就港鐵沙中線會展站和土瓜灣站的工程質量問題，田北辰今日於立法會內務委員會提出動議，要求授權交通事務委員會，行使《立法會（權力及特權）條例》（P&P），邀請政府官員、港鐵、各承辦商到立法會接受議員質詢。田北辰是立法會鐵路事宜小組委員會主席；交通事務委員會主席是自由黨易志明，田北辰是委員。
田北辰批評，土瓜灣站承建商「三星—新星」今早派出董事會成員Steven Meredith 到立法會鐵路事宜小組交代事件，是極為不尊重，「因為佢對個工程無咩認識，亦答唔到好多問題。」他指，會展站承建商「禮頓－中建」嚟都無嚟，更為不尊重，游說議員支持其議案，但議案最終以24票贊成、34票反對、1票棄權被否決。數日前曾經會見禮頓高層的經民聯工程界議員盧偉國，投了反對票。
以下是今日投票結果：
投贊成票的議員有24位，包括：涂謹申、梁耀忠、毛孟靜、田北辰、胡志偉、莫乃光、陳志全、梁繼昌、郭榮鏗、張超雄、葉建源、楊岳橋、尹兆堅、朱凱廸、林卓廷、邵家臻、陳沛然、陳淑莊、許智峯、鄭松泰、鄺俊宇、譚文豪、范國威、區諾軒 。
投反對票的議員有34位，包括：張宇人、林健鋒 、黃定光、陳克勤 、陳健波、梁美芬、黃國健、葉劉淑儀 、謝偉俊 、何俊賢 、易志明、姚思榮、馬逢國、陳恒鑌 、梁志祥 、麥美娟 、郭偉强、張華峰 、葛珮帆 、廖長江、潘兆平 、蔣麗芸 、盧偉國、鍾國斌 、何啟明 、周浩鼎、柯創盛、容海恩、陳振英、張國鈞、陸頌雄、劉國勳、鄭泳舜、謝偉銓 。
投棄權票：石禮謙
除了田北辰，會議中共有23位議員發言，當中有16人為非建制派議員、7人為建制派議員。
數日前曾會見禮頓高層的經民聯工程界議員盧偉國表示，雖然土瓜灣站及會展站在工程中有錯誤的地方，但問題已矯正，「所以真係睇唔到有咩要用權力及特權法嘅情況。」他指出，有人懷疑由夏正民法官所成立的獨立委員會，調查範圍是否會涉及土瓜灣站及會展站工程部分，他指委員會的調查方向及職權範圍仍未有，「根本唔需要再作猜測，所以應該等佢哋有空間時間準備佢哋嘅工作」。
身兼行會成員的工聯會黃國健發言時表示，使用權力及特權法的共識，是牽涉到重大的公眾安全，「田北辰提呢個土瓜灣和會展站當然有問題，工程上的問題，但同重大嘅公眾安全有一段好大距離。」他此話一出，場內嘩然，黃國健說：「收聲啦你班友，唔識就唔好喺到亂噏啦。」、「影咗幾張垃圾相就話人哋用垃圾做牆，我覺得砌生豬肉嘅作風係不要得。」、「牽涉到工程上嘅問題，由法律上去解決就得。」。
新民主同盟范國威反駁：「禮頓作為沙中線承建商，而家喺車站裏面嘅支撐工程出事，鋼筋被削、石屎牆有問題，黃國健竟然話呢啲唔係重大安全事故，置香港人乘車安全問題於邊度？」、「立法會絕對有責任為市民發聲，監察政府，要求問責，香港人睇得好清楚你哋建制派點為政府保駕護航。」
民主黨尹兆堅亦不滿黃國健：「正正大家都講，你睇番資料，結構安全點樣唔牽涉公共安全。我識嘅健哥你個人都唔係咁，唔係黑心，你總唔希望見到有建築冧左，有人命傷亡，我相信大家都會唔安樂。」、「正正唔好砌生豬肉，（承建商）嚟傾清楚咪得囉，而家唔係話嚟咗你就有罪，你問清楚，問都唔得咩？有咩咁值得隱暪？」
其他民主派議員方面，人民力量陳志全表示，當日討論紅磡站是否引用特權法調查時，田北辰沒有出席投票，被很多人批評他「對住記者就也文也武，對住表決制度就逃之夭夭。」陳志全續說：「唔緊要，我唔會猜測田生係保皇定係點。」、「但我哋立法會唔應該受制於政府，我希望建制派可以好似田生咁樣，保留番少少良知，認認真真去看待沙中線呢個醜聞問題。」
公民黨郭榮鏗說：「除咗田北辰、盧偉國之外，我睇唔到有其他建制派議員就住呢件事發言，其實而家議事廳都坐咗十幾二十個建制派議員，你哋個個都唔出聲架？你哋係冇睇法、唔敢出聲、抑或覺得唔關你事？」、「我欣賞盧偉國議員，佢反對，起碼都咁講出嚟。」、「建制派你哋喺度做緊乜？」
議案被否決後，田北辰表示，對於提出的議案得不到支持，他認為已盡個人責任。他說：「既然咁多人都反對，又講唔出一個好嘅原因，咁我都仲有一線希望，一定係佢哋收到一啲風聲，我收唔到，就係話特首佢下個禮拜嘅行政會議，可能會通過，擴闊法官嘅調查範圍，包括會展站及土瓜灣站，只不過係好多人知我唔知，我估呢個係我諗嚟諗去，唯一一個解釋到點解咁多同事反對。」
