特首林鄭月娥上任一周年，去年特首選舉期間、作為商界中極少數公開支持曾俊華的自由黨榮譽主席田北俊，接受眾新聞訪問。田北俊盛讚林鄭過去一年的表現，指她與市民、泛民議員關係改善，亦「搞得掂北京」，「佢（林鄭月娥）做得好過曾俊華都唔定。」
田北俊坦言，他對外已多次讚揚林鄭月娥，「純粹一點嘅啫，我覺得佢同市民有溝通，佢同泛民議員有溝通。」田北俊續指，他對梁振英最大的意見，是梁「成日點著火頭」，「同市民又係點著個火頭，佔中又好，好多嘢都係佢點著個火頭，搞到市民唔滿意，泛民又喺立法會用不合作運動對付佢。」
「林鄭好多嘢直接對市民，呢個係高招嘅。譬如一地兩檢，佢掟出嚟嗰日，政府自己開記者會，講晒啲嘢先上立法會。咁市民第一件事，見到政府解釋咗一地兩檢點解要有咁嘅安排，先入為主，聽完大部分都buy咗佢。遲啲立法會出嚟又咁又咁，多多少少就容易處理啲。」
至於林鄭與泛民立法會議員的關係，田北俊認為她「處理得好好」，「黨慶又去，仲捐幾萬蚊俾民主黨……所以佢施政報告、財政預算案、搞嗰啲考察團，泛民都肯參與，特別係泛民專業團體嗰幾位。」
田北俊又讚林鄭勤力，「掉轉頭反而我應該勸吓佢唔好咁勤力，都要做多幾年。佢年紀輕，希望佢可以連任。」
去年特首選舉，田北俊是極少數公開支持曾俊華的商界人士，為曾俊華拍片、站台。曾俊華落選後，他又提出由他與曾鈺成、曾俊華牽頭組成聯盟或平台，派人出戰去年的立法會補選，惟曾鈺成、曾俊華最終未有回應。
田北俊指，特首選舉後，他曾向林鄭表示，選舉歸選舉，她當選了，他亦希望她做得比梁振英好，「事實上，呢年佢係做到我想見到嘅，佢做得好過曾俊華都唔定，即係話對市民搞得掂、泛民搞得掂。佢強過曾俊華呢，係佢搞得掂北京。」
被問到林鄭有否邀請他出任公職，田北俊表示沒有，他亦不會接受，「如果我2016年決定退落嚟嘅話，冇一樣嘢係會吸引到我。」
