眾新聞 Logo
眾新聞 CitizenNews
眾聞

劉以鬯未完心願 妻:一部構思多年的電車小說


 請支持《眾新聞》,成為訂戶

 

香港著名文學家劉以鬯於上月8日離世,享年99歲。劉以鬯遺孀羅佩雲,接受眾新聞電話訪問,透露劉以鬯生前唯一一個未完成的心願,是未能寫成他構思多年、一部以香港電車為主題的文學作品。

劉羅佩雲今年83歲,1957年與劉以鬯結成夫婦。兩人居於香港島太古城多年,有影皆雙。昔日劉以鬯出席公開活動,劉太都會陪伴。劉以鬯過去幾年出入要坐輪椅,劉太一如以往,做他背後的女人。

劉以鬯和羅佩雲結婚60載,夫婦恩愛。圖片來源:東瑞博客

劉太說,丈夫劉以鬯生前曾向她提及在腦海中的電車故事:「佢講過話,大概係描寫一個人坐喺電車上面嘅經驗,由筲箕灣坐到西港城,再由西港城坐返去筲箕灣;間唔中坐上層、間唔中就坐係下層,或者坐吓右邊又坐吓左邊咁,電車會經過灣仔、中環、金鐘嗰啲好多人嘅地方。電車沿途景色好似一樣咁,但佢嘅構思就係想帶出,坐係上層同下層、或者左邊同右邊,見到嘅街景,其實係完全唔同。」 

劉以鬯在2010年接受訪問時,曾經提及過這個構思中的電車故事:電車過了銅鑼灣,到達北角時會突然變成1950年代有臭豆腐叫賣聲、有菲律賓樂隊於夜總會演唱的懷舊小上海。劉以鬯是上海人,或許因此對昔日的北角特別有感覺。他希望電車小說能以時空交錯手法呈現香港新舊面貌,他曾說:「我每部小說,都要與眾不同。」

劉以鬯想寫電車故事超過8年,最終未有寫成。劉太說:「佢其實係好想寫,構思已經做好晒,但佢始終未搵到一個辦法(寫作手法)寫出嚟,而係佢自己接受到。」劉太說,劉以鬯在文學創作路上,都會設定一些限制予自己,務求不斷突破。

那會否是劉以鬯的遺憾?「又唔可以話係遺憾嘅,因為佢只係得構思,未開始寫。」

「佢成日都唔想重複以前自己嘅寫作表達方式,不斷想構思一啲新嘅寫作方法出嚟,但就因為佢一直堅持要諗啲新嘅表達方式,所以電車嗰個故仔先冇寫到出嚟。」劉太說。

被問到劉以鬯可有已寫成但未出版的遺作,劉太指,劉以鬯筆下的作品,已全部刊出。

劉以鬯生前和太太一同受訪。他曾說,寫小說一定要有創新精神與嘗試的勇氣,否則一定寫不出好作品。蘋果日報圖片

劉以鬯筆下小說,批判昔日的香港風氣、反映社會現實。晚年的劉以鬯,對香港社會及政治,有何看法?劉太表示:「佢不嬲對政治都隻字不提,就算得我同佢單獨相處,咁多年嚟,佢都未同我講過任何有關政治嘅事。」

劉太指,劉以鬯年輕時飽讀詩書,閒時醉心閱讀不同文學家的作品,汲取大師的文字功力。「佢最欣賞嘅就係海明威。」她說,劉以鬯較常閱讀外國文學家的作品,但都有留意中國文學,「佢以前都成日睇蕭紅寫嘅嘢,佢好歡喜㗎,仲讚過佢寫嘅嘢有深度。」

劉太表示,劉以鬯雖然很欣賞蕭紅的文學作品,但卻不會受蕭紅影響而寫作有關中國農村的故事,「佢講過話,佢想過試吓寫,但唔會俾自己寫,因為佢喺上海長大,一直以嚟都喺城市生活,又未試過農村生活,佢話冇親身經歷嘅,點寫都唔會好睇,所以佢一直都唔俾自己寫呢樣。」

劉太續說,劉以鬯一生人除了文學創作及閱讀外,其餘時間離不開模型、陶瓷及郵票。

「佢好鍾意砌模型,陶瓷同儲郵票,基本上得呢三樣嘢,能夠令佢放低枝筆。」劉以鬯2005年出版的短篇小說集《模型。郵票。陶瓷》,文字夾雜他的收藏心得及感受,認為興趣和戀愛一樣,都能夠讓人茶飯不思。

劉太記得:「佢好瘋狂㗎,就算佢有嘢寫緊,可能係趕住要交嘅,佢都可以一邊砌模型一邊寫稿,你係阻止唔到佢砌模型,佢係一個能夠一心多用嘅天才嚟,而事實上佢都有好多寫作靈感,係嚟自生活上嘅。」劉以鬯其中一本為人熟悉的小說《對倒》,靈感正正就是來自他的「三寶」之一:郵票。

劉太說,劉以鬯生前所有興趣和活動,她都會參與及出席,她也會四處替丈夫尋找心水模型、珍貴郵票,並已成為她的習慣。她笑稱:「老夫老妻,佢歡喜就得啦。」

丈夫赴天國一個多月,劉太心情漸漸平復。她說,劉以鬯安詳離世、對丈夫不用辛苦感到安慰。劉以鬯是在太太及數名親友陪伴下,走畢人生最後的路。

相關文章:書寫平凡人平凡事「為香港歷史加注釋」 著名作家劉以鬯逝世

劉以鬯生前出席公開場合,太太羅佩雲都會陪伴。圖片來源:東瑞博客



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe