港鐵沙中線工程醜聞、高鐵一地兩檢爭議不斷、房屋問題多籮籮，矛頭指向政府問責團隊中的運輸及房屋局局長陳帆。他的上任、運輸及房屋局前局長張炳良，今日舉行書展講座宣傳其最新著作，前立法會議員劉慧卿、何秀蘭也有出席，兩人在台下質問張炳良從政理念，以及他在任局長時處理一地兩檢。
被問及近日沙中線工程問題是否知情，張炳良稱：「當時我收到嘅，可能係指工程時間好緊張，但近期所發現嘅問題，喺我仼內係無收到。」
卸任後的張炳良，現為香港教育大學研究講座教授、香港科技大學公共政策研究院客座教授。他花了10個月，寫下2012至2017 年間，他出任運輸及房屋局局長的經歷，著作名為《不能迴避的現實》，一本談房屋，一本談運輸。張炳良承認，現時政府的問責制度很滯後。他舉例，有時審計署指出了政府部門做得不足的地方，「有啲嘢做得唔好，係好多年前發生，而家你問現時政府部門嘅官員，佢都唔係當年決定嘅人，佢要搵番當年嘅文獻，議員梗係駡啦。」張炳良表示，如何體現一個好的問責制度，需要政府花心思，「問責呢兩個字，我發覺香港用咗之後，從中文語法上係被扭曲。問責係，對一個應該負責任嘅人，你問佢責。而唔係嗰個官員，去問責外面。」
前立法會議員劉慧卿、何秀蘭有出席張炳良的講座。劉慧卿在問答環節發言時表示，張炳良擔任過不少要職，「又做過政黨、又做過議員、又做過行會、又做過問責官員。」她問張炳良：「點解你做嗰5年，你唔運用你嘅智慧同政黨多啲合作去溝通，就一啲好複雜嘅交通或者房屋問題尋求共識呢？」、「我做咗25年議員，我了解我啲同事，其實唔係有咁尖銳嘅矛盾，有啲位係大家可以傾得到」、「但你做局長咁耐，雖然你以前係民主黨，但我見過你都係得兩次左右。」
劉慧卿指出，張炳良曾經說過「官員同議員係要競爭」，指「當時個個人搲晒頭」：「我哋唔係要競爭呀，我哋係想搵共識，你咁多個位都坐過晒，你今日再答多我哋一次，你同唔同意作為官員，係應該幫政黨尋求共識，然後令到方案可以得到議會通過，唔係成日充住自己有咩競爭，我幾叻，但拎啲嘢出嚟又唔叻，咁而家咪鬥到咁囉！」、「你而家反思咗咁多年，咁多個月，有無唔同嘅諗法？」劉慧卿發言期間，台下傳來陣陣笑聲。
張炳良回應：「如果你坐得我個位，可能你都會咁。」他指，從官員的角度，會推出合格的方案；從政府的角度，當然希望方案能通過、能立法、能撥款；從議員的角度：「無理由政府提出嚟嘅嘢照單全收，要add value，我要有我睇法，要顯示我同政府有所不同。」他指出，是這種體制造成行政和立法關係「有競爭」，「但競爭唔等於惡性」。張炳良表示，擔任局長時，任內最大的挑戰是周三到立法會面對議員質詢，「當然官員嘅答案係穩穩陣陣」，指議員的提問有促進政府思考。
何秀蘭發言時說：「我都知做官好難做，尤其入面有咁多北京因素。問責首要條件其實係要資料公開，大家一齊傾，但你在位時係做唔到。」、「你有份嗰樣一地兩檢，可能呢個你認為係保密理由，政治倫理唔講得，所以你在任時我哋追問好多次，你都答唔到，但係到你嘅接手，陳帆局長，佢就不管你以前，無論3、5 年都答唔到嘅問題，就要立法會3個月通過一地兩檢。」何秀蘭批評，「呢啲咪就係行政立法關係矛盾嘅起因。」
何秀蘭續指：「好多中港官員開會嘅時候，其實無會議紀錄、無檔案紀錄，咁你點樣問責呢？但係呢啲情況就係令到政府同議會、同社會嘅不信任，愈黎愈增加，咁你對現任官員、林鄭政府有咩忠告？」、「北京或者內地協作嘅因素、係咪一個資料保密嘅必須，抑或係其實都可以攤開嚟大家講？」、「嚟緊就有大灣區，有幾多資料係我哋唔知道，有幾多係內地部門嘅意見唔講得俾我哋聽？」
張炳良回應：「政府部門對資料披露足唔足夠，社會上可以評價......起碼我自問，如果喺我任內，所有嘅（運房屋）立法會文件都經我過。我哋好細心確保盡量能夠多啲資料。」、「一地兩檢當然比較複雜，牽涉政府與政府之間商討，比較敏感，所以有啲我唔可以公開討論。」
張炳良又說：「感覺唔到內地施加一啲香港唔想接受嘅嘢，反過嚟我哋好想高鐵可以發揮到佢最大嘅經濟效益、運輸效益，所以我哋盡量爭取到一個可行嘅一地兩檢做法。」、「喺我任內，從來無內地官員，包括中聯辦官員同我講，我希望你咁咁咁樣做，係無嘅。當然我唔可以講我自己以外嘅嘢。我亦都唔會動不動就搵內地官員。因為我覺得，好多問題，香港係高度自治，我哋自己處理自己嘅問題。」張炳良指，同意政府應要增加資訊透明度。
