眾新聞 Logo
眾新聞 CitizenNews
眾聞

赴台留學港生:擔心欠競爭力、學歷不獲承認


赴台升學的香港學生越來越多,有學生認為,即使文憑試失手,到台灣仍能攻讀大學學位,「假假哋都叫大學生」。不過,有曾到台灣留學的港生表示,赴台升學在教學語言、學習氣氛、教學內容方面均有不足之處,擔心回港發展後,競爭力不如香港的大學畢業生。

眾新聞早前參與台北經濟文化辦事處的台灣採訪團,接觸到在台灣升學和就業的香港人。台灣大葉大學英文學系3年級學生陳芷婷,由於中學成績不太好,加上大葉大學曾到其中學宣傳,她考完DSE後決定入讀該校的國際企業管理學系。但她稱,讀畢第一個學期後便感「中伏」,「佢全名就叫國際企業管理學系,講出嚟就好似好威,但教學內容其實圍繞住台灣嘅經濟、企業管理,冇咩國際成分。」 

除此之外,陳芷婷認為,台灣學生的學習氣氛與香港學生有差別,令她起初難以適應,「佢哋嘅節奏好慢,例如一組人完成一個簡報,香港人一般覺得用3個鐘就可以做完,但佢哋就要用3日,甚至1個星期先做完。」

因有感英語對將來發展有一定幫助,陳芷婷在二年級時轉讀英語學系(一年學費約99,920台幣、即約26,290港元),但仍感到有落差,「台灣人唔似香港人,唔係由細接觸英文,所以英文課程內容比較容易。我哋學校所有學生需要上英文堂,我選擇嘅中高級別,都只係教緊present tense。我要即刻轉讀由外籍老師教嘅高級英語課程,先可以追番香港程度。」 

陳芷婷坦言,因擔心台灣的學歷「唔值錢」,所以申請校方的「雙聯學位」- 每個學系提供2至3個有限名額,讓學生到美國、瑞士等大學交流一年,完成交流後可獲雙學位畢業證書,希望提升個人競爭力。她目前已成功申請,並於8月到美國南新罕布夏大學(Southern New Hampshire University)交流一年。根據QS國際排名,該校未曾上榜。她打算回港發展後,以半工讀形式繼續進修,未來打算從事翻譯工作。

在台灣大葉大學就讀英文學系的陳芷婷(左)和唐葦琳(右)認為,台灣的學習氣氛、英語水平等,與香港有很大分別,擔心回港後的競爭力不如本地大學生。戴晴曦攝

同屬英文學系三年級學生的香港人唐葦琳,文憑試考獲13分、獲公開大學學位課程取錄,由於希望攻讀英語學位課程,便選擇赴台升讀大葉大學英文學系,「我見呢間大學有雙聯學位,所以決定嚟台灣」、「如果去外國讀幾年,屋企肯定負擔唔起,但只到美國讀一年,屋企就應付得到」、「就算冇得出國,假假地都叫大學生,唔使比人叫Asso仔(副學士),好似好少少」。

在台灣讀書3年,唐葦琳不時與香港的朋友保持聯絡,有感台灣的學習生活比較「hea」,「我成日見香港讀書嘅朋友有好多presentation、paper,但我好多科都係得考試」、「考試內容仲好容易,試過有一科嘅考卷內容,只係教科書入面有嘅問題」、「我覺得咁唔係正常大學生,大學唔應該好似中學課程咁直接簡單,應該要俾學生懂得思考、沉澱學過嘅內容。而且presentation等訓練對我將來工作都有用,但只係外籍老師嘅堂先會有多啲presentation同essay嘅要求。」

為追上香港大學生,唐葦琳同樣申請「雙聯學位」獲批,準備8月到美國南新罕布夏大學交流一年。但她仍擔心回港發展後,競爭力不如香港學生,「喺台灣升學好似兜咗個圈,最後都要返香港發展。我而家寧願考好DSE,升讀香港嘅大學,好似比較直接、安心啲。」她打算回港發展後,以半工讀形式攻讀教師文憑,希望將來成為幼兒教師。

 國立臺灣科技大學企業管理系三年級學生馬智聰。戴晴曦攝

國立臺灣科技大學企業管理系三年級學生、香港人馬智聰則表示,比起香港的學習環境,他赴台升學後,只有大學的英文課使用全英教學,接觸英文的機會減少,「其實校內老師英文程度都ok,有啲已經係美國、英國教過幾年書」、「又唔可以話學生英文唔好,但唔知點解用中文教書」、「我有同學校反映過,但學校話已經有好多英文堂。」

他表示,即使校內教材用英語撰寫,上課時仍用國語授課,令他難以適應,「始終英文同普通話都唔係我嘅第一語言,上堂睇住英文,又聽住普通話,聽書方面係會比台灣人弱啲。我要努力啲讀,努力啲溫書。」

馬智聰指,未來打算回港發展,從事公關或營銷的工作,但擔心台灣的學歷不獲本港公司垂青,「其實香港嘅公司,點都會想請番八大嘅學生,老實講,呢個大家都知。」他又指,因台灣大學招生標準較模糊、沒有準確的收生分數參考,擔心僱主難以參考,「而且僱主對一個台灣嘅學生有佢嘅考慮,始終你唔係英國美國嗰啲,一攞出嚟就抛到人。我interview會自己做多啲嘢,準備多啲學校資料俾僱主睇。」

赴台升學的香港學生,由2008年的1,466人,增加至2017年的8,329人,10年來升幅近4.7倍。網上圖片

學友社學生輔導中心總幹事吳寳城表示,學生到外地升學時,應留意當地的區域限制,「例如企業管理課程,可能台灣用嘅商業模式唔係香港常用。如果香港嘅公司唔係同台灣做生意,或者希望同學國際化啲,就會令同學覺得自己讀嘅課程應用性低啲,甚至引起僱主嘅懷疑」、「講得誇張啲,去台灣讀英文,其實冇理由去台灣讀英文,因為英文唔係當地嘅強項。」

他又提醒,學生如希望回港發展,應留意不同學科回港後的專業認受性,例如在護理學系方面,學生須回港申請註冊,以及另外考取香港執業試。

吳寳城建議,同學如想出外升學,應先了解個人未來的發展方向,再研究不同地區課程的優劣勢。以台灣為例,他認為當地在文字創作、電腦、多媒體方面的學科,比香港更多元化、走得更遠。餐飲款待、美容方面的學科亦比香港的課程專業,相信回港發展會有一定優勢。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe