個化腐朽為神奇的公關個案:第一個係警方同埋消防署合力以「悶燒論」化解南生圍縱火案;第二個係港鐵主席馬屎坑......啊,不好意思不好意思,大家知道我成日都要泡網,竟然被網民洗腦了,係馬時亨主席的以「ok論」化解高鐵車輪磨損,兩個個案異曲而同工,殊途而同歸,好值得我哋同事們好好參詳學習吓。

建宗:我個人覺得警方同埋消防兩個單位夾手夾腳化解南生圍緃火案十分可取,兩個單位展現了非常可貴的默契,這在我們政府部門之間係十分難得同埋罕見的!

波叔:冇錯,其實警方今時今日的民望,係好難令人信服,而消防一直民望高企,今次警方調查完話現場冇助燃劑,消防幫口附和解釋悶燒成因,的確是非常難得的合作精神。

錦星:我都認為警方同消防今次好成功,基本係MISSION IMPOSSIBLE,大家都知道,南生圍十年最少9次大火,最近仲接二連三咁發生,又多處火頭,又俾人影到有機油,同埋香港氣候但凡山火基本上係百分百人為造成根本是常識,所以其實只有傻人才會相信南生圍不是被人緃火的,但警方同消防好嘢,憑空變出一個「悶燒」,即刻唔同曬,乜嘢都有曬解釋,好科學,好可信,好厲害!

南生圍「悶燒」後航拍照。《蘋果日報》照片

肥仔聰:的確厲害,我留意到悶燒論出台之後,前天文台台長林超英接受訪問時亦表明不敢質疑警方說法,只敢說是「奇怪」,連他這麼專業都不會質疑悶燒是起因這種解釋;就算有個頗出名的湯博士發文指明悶燒只是一個燃燒過程,根本不是「成因」,不等同自燃,如果有人用打火機點完火之後,經過悶燒再發展成大火,那就算南生圍大火是悶燒而成也不能排除有人緃火。但這個湯博士就算再有知識上的自信,面對我們權威的說法,也只能卑微地表示縱火的機會「未必能完全排除」而已!最正嘅係,以前D傳媒同環保團體鐵板釘釘咁講南生圍緃火,而家只能講南生圍怪火了!

林鄭:冇錯,呢單CASE令我哋睇到我哋一定要學識帶領輿論,拋D概念同JAGON出來,幫助愚夫愚婦思考,以後D藍絲伯伯同人舌戰,都識得拋個悶燒出來嚇人呀嘛!

波叔:特首英明,所以我地都應該學下阿CY,多D掌握輿論的主動,否則成日捱打,學馬主席話齋真係唔使瞓。

【眾笑】

林鄭:睇嚟眾卿一致睇好悶燒論,咁......

建宗:特首且慢,我認為長樂老馬主席嘅公關技巧都值得一論,大家都知道,我哋條高鐵醜聞不絶, 又超支又延誤又滲水又出軌又磨損,鑊鑊新鮮鑊鑊金,真是壓力山大,但偏偏我哋嘅長樂老還能舉重若輕輕鬆瀟灑,沒事兒一樣!真是厲害!

特區長樂老、四朝不倒翁。

肥仔聰:特區長樂老、四朝不倒翁,當然不是蓋的,我留意到劉細良已經特別為文分析了長樂老特別的公關技巧,名之曰:敢於亮劍,或發爛渣!他讚譽長樂老交遊廣闊,食四方飯,但批判他沒有立場不問是非,甚至不能控制自己,但據我看,長樂老控制自己的功力非常深厚,他的放肆根本是一種performance,完全把記者玩弄於股掌之中!

波叔:大家唔好忘記,長樂老出身名門,系出大坑道新法書院,他的小痞子作風渾然天成,未必是我們的同事學得來的。 我哋幾十年來奉行沉悶兜圈的官僚技術如果一下子轉換成長樂老這種小流氓的嬉皮笑臉作風,是個好大的paradigm shift,恐怕大家都一時不能適應得來。

錦星:但係又不能否認長樂老擅長講人話,輕輕鬆鬆鄧梓峰,係幾得平民受落大眾歡迎的,D師奶好鐘意伊款架。你睇佢講嘢,真係完全脫稿演出架,所以咁受傳媒注意就係咁解。同埋佢開創咗一個好有用嘅句式,以後講工程就話你哋唔係技術人員聽我哋講就OK,講教育就話你哋唔係教育人員聽我地講就OK,講法律就話你哋唔係法律人員聽我哋講就OK...... 咁就大家都有覺好瞓啦!

 【眾大笑】

林鄭:咁點先?邊個贏?打和SUPER嗎?

肥仔聰:特首,容我直言,長樂老的公關技術太有個人風格,較為偏鋒,今次他成功將焦點由個磨損問題轉移到他的言論身上,神不知鬼不覺,固然是鬼斧神工,但值得留意他今次引起的反彈不少,某程度上也削弱了政府的威信......

林鄭:阿聰呀,你跟住阿JOHN呢,有樣嘢你係學唔到嘅,就係個BIG PICTURE你睇唔到,係嘛?如果你睇到個BIG PICTURE,點會信阿JOHN會贏呢? 每一個人都係一個車轆,都會磨損的,磨損完咪換囉,長樂老亦一樣,no big issue,係咪?係客觀上,悶燒論又好,OK論又好, 老作一個解釋又好,不解釋又好,全部作用都係一樣,就係模糊個問題焦點,只要冇人再關注高鐵點解咁混亂咁多問題咁多麻煩,冇人追問警方是不是他們檢驗過整個火場都找不到助燃劑,哪管他們罵得天翻地覆,那麼我們整個公關的操作就係完美的了。你只留意到以上兩個CASE,證明你睇嘅既PICTURE唔够BIG,你有冇留意到呢幾日其實最大的輿論焦點其實係一個叫AILEEN 的女子呀?

神秘女子AILEEN。

肥仔聰:是那個在法庭影相還說我喜歡拍照就拍照那個大陸女子嗎?

建宗:就是她,之後又報假地址又潛逃呀嘛,連續劇咁好鬼緊張。以香港人咁鬼鐘意恥笑大陸人,呢齣鬧劇收視梗係高啦!

 波叔:哦,哦,我明喇,莫非AILEEN,係由特首你......怪不得D人話連續幾單大陸人去法庭偷拍係有安排的啦......

 林鄭:哈哈哈,別亂說,別亂說......


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe