眾新聞 Logo
眾新聞 CitizenNews
眾說

休將白髮唱黃雞


雞年賀喜,上網急尋雞年喜賀辭,找足半天,雞毛都搵唔到一條。

用國語來唸倒還好便宜了事,事關雞與機同音,又與吉諧音,於是有:

大雞大利
雞不可失
雞祥如意

等等諧音句。

不過作為地道香港人,怎麼看雞字都很雞,歷來雞嘢就唔算係好嘢。你話金雞報喜,我金雞馬上想起吳君如和她戲中的職業,叫到金雞仲要報喜有咗,真係大吉利是。

找找古代成語:雞飛狗跳、雞鳴狗盗、雞犬升天、殺雞取卵、呆若木雞、雞食放光蟲、黃鼠狼同雞拜年…都唔係D咩好句。咁你話古人云雞即鳳凰,是天上神鳥,咁古人又云,鳳即凡鳥,我老友荔枝角狗叔話齋:凡鳥做得鳳凰,就唔使叫做雞啦。

新正頭賀新年,過年過節思想更要樂觀正面,與其睇電視睇一堆政客show,例如特首夫婦賀年拍條片沒有子女卻圍住一班九唔搭八的西裝男女,數字2.0派五舊水俾大陸駐港乞兒…之類,不如努力上網,搵多d與雞有關嘅正面思維。

所謂皇天不負有心人,又或是世事無絕對,查來查去終於有所悟:原來雞不是講在口邊的,而是砥礪在身邊的,例如:

・聞雞起舞:提醒你做人最緊要努力,而且凡事唔好靠天才波,多做練習有前途!
・唔好騰雞:在這大事代,驚都無用,要冷靜思維。
・識得執雞:隨機應變,在混亂中埋門攞分。
・雞糊都係糊:唔好大貪,最緊要贏,食住個勢。
・大雞唔食細米:對自己要有所期許,人生要有長遠的大目標。

最後,為了捍衛繁體字,更應避免用諧音,故意寫d錯字嚟教壞細路,以為咁叫做KUSO實情非常幼稚。於是撐久硬千挑萬選,揀左個「鶴立雞群」利是封派俾D後輩!年輕人,要有志向!

祝大家
雞年大好運!
(第9集)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe