眾新聞 Logo
眾新聞 CitizenNews
眾聞

港足前隊長陳偉豪:國歌法綁手綁腳限言論自由 球迷要克制


《國歌法》本地立法引起社會爭議,法例的訂立被指與港隊球迷多次在賽場噓國歌有關。剛獲頒授行政長官社區服務獎狀的港隊前足球隊長陳偉豪,接受眾新聞訪問時表示,《國歌法》「綁手綁腳」、定義不清晰,立法限制了香港人的言論自由,但他亦表示,理解港府為何要推《國歌法》,原因之一是為阻止球迷噓國歌。他說:「事實上,港隊都勸過球迷好多次要克制,唔好做出啲影響港隊嘅行為,因為足總係需要為球迷不當嘅行為而負責。」 

港隊前隊長陳偉豪,現時效力港超聯球隊夢想FC。受訪者提供

政制及內地事務局向立法會提交的國歌法本地立法文件中,草擬的草案建議內容提及,《國歌法》訂明應由行政長官規定奏唱國歌的場合,列明奏唱時出席者須肅立莊重、中小學生須學唱及了解國歌歷史、持牌電視台及電台須按牌照條款播放政府宣傳國歌的宣傳片和聲帶,以及禁止公開及故意篡改國歌歌詞;禁止以歪曲貶損方式奏唱國歌或以其他方式侮辱國歌、不得將國歌用於商業用途等行為,違法者即屬犯罪行為,可被罰款5萬港元及監禁3年。

現時效力港超聯球隊夢想FC的陳偉豪認為,《國歌法》定義模糊,例如何謂侮辱及何謂莊重,並不清晰,而且條例亦不只限制在體育比賽中,認為條例「綁手綁腳」,限制香港人的言論自由。他說:「如果真係單單因為呢件事(球迷噓國歌)而需要訂立一個法例,咁對社會嘅影響都幾大,可能你喺條街到咁啱聽到國歌笑吓,都會俾人拉嘅時候,咁到時呢個社會都幾多限制,綁手綁腳咁。」

陳偉豪作為前港隊球員17年,他在球場上代表香港出戰,見到又聽到球迷噓國歌時,究竟有何心情?陳偉豪說,球員比賽時不會想政治,當刻只會專注如何為球隊爭勝:「球迷嘅政治表態其實就唔會太影響到球員嘅心情,但希望入場嘅球迷以純欣賞嘅心態,支持港隊,唔好做出一啲損害球隊利益嘅事,萬一搞到足協要罰我哋錢、扣分或者閉門作賽,蝕底嘅只係港隊。」陳偉豪指,明白歌迷噓國歌,很大程度是中港矛盾所引起。

那麼,球場上播國歌,陳偉豪會跟著唱嗎?「唱就唔會主動唱,因為對首歌唔算太熟。不過由細聽到大,都會尊重同認真對待。」

港隊球迷多次在港隊比賽時噓國歌。資料圖片

陳偉豪續說,若果他是來港作客球員,見到香港主場球迷噓國歌,必定會感到非常困惑,因在世界各地極少會有民眾噓自己的國歌。「我明白體育同政治好難分開講,但係目前呢個情況,喺過往代表香港隊咁多年都見過,議題又敏感,問題係長年累月而成。結果出現咗球迷選擇喺球場上表達一啲訴求同情緒,好難講對與錯,但我認為表態需要睇場合,入場睇波嘅觀眾出發點應該係睇波,或者支持港隊。」

陳偉豪表示,近年香港政治氣氛特別濃厚,更多年輕人關注是好事,「我後生嗰陣,或者老豆嗰一輩都唔太理政治,而家呢一代嘅關注度明顯較高,都係好事嚟嘅。不過,我始終認為,體育同政治應該要分開,如果因為政治表態而影響港隊就唔係幾好,真正嘅港隊球迷應該以球隊利益為先。」

 港隊球迷噓國歌事件簿:

日期 事件
08/09/2015 香港在世界盃外圍賽迎戰卡塔爾,有球迷噓國歌。國際足協收到監場報告後向香港足總罰款5,000元瑞士法郎(約4萬港元)
17/11/2015 香港迎戰中國的世界盃外圍賽,有球迷噓國歌。賽事監場向國際足協報告,香港足總翌年1月被國際足總判罰款1萬瑞士法郎(約8萬港元)
01/09/2016 香港對柬埔寨的國際友誼賽,賽前主場球迷噓國歌,但賽事監場未有向國際足協報告,香港足總未有受罰
11/10/2016 有球迷不滿政府擬收傑志足球中心地皮興建公屋,在香港對新加坡的友誼賽前噓國歌以示抗議
06/11/2016 東亞運足球錦標賽外圍賽香港對關島,奏國歌時有球迷展示港獨標語,並舉中指及背向球場
05/10/2017 國內實施《國歌法》後,香港對老撾的國際友誼賽賽前有球迷噓國歌,球迷續舉中指及背向球場
10/10/2017 香港主場迎戰馬來西亞,有球迷噓國歌,亦有球迷續舉中指及展示「香港獨立」的旗幟
31/10/2017 亞洲足協指香港對馬來西亞的亞洲盃外圍賽中違反紀律章程,發出嚴厲警告,如再犯將作出更嚴厲處分