眾新聞 Logo
眾新聞 CitizenNews
眾說

你屋企有冇長衫呢?


想問吓你,你屋企有冇長衫呢?骷髏小姐冇。請問上次著我哋嘅傳統唐裝衫係幾時呢?細個過年嗰陣?抑或中學時著過唐裝藍棉納?過年呢?除咗結婚嗰次,相信大部份人最近都冇著過,亦都冇咩興趣著;我哋同傳統服裝嘅關係,好鬼疏離。

網絡圖片

如果你5月17喺挪威首都Oslo,千祈唔好錯過與別不同嘅國慶活動– 除咗有6萬小學生巡遊,仲有世上最大型嘅「時裝表演」- 七八萬挪威人著住傳統服裝bunad,好鬼壯觀,而平時重要場合,都仲好鍾意著bunad添,佢哋係咪外星人?
 
傳統服裝嘅承傳,香港同挪威,係兩種唔同嘅風景。

幾特別嘅挪威國慶

挪威嘅國慶活動,耀武揚威嘅軍隊檢閱飛行表演,冇;花費龐大嘅烟花匯演,冇;連花車遊行,都冇;幾特別。
 
國慶第一個活動,係祭祖- 喺國家英雄紀念碑,同埋20位先賢列祖墓前獻花,先賢列祖包括第一位國王、首相、軍人、著名嘅劇作家、音樂家、作家、詩人,仲有工運份子、憲法嘅起草人同埋政治家等。
 
雖然係個只有520萬人嘅細國家,但代表唔同地區嘅bunad,有成200幾款,款款色彩艷麗手工精細,好鬼靚,目不暇給。國慶喺挪威,唔淨止係國家身份認同,更加係show地區身份認同嘅大日子,見到著一樣款式bunad嘅同鄉,你話開唔開心?

幾鍾意挪威嘅國慶活動。

七八萬人真情參加演出嘅傳統服裝表演,to see and to be seen,分唔清邊個係表演者,邊個係觀眾,係集體即興創作嘅「愛國show」。

挪威人將國慶果日,奉獻俾歷史同傳統,年年用祭祖用bunad,去加深身份認同嘅年輪,同埋大大聲講對挪威民族身份嘅愛同自豪。國慶活動,係接駁文化遺產嘅理性認知,同感性愛國情嘅一粒鏍絲釘,挪威嗰粒係神奇鏍絲釘。我哋鍾意多變化,或者好難明:「年年一樣,挪威人唔會悶嘅咩,國慶點解唔搞啲新意思?」。
 
或者,挪威人需要全年有一日,可以喺永遠唔變嘅國慶活動,同埋唔變嘅bunader呢個身份認同符號裡頭,可以暫時唔使理將挪威翻轉嘅全球化,挪威人可以暫時忘憂。
 
又或者,正正因為國慶嘅著bunad活動,十年如一日,挪威人男女老中青先會有誘因買bunad著bunad,既然買咗bunad,就唔好嘥,梗係著多啲,整整吓,啲隆重場合,例如堅信禮、畢業禮、生日、結婚,同埋聖誕新年等,佢哋都興著bunad;結果,bunad唔會淨係喺博物館陳列,bunad先能夠一代傳一代。但bunad咁似戲服,挪威後生仔女會著咩?會呀。

再睇吓呢個後生女嘅bunad嘅腰帶阿媽做,首飾係阿嬤嘅,冇呃你。

文化傳承,唔能單靠政府推,仲要靠大氣候,先會喺生活紮根,挪威呢方面係個成功例子,但bunad嘅傳承,都好有危機,呢個同世界工廠中國好有關係。

香港挪威嘅兩種風景

其實全球化威脅傳統文化,唔係新鮮事物。1947年挪威設委員會關注bunad傳統,政府仲跟住成立傳統服裝嘅國家研究機構(The Norwegian Institure of bunad and folk costume),除咗研究同教育公眾,仲建立傳統服裝檔案,儲存實物、照片、剪裁模式同技術、草圖,各區傳統材料嘅著作等,公眾可查閱,而民間亦好落力,每個地區都有民間組織推動同保存當地bunad文化。
 
但挪威政府同民間嘅努力,會唔會鬥唔過幾百蚊港紙就有交易嘅中國製造亷價bunad?挪威人手縫製嘅bunad,最少幾皮野,甚至十幾廿幾皮,好鬼貴, 係地位象徵;要用國貨嚟晒愛國情,要有米。結果唔少人幫襯中國製bunad,搞到做bunad嘅舖頭少咗好多,令本來已唔吸引嘅傳統手工業,入行嘅買少見少。
 
挪威人為中國製bunad煩惱,而香港嘅情況好唔同- 我哋係唔鍾意著長衫!點解?

有人話長衫唔型,後生仔女唔鍾意著,所以近年有啲設計師將現代元素加入長衫,希望多啲人著,將長衫承傳落去,好有心。

當然仲有啲有心人默默耕耘,繼續用手做長衫。

 照片來源:美華旗袍

不過,傳統隨時間會變,係好自然嘅事,30年代,香港嘅長衫又闊又大,50年代先開始收窄腰同pat pat位,反映融合中西嘅香港特色。挪威人著原汁原味嘅傳統bunad又好,我哋香港人著現代化嘅長衫又好,能承傳落去就好。

講番轉頭,我哋唔鍾意著長衫,除咗冇挪威嘅氛圍,有人話同長衫嘅形象有啲關係。雖然之前陳方安生同一班手袋女高官都係著長衫,而且市民一般評價唔錯,但長衫有段時間,好多夜總會公關,唔知點解,都好鍾意著,咁係咪唔想被人誤會做呢行呢?而家夜總會亦已式微,咁樣會唔會多啲人著長衫?呢啲要做吓文化硏究先知。唉吔,只向北京負責,出賣港人利益嘅林鄭月娥都成日著長衫噃……………………
 
喺北京要全面管治香港嘅政治大環境下,如果冇力感好重嘅話,或者可以諗諗將啲精力守護香港文化?點守護?例如撑廣東話,幫手整理下香港廣東話,仲要寫多啲,至於香港傳統服裝,咁係咪要著多啲原汁原味嘅傳統長衫?呢點其實唔重要,最緊要係有心人開始整理研究。冇興趣香港傳統服裝?都唔緊要,搵啲有興趣嘅,幫手建立民間檔案,將香港嘅文化遺產傳俾下一代,多有多做,少有少做。守護香港核心價值,守護香港文化,都係守護香港,都一樣咁重要。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe