港鐵沙中線紅磡站月台剪短鋼筋事件，分判商中科興業董事總經理潘焯鴻高調接受多間媒體訪問，被公眾視為敢言的「吹哨者」。潘焯鴻是自由黨黨員，人稱「田少」的自由黨榮譽主席、前立法會議員田北俊接受眾新聞專訪，坦言早就認識潘焯鴻，惟不知道他做「倒石屎」承接禮頓及港鐵的工程，事件曝光前他亦未有指點潘焯鴻。田少在訪問中多次表示欣賞潘焯鴻，「佢夠pop過我哋好多其他黨友。」指如果潘焯鴻有興趣參選，他絕對支持，「但佢參選做個區議員嚟做咩？你叫佢做立法會直選議員，我覺得我哋喺自由黨旗下面，喺2020年出嚟直選，立法會要有3幾萬票，係好難做得到。」
田北俊主張引用《立法會（權力及特權）條例》調查紅磡站工程問題，不過，自由黨4名現任立法會議員，均未有投贊成票支持。田少回應指，4人皆不是直選議員，而他即使對黨領導有意見，亦不會出來說，「我唯一會講，就係如果我做（自由黨）主席嘅話，就可能我仲係直選議員，可能我會從公眾利益嗰邊睇得著重啲，因為我覺得特權法唔係洪水猛獸。」
中科興業董事總經理潘焯鴻上周接受D100訪問時，透露他是自由黨黨員，但並不活躍。他表示，多年前他因其屋苑大角咀港灣豪庭的公共空間議題而站出來，到2011年以獨立身份參加當區區議會選舉，選舉落敗後才加入自由黨。
田北俊接受眾新聞專訪時表示，潘焯鴻加入自由黨數年，屬普通黨員，「我係識佢，但絕對唔係所謂詳細傾偈嗰類……我哋邀請普通黨員，多數係團聚、傾吓偈嗰啲形式，唔係真係有特別議程討論，每年淨得嗰啲AGM（Annual General Meeting，周年大會）佢先會出席，所以我平時邊會見到佢。見到佢呢，多數係傾閒偈咁傾，當然，政治議題、經濟議題都有講，但係識佢咁耐，從來唔知道佢做倒石屎，或者同禮頓、港鐵做咁多工程，我係唔知道嘅。」
問田北俊對潘焯鴻的印象，是否如公眾般覺得他敢於發聲？田少回應指，二人對話不多，故他未能作評論，「我哋幾時食飯呀、滑雪你嚟唔嚟呀、你去邊度玩呀，呢啲嘢同outspoken冇關係。佢唔係我哋坐喺常委度討論一地兩檢喎……佢唔係我哋常委，亦都唔係我哋黨嘅核心成員，佢只不過係一個普通黨員。」但田少不忘補一句：「搞到今日呢，我都好欣賞我哋呢個普通黨員，佢夠pop過我哋好多其他黨友。」
紅磡站剪短鋼筋事件自5月底曝光，一個月來不斷發酵、升級，中科往往能把握關鍵時刻，發聲明反駁港鐵說法，老闆潘焯鴻近日更高調現身說法。有人質疑潘焯鴻有政治目的；民建聯蔣麗芸在立法會會議上直指他是「政治中人」、曾與民建聯「打對台」。潘焯鴻事前是否得到自由黨中人指點？田北俊斷然否認，「冇，唔淨止冇同我（講），自由黨啲高層，現任嘅黨魁、主席又好，易志明作為我哋交通運輸（界別）嘅委員，都冇同佢傾過偈，爆出嚟之前冇講過。我都係睇新聞先知。自由黨今次威威喎，有個咁嘅黨員。」
田北俊坦言，非常欣賞潘焯鴻所為，「無論佢從咩角度出發，呢樣嘢佢講咗出嚟，公眾利益咁有關係，我覺得我係值得支持佢同表揚佢。」他又指，事件會對中科這間小公司帶來很大的後果，他相信未來禮頓、港鐵以至政府的工程合約，「都唔方有佢（中科）份」。
支持用特權法 黨友議員意見不同
不過，自由黨4名立法會議員，似乎未如田北俊支持潘焯鴻，除了遲遲未有就港鐵事件發聲，鍾國斌、張宇人、易志明反對引用《立法會（權力及特權）條例》，成立專責委員會調查紅磡站鋼筋接駁位造假事件，邵家輝則缺席相關會議。
被問到如何看自由黨議員的立場，田北俊指：「佢哋而家係黨魁、而家係主席，4個議員之中，亦都冇個係直選議員。而家佢哋係今日嘅領導，佢哋做啲嘢，我就算有意見，我都唔會出嚟話，佢哋唔應該代表自由黨咁做。我唯一會講，就係如果我做（自由黨）主席嘅話，就可能我仲係直選議員，可能我就會從公眾利益嗰邊睇得著重啲，因為我覺得P&P（Legislative Council (Powers and Privileges) Ordinance、《立法會（權力及特權）條例》）唔係洪水猛獸。」
田北俊憶述，回歸後，立法會查公屋短樁、機場運作問題，自由黨均支持引用特權法，而且兩次都由自由黨議員任相關專責委員會主席，「公營房屋建築問題專責委員會」及「調查赤鱲角新香港國際機場自1998年7月6日開始運作時所出現的問題的原委及有關事宜專責委員會」，分別由劉健儀及周梁淑怡當主席。
田少認為，當年公屋短樁問題，與今日紅磡站工程問題很相似，兩者都是由政府出資、外判予承建商進行工程。「點解當年、都係回歸之後，我哋可以用呢啲（《立法會（權力及特權）條例》）嚟有效處理呢啲嘢，一樣可以做，而家係唔敢做或者唔去做呢？從政治層面嚟講，禮頓係澳洲公司嚟嘅，而家中國建造、一帶一路起到咁多國家，我哋國家啲大嘅國企起呢啲嘅能力唔低，有咩理由特別要維護住禮頓呢？」
「我覺得我哋用P&P喺公開場合俾市民了解咗，係好緊要嘅，因為港鐵呢啲鐵路，到時用嘅係我哋幾百萬市民。如果市民個個都心掛掛，呢啲鐵路安唔安全，P&P喺立法會公開嘅一個調查委員會查到出嚟有冇事呢，個個市民心中可以放下大石，其實係好事。」田北俊續指，由立法會調查，比起法官成立的調查委員會，在市民心中公信力更高，「而且多數係有人負責，當年短樁有人負責、機場都有人負責，負責唔一定炒魷魚或者人頭落地。」
田北俊補充指，雷曼事件涉及多名投資者、 梁展文事件「唔係咁大件事件」，而且梁展文是離職政府官員，立法會均有引用特權法調查，「地鐵牽連嘅市民仲多，我睇唔出有咩理由立法會建制派咁忌、要去反對。而家P&P唔係叫某個官落台。自由黨作出個咁嘅決定，去反對P&P，我係唔知，亦都冇出聲叫佢哋支持，係而家佢哋幾位作出嘅決定。」
黨員為吹哨者、黨高層卻反對引用特權法，自由黨豈不尷尬？「唔會，因為Felix（鍾國斌）黨魁，佢都有同Jason（潘焯鴻）傾，Felix都好支持佢去立法會解釋。只不過立法會、自由黨呢幾年，包括我做主席時，有時都係用呢個理由，或者用呢個作為藉口，包括我都用過呢個藉口：既然政府已經成立一個由法官主持嘅獨立調查委員會，咁不如唔好重疊功夫，唔好個法官獨立又調查緊，我哋立法會又調查……一個簡單啲嘅個案，搵一個法官去調查，快快手查出嚟，係可能好過立法會用P&P。」
不過，田北俊今次重申，不宜「一刀切」、因政府已成立獨立調查委員會就否定引用特權法，若權衡工程安全與調查可能令工程延誤，他仍認為安全較為重要，而且事件涉及公眾利益，有需要作調查令公眾安心。「你（議員）嗰份工，係代表市民監察政府。你做好你嗰份工，咪去監察政府囉。政府點去解釋、點樣去延遲又好，都係要去處理㗎。」
田北俊胞弟、立法會鐵路事宜小組委員會主席田北辰，卻不支持引用特權法調查。被問到是否不同意其胞弟的做法，田北俊說：「佢（不支持特權法）亦都係同一個道理，有法官調查紅磡站個案，委員會就應該搞返土瓜灣同會展。呢個係佢嘅睇法，我就唔認同。」
建制派全部反對P&P，大道理係話林鄭搵咗個法官嚟做，所以（立法會）就唔做。呢個係好多情況下，我都會認同。但呢個個案中、講緊我哋呢個問題，我係認為就算架床疊屋，就算有個法官喺度查，立法會用P&P又再查，都係應該做嘅。
潘若參選會「絕對支持」 看淡自由黨直選路
那麼，自由黨是否有計劃下屆立法會參與直選，好讓直選議員監察政府？田北俊表明對此「睇得好淡」，「我覺得而家香港嘅立法會，無論係功能組別或者直選、無論建制或者泛民嘅參加人選嘅質素、興趣，都係低咗好多，呢點我係好失望嘅。」
「有班四五十歲、中年嘅『後生仔』，我覺得好係做議員嘅人才，個個都意興闌珊。第一，覺得而家做建制議員就一定被逼要支持特首，或者要支持中聯辦，或者要支持中央。如果有獨立思考啲人，話我哋真係要監察政府，就冇位企嘅。咁我做議員嚟做咩？嚟同你舉手贊成，去保皇、保住政府？
第二，直選嗰邊，市民又唔會選我哋喎。市民都覺得，佢哋選嘅係對面最極端嗰啲，全部係愈識搞嘢、愈識鬧事嗰啲就最高票，所以自由黨我哋出嚟係中間，保皇又唔想保、唔夠人哋保，反對又唔夠人哋反對。」
他解釋，外國多個社會，保守票有三、四成，激進票有三、四成，中間大概亦有兩、三成，惟香港不然，「而家市民唔係藍就係黃，所以話自由黨，我覺得喺中間票度贏到個位，係好難嘅。呢啲就拉埋中聯辦，希望佢配到多少票俾你，佢配萬零票俾你，你自己萬零票，咪3萬零票，喺直選有機會贏囉，如果唔係冇得贏。」 田北俊續指，自由黨「唔爭氣」，地區工作一直都不是強項，「講地區服務，我哋絕對唔夠民建聯嚟，亦都唔夠民主黨嚟。所以我覺得政黨發展，係認真麻麻。」
那麼，現年48歲的潘焯鴻，又是否他心目中的參選人才呢？田北俊指：「如果佢有興趣參選，我絕對支持佢。但佢參選做個區議員嚟做咩？你叫佢做立法會直選議員，我覺得我哋喺自由黨旗下面，喺2020年出嚟直選，立法會層次要有3幾萬票，係好難做得到嘅。」田北俊笑言，自由黨商界背景多，為黨員籌200多萬元去參加直選、請人派宣傳單張，是黨唯一可為黨員做的事，「但攞到票呢，我係絕對唔睇好嘅。」
「所以亦都唔怪得而家鍾國斌做黨魁、張宇人做主席，係去番功能組別，拉住建制嗰邊，以業界利益為主要任務，咁我都係有啲失望嘅。呢個就係今日香港嘅實際情況。」
潘焯鴻未有回應眾新聞查詢。他早前接受《明報》訪問指，非為參政鋪路，他計劃明年起會開始「半退休」，半職攻讀博士，研究中國在北極的戰略地位。
