眾新聞 Logo
眾新聞 CitizenNews
眾說

非洲桑吉巴爾保育之旅後記


 

眨眼間32日嘅旅程已經正式完結(當然之後仲有功課要交同要返學校present),想趁住返到香港冇幾耐,仲有記憶,好好整理一下旅程嘅經歷同感受。
 
旅程資料

日期:2018年7月1日到2018年8月1日
地點:桑吉巴爾(位於非洲坦桑尼亞東部一個半自治區)

喺飛機影落去桑吉巴爾。

旅程內容

今日嘅身份可以話係一個義工,工作內容大概分為呢幾種:
 
● Dolphin behavioral / Dolphin Tourism Monitoring:我哋基本上每個星期出3-4日海,時間係6:30/8:30/14:00。主要目的係收集數據,包括海豚嘅種類、出現嘅海域、數目同行為;以及旅客數目同行為、船隻數目同行為等等

出海收集海豚數據。

● Data Entry:收集嘅數據會入落電腦,有時候仲會整一啲圖表嚟做分析
● Conservation club & Graduate club:我哋每個星期都會去當地學校教一課書,內容主要係圍繞保育同環保議題。當然我哋要事先傾點樣教同整教案,之後亦會改學生嘅功課

到當地學校教保育課題。

● Kiswahili lesson:Kiswahili係當地語言,我哋係當地逗留一個月,所以要學翻一兩句旁身。呢個同時係了解當地文化嘅好方法
● Community project:我哋會去當地嘅社區幫手做服務,例如到學校幫手油油、整理圖書館、清潔等

到魚市場做調查。

● Fish market research:我哋仲會去魚市場做調查同收集數據,例如睇吓魚夫捉到啲咩魚、魚嘅重量同長度、喺咩海域捉到
 
旅程體會

我入大學之前已經為自己定立咗目標,要係大學5年去多啲唔同嘅地方體驗多啲唔同嘅野。我自己本身擅長游水加上熱愛大自然,所以就被呢個活動吸引,加上有2個同學都有興趣一齊去,最後就決定參加。

出發前其實我哋都遇上好多唔同嘅困難。當然最大嘅問題就係錢,我哋只係一個普通大學生,要比5位數字嘅旅費其實好吃力,我哋只好不停返part time,買機票既時候就去唔同嘅旅行社同上網格價,又要用好多錢去打針同買裝備,不過最後我覺得係好值得嘅,有好多經歷同體會係用錢衝量唔到嘅。

旅程中最難得嘅係可以同唔同國家既同學交流同相處,佢哋有來自美國、英國、德國、西班牙、澳洲、斯洛文尼亞、加拿大等。我哋會分享吓各自國家嘅文化、又會教吓大家玩自己國家嘅遊戲(我發現就算係玩UNO,唔同國家都有唔同嘅玩法),之後又會教大家講自己嘅語言。當然,最重要係我嘅英文從中都學到唔少。

當然要講下保育工作,坦白講,一個月時間做到嘅嘢都真係唔多,但至少令我大開眼界,當地好多海洋未被破壞,海真係藍色,真係可以望到底,呢啲咁嘅畫面真係要嚟到呢度先可以睇到。另外,好重要嘅一環就係提高當地人嘅環保意識,要保持咁靚嘅海洋,提高當地環保意識好重要,加上我自己本身係讀教育,所以覺得去學校教書意義好大。

個海靚到見底,海水真係藍色嘅。

最後當然不得不提我嘅旅伴,今次可以同到自己同科同年級嘅同學一齊去今次嘅旅程係非常難得,我哋由當初一齊研究去邊度打針、去領事館問嘢、一齊去買裝備,到旅程一齊經歷唔同既嘢、一齊闖禍、一齊解決問題,呢啲經歷都將會成為一個美好嘅回憶,多謝你哋。

總結

呢個旅程最多人問我嘅係比咁多錢去做義工會唔會有啲蝕底。我自己覺得唔會,我覺得好多嘢都唔可以用錢衝量。當然呢啲錢如果用哂嚟去食自助餐會好開心,但係旅程中嘅經歷同成長係非常難得嘅。呢啲機會唔係成日有,我亦都相信自己老咗之後唔會有精力同體力去做呢啲義工工作,所以我真係好想可以趁自己仲讀緊書,有體力同時間,去多啲唔同嘅地方體驗同經歷。我好想鼓勵大家,尤其係讀緊書嘅朋友,趁有時間同體力,多啲行出去,擴闊自己嘅眼界同視野,唔好到自己老咗先後悔。

重溫

我哋一齊剪輯嘅 8條Youtube影片 
過去32天嘅5輯圖文日記


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe