古語有云：「賜子千金，不如教子一藝；教子一藝，不如賜子好名。」姓名是一個人的標誌，也可能盛載父母對子女的期望，隱藏深情厚意。36歲的「本地薑」平面設計師羅曉騰，在中環元創方舉辦的「漢字展」上，介紹他創作的作品時，向在場人士憶述他兒時的一個難忘經歷：「由細到大，俾老師罰抄自己個名時，我都好羨慕個名筆劃好簡單嘅同學。」
「我以前諗，父母應該係同我作對，改我個名好複雜，去到邊，我都差唔多係全班最複雜嘅名。」長大後，羅曉騰才明白他名字背後的深層意思，以及筆劃多的繁體字那份懾人魅力。
「漢字展」由本地資深平面設計師區德誠擔任策展人，他指，元創方場內展出近300件作品，屬於超過100位來自香港、中國內地、台灣、澳門、日本及韓國等地設計師的漢字作品。區德誠給設計師的「功課」，是選擇他們名字中的其中一字創作，因有感每個人的名字跟身一輩子，無可取代。
羅曉騰是香港參展者之一，他取得香港大學附屬學院視像傳意高級文憑，在設計行業工作多年，現為他創辦的設計公司BLOW設計總監。
「細個我哋無iPhone ，啲嘢係靠腦記，小朋友嘅腦又邊記到咁多嘢，香港個教育你又知有幾多功課要做，當年成日都欠交，唔記得做呢樣嗰樣，老師罰都係罰寫自己個名，唔creative，typical嘅例子係罰寫自己個名三個字，可能係罰10次20次。」羅曉騰表示，他的名字筆劃數目共有50多個，「完成一個罰抄已經好辛苦」。此外，他又有感自己的名字外觀欠佳，「字型寫出嚟好四方，寫完永遠係包晒成個格仔，其他姓氏，例如姓李，可以有一啲線條出到嚟。」他說，以往不喜歡自己名字，故想到把它變成圖案，因而獲得設計靈感。
羅曉騰的創作，用了15個正方形、6個三角形、4個長方形來呈現「羅」字。他認為，漢字的歷史源遠流長，傳承到他這一代時，他希望可以賦予漢字另一番意義，從「現代」的角度讓大眾認識「有活力」的漢字，不一定要「硬綁綁」。「我個羅字嘅寫法，上面其實就係一個正方形，『絲』就係三角形，我想喺入面搵到一種universe嘅語言，當人去睇呢幅作品嘅時候，可能佢都會感受到好當代，但如果當佢知道入面原來隱藏住好複雜嘅漢字時，我諗嗰個位就係一個體會。」
羅曉騰雀躍地分享他喜歡的顏色，「我係一個比較開心嘅人，我係好positive，經常都好開心好自high，所以我通常都係好colorful。」他的作品有黑、白、粉紅、藍、紅色。黑色也是他口中所說的鮮艷用色？「無黑色又唔會令到其他色咁靚，我覺得係一個狀態，我覺得留番少少東方嘅黑色味道係會有趣。」道理有如「道高一尺，魔高一丈」。
羅曉騰說，「我鍾意繁體字，因為繁體字每一個字解構得好有意思，尤其香港人一定係以繁體字出發，呢個改變唔到我。我唔識睇簡體字，但又唔會有太大嘅反感，因為喺我生活嘅空間，我仲係見到繁體字。」
對於漢字的意義，他形容為「妙」。「『生』、『死』二字，你細心去睇，生死係差一線，佢哋share緊一條『橫』線，我嘅解讀係覺得呢樣係人生，呢兩個字好有趣，生嘅係上面、死嘅係下面，呢個就係我哋成日講嘅『生死一線』」。
他的名字，又蘊含著甚麼意思？羅曉騰說：「我係朝早出世，所以（父母）就起咗個『曉』字，佢哋好似好有學識啊突然間，話如果係朝頭早，人生嚟講，就代表係年青嘅時候，因為（『曉』）指啱啱個日出，老人家都係想你少年嘅時候有所成就；『騰』嘅意思就係飛黃騰達，寄語我年輕嘅時候有一番作為。」
羅曉騰笑道：「細個梗係無諗咁多，消化唔到，大個我覺得幾有意思，我鍾意佢哋講日出同年青嘅關係。」
「我有三個女，佢哋嘅名都係跟『時間』有關係；大女叫思時，我覺得人生應該有思考時間嘅價值；二女叫思辰，因為一日之計在於晨，咁佢都係朝早出世，所以佢真係可以盛載時間嘅精神；三女叫思年，年份的意思。佢哋三個加埋，我就掌握咗時間嘅真諦，時間系列就係我嘅作品。」
「我作為一個爸爸，又係一個設計師，名字創作好特別，我希望個名係一世，等於一個statement，carry住一生。我比較關注時間，因為我覺得每個人都係為咗時間而生存，所以我覺得時間呢樣嘢係珍貴。大家要懂得明白呢個道理。如果大家都明白，就會活得輕鬆啲。」
除了時間，羅曉騰也不忘說：「繁體字、漢字係好有魅力，等待緊新一代嘅人去發掘。」
「漢字展」詳情
日期：即日起至7月10日
地點：香港中環鴨巴甸街35 號元創方二樓「智方」
時間：上午10時至晚上8時，免費參觀
