林鄭月娥組新班子時，可曾邀請黃遠輝做官？黃遠輝未有直接回答：「咁呢啲唔需要講啦。」即係有？「我何德何能吖？你都知啦，我本身做銀行，銀行背景㗎嘛。」那可以做財爺啊？「冇、冇、冇。」
黃遠輝續說：「我退咗休好耐㗎喇，我7年前、2011年退休，已經係做咗37年銀行，所以做嘢就好夠㗎喇。可能我水皮啦。所以呢……其實就……退咗休之後，任何受薪工作我都冇做過，因為我喺銀行嘅時間好耐，我好希望能夠有啲時間可以做自己嘢。」黃遠輝興趣廣泛，打golf、打羽毛球，也愛耕種、茗茶、畫國畫，「周身刀，但係冇張利。」
實情是黃遠輝退而不休，一身公職，去年還坐上土地供應專責小組主席這個「三煞位」。
相關報道：7月1日早上，黃遠輝收到特首辦通知……
基層團體要求發展粉嶺高球場，但一眾富豪不欲割愛；特首支持填海，環保團體反對，亦抗拒發展郊野公園邊陲；小組提出以公私營合作模式發展私人農地，民間組織質疑是官商勾結……
社會對土地供應問題的爭議不斷，不同人有不同利益考慮，土地小組夾在中間做「磨心」，主席黃遠輝卻輕輕一句：「係預咗。」黃憶述，當初發展局局長黃偉綸找他，為特首傳話：「希望有一個咁嘅小組，可以推動社會廣泛參與、討論土地供應嘅工作。」他認同土地供應問題是時候要解決，便接下這個燙手山芋，「就算係三煞位，大家可能有唔同嘅睇法、好多批評啦，我都覺得係值得去做。」
「我自己認為，包括我喺房委會嘅工作，的的確確去到今時今日，我哋都冇解決（土地供應）呢個問題。我相信我哋而家面對住呢個問題，困擾咗我哋好多年，以至到我哋土地供應滯後緊。所以我期望，去到呢個時間，我認為必需要處理，所以我認同要做呢項工作。第二，係做嘅方法，我認為既然係土地供應，既然觸及社會上每一個唔同階層、唔同持份者，每一個都有份，所以好廣泛嘅公眾諮詢，係大家共同去解決呢個（土地供應）問題其中一個好主要嘅方法。」
黃遠輝認為，公眾諮詢的形式應該是「大討論」而非「大辯論」（林鄭月娥曾說是「土地大辯論」）。他解釋，他所理解的大辯論要有正反雙方，但小組提出的選項，首先是沒有前設，很難在沒有前設下決定作為正方或反方。小組與社會進行大討論，對象是不同持份者，有些人直接受某些選項影響，有些選項可能有直接利益，他們之間的確有一個很大的分歧，所以他希望能透過廣泛的討論，有機會將分歧收窄。
黃遠輝說，相信政府對諮詢並無前設，「如果佢有前設，咁我係同佢做嘢，我唔係同社會一齊去搵地。我真係完全冇咁嘅感覺，（政府）又真係冇講過有前設。」
黃遠輝提到，過往的專責小組工作範疇很窄，處理單一事件、工程、立法等，與土地供應專責小組的工作範疇不同，土地供應問題廣泛，除了房屋，還包括經濟、交通基建設施等，所以土地小組會接觸專業團體、環保機構、地區組織、房屋關注團體，以至18區當區市民。而過往很多專責小組、委員會，往往本身有建議，然後就建議向公眾諮詢，「我哋呢個唔同，我哋係將啲土地供應選項鋪陳出嚟，請公眾進行非常廣泛、全面，甚至希望理性嘅一個溝通、一個討論，之後先至去到一個共識，再喺個共識底下寫建議報告。我諗唯一分別係咁樣。講咗之後，似乎政府都好認同咁樣係佢哋嘅想法，咁（我）就加入咗。」
黃遠輝續指，假設各選項有10%市民極端反對、10%極端贊成，中間便有80%「沉默大多數」，「個公眾諮詢，點樣能夠真正聆聽到中間80%『沉默大多數』嘅聲音，係我哋剛才所講『非常廣泛』嘅意思。」
公眾諮詢由4月底開展至今有兩個多月，黃遠輝說：「聽到好多貼地嘅、居民嘅意見。」土地小組的諮詢活動前後，凡有團體請願，黃遠輝會親自接信、收示威道具。土地小組在18區辦巡迴展覽，黃遠輝多次親自落區視察，市民認出他，拉住他講意見，他會企埋一邊聽市民慢慢講。黃遠輝指，有年輕專業人士告訴他上樓的困難、有熱心市民每日給他發電郵、有街坊送蘋果給展覽工作人員、有一名為老伴推輪椅的老先生都來填問卷……
「我哋個社會加加埋埋其實好持平，所謂『沉默大多數』好公道嘅，唔係話一定要咁、一定要咁，佢哋只不過係求安穩啲嘅生活，可以安居樂業。如果佢哋真係支持呢個意見、支持呢個選項，我哋真係要公公道道咁樣寫（報告），如實反映社會上大多數嘅意見。我覺得有責任咁做。」
黃遠輝不似一般高高在上的銀行家，跟其基層出身不無關係。他年幼時家住木屋，在家要幫手「穿膠花」。他投身社會時，僅中學畢業，最初在一間小規模的船務公司當文員，獲當時的丹麥老闆賞識，主動推薦他到銀行工作，才展開37年的銀行生涯。他1974年加入渣打銀行，由文員逐級晉升至助理主任、交易員、香港區司庫、東北亞地區司庫、中國區行政總裁。他邊工作邊進修，完成了澳洲麥加里大學應用金融學碩士學位。黃遠輝2003年離開渣打後，重返校園讀歷史、考古，2004年應邀出任工銀亞洲董事兼副總經理，至2011年8月退休。
土地供應專責小組成員的任期至明年2月底。去年9月就任至今這10個月的工作，有否嚇怕黃遠輝？他日後還會做其他公職嗎？他提醒記者：「我仲有其他公職做緊，仲有幾個。呢個係臨時嘅一個。」可有後悔加入小組？「當然冇啦。正如我所講，我覺得好值得去做，呢個我自己相信嘅。」
