眾新聞 Logo
眾新聞 CitizenNews
眾說

你係咪香港人嚟架?


數字2.0喺猴年年尾又再做多齣猴子戲先至收爐,喺咁多記者同cameramen圍住之下,俾錢一個唔係喺香港住嘅街頭大陸乞兒,呢下,真係超級戇居,生果咗報早幾日頭版批佢嗰兩句:「無政治智慧.無應變能力」,真係中point。

呢個親善形象show,又試變咗個倒米show。首先,數字2.0啲戲實在太屎,佢一行埋去個路邊行乞婆婆度,右手捉住婆婆隻手,左手就已經放定係個褸袋度摸吓摸吓,準備定下一個拎銀紙出嚟嘅動作,重要係一拎就拎咗張銀紙出嚟,而唔係喺個銀包度拎張錢紙出嚟。唉,數字2.0你要排練多幾次,先至做得逼真自然有感情呃到觀眾家嘛!

個道具亦出事,搵咗張面值五百大元嘅銀紙,呢啲咪叫做over咗囉,邊有人俾錢乞兒會俾大牛架?都唔知呢個劇本係數字2.0你自己定係你班嘍囉編,編成咁,搵鬼信咩。

數字2.0隻右手握住阿婆隻手,左手已經伸定入褸袋準備動作啦!
大拿拿500蚊,阿婆婆梗係揸到實。

到咗拍攝現場,死火,導演已經嗌咗camera個個cameramen都roll緊機嘅時候,中途先發現揀錯咗個臨記,原來個行乞婆婆係大陸人。數字2.0呢個演員又真係太過唔識執生,繼續按原先嘅劇本拎咗嗰張五百蚊紙道具出嚟俾呀婆婆。唉,離地成咁,完全唔明白香港人呢幾年對大陸人啲非法同唔文明行為係有幾咁不滿。

當不才聽到數字2.0問嗰位行乞嘅婆婆:「你係咪香港人嚟架?」,不才都真係好想問吓數字2.0:「你係咪香港人嚟架?」


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe