眾新聞 Logo
眾新聞 CitizenNews
眾說

古天樂與阿舜:香港流行樂壇衰亡史


 

話說近期ViuTV竟然學人搞真人SHOW偶像賽,老實講,真的有點不自量力,D參賽者個個都老油條額頭鑿住個「媒」字不說啦,只說ViuTV以玩戲劇的心態設計晒情節衝突宮心計等等,已經叫人失笑,都不說這個節目竟然膽敢叫《全民造星》了,到最後你要鼓動到幾個人投票才好意思聲稱自己代表全民呢?

真人SHOW好蝦人做,其實我一向懷疑中國人有沒有資格學人做,講明真人SHOW梗係要真先啦,但係乜嘢叫真真好深的哲學問題,好似姚明跟Bear Grylls去玩人在野,Bear喺個不知什麼的屍體捉咗D蛆蟲,叫姚明試吓,姚拒絶,Bear大概以為這只是門面,於是好不識趣地三番四次催請,沒想到姚明其實係真係熬底唔敢試的!

這個畫面令我想起阿嬌有個MV,大概是同個男伴郊遊,個男伴好貼心為她準備三文治,搞了一大輪,捧到阿嬌嘴邊,正當你以為為了配開那個開朗快樂的MV氣氛,女主角會爽快地接過張口咬一啖,沒想到尊貴的女主角為了保持淑女形象,連金口開一開都懶,只含笑搖頭,以眼神說道:你同我食埋佢啦傻猪!

近日古天樂首〈今期流行〉俾人翻炒,有兩點很值得說說,其一,是這個MV竟然是請外援充撐,幾個大頭美女都是日本女子,真係令人感嘆,香港難道真的凋零成這樣?其二,是古天樂答應出鏡,卻竟然死都不跳埋一份。喂,阿哥,你既然不跳就不要出鏡啦,出得鏡就點都要與民同樂一番吧?你睇吓人家日本荻野木洋子,因為一群高校生重跳她的經典,她一樣很樂意同班後輩一起拍MV一起上街表演,依D就叫敬業樂業,依D就叫PROFESSIONALISM。

不過話說回來,香港連幾個睇得又跳得的女dancer都找不到、古天樂死都不肯再跳拜神舞未必最可嘆,可嘆的是,原來曾有一個年代,連木訥如古天樂者,都會隨着時代的脈動而唱跳的呀!

〈今期流行〉是2000年,而在2001年, 我們還有一個經典誕生,那就是阿舜的都市閒情版《娃娃愛天下》, 阿舜的表演因為「唱功獨特、台風出眾、表情豐富、體技驚人、 造型MK」而載入了史冊,請大家留意一下,那並不是一個電視台狂妄機心地想炮製巨星的一個設計,沒有什麼導師指點、評判教訓,而純然是提供了一個小小的舞台,一個俾人發揮才華兼發夢的空間,就是在這裡,阿舜才能把自己的平生絶技痛快淋漓地予以展現,如此才使一個名留青史的經典表演成為可能。

唉,我們懷念古天樂,懷念阿舜,懷念一個逝去的年代。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe