立法會內務委員會今日討論由26位議員提出，在下周三（27日）立法會會議上，由公民黨楊岳橋動議不信任立法會主席梁君彥，內會最終以25票贊成，35反對否決動議。民主派召集人莫乃光表示，會爭取在暑假休會前的幾個星期，再提出對梁君彥的不信任議案，「向市民表達點解梁君彥係唔稱職」，指不會令事件不了了之。
在會議辯論期間，公民黨郭家麒批評：「梁君彥喺立法會嘅表現真係不知所謂」、「我未見過咁核突嘅人出去做（立法會主席）」，民建聯蔣麗芸隨即嘩然，郭家麒續勸喻議員對梁君彦投不信任票，指「你哋（建制派）再傾一傾，有啲咩更好嘅人選，橫掂你哋都係做木偶，做木偶就搵個好啲木偶。」
民主黨尹兆堅支持議案，認為：「梁君彥係我哋立法會嘅主要禍端之一，你睇一睇主席點樣主持會議，其實呢兩年嚟我哋嘅議會文化去到咁，主席『貢獻』良多。」、「主席嘅名言係咩？『我已經裁決咗啦，請坐底。』大家識笑識背啦係咪？」尹兆堅續說：「你諗下以前曾鈺成年代，有無咁樣俾我哋挑戰過？」蔣麗芸三度插嘴表示，「你嗰陣都唔喺到。」
社福界邵家臻表示：「剛才有議員話，主席嘅霸道係逼出嚟，泛民對於主席嘅不信任動議都係逼出嚟，喺審議成個一地兩檢裏面，主席嘅濫權已經唔需要再講，我只能夠講，主席喺成件事裏面，講佢又唔聽，聽佢又唔明，明佢又唔做；做又做錯，錯佢又唔認，認佢又唔改，改佢又唔服。而家周街已經講緊：『做人唔好串過馬時亨，亦都唔好惡過梁君彥』，所以我係會支持不信任動議。」
建制派方面，民建聯劉國勳認為，梁君彦在一地兩檢議會議上的表現「好克制」，他思考數秒後，補上「做得好好」的讚賞，稱主席主持會議的權力來自《基本法》及議事規則，反問梁君彦是否有違反議事規則，「反對派心知肚明」。飲食界張宇人表示，「言論自由又係咪絕對？大家拉布夠膽咪出嚟認，拉布都唔敢認。」
謝偉俊認為，梁君彥沒有違反議事規則，「如果大家真係留心個議事規則，所謂議員嘅發言係無定實。」、「無逼切性喺6月27日提出不信任動議。大家冷靜一下，過咗暑假後睇清楚有關嘅法例先申請做呢個動議。」張超雄反駁：「謝偉俊議員話無逼切性，我就話等多一日都嫌多，梁君彥咁低水平，零票當選嘅議員（梁君彥2016年在工業界自動當選）做立法會主席，真係我哋香港人嘅羞恥。」議案最終在大多數建制派反對下被否決。
