過年前，看到有些文章講美國一個新網媒Axios，Axios是以短小精幹報導其內容，Axios常用一個smart字來形容其內容，也用上smart brevity。brevity中文是簡潔，加上一個smart字又是甚麼一回事，對新媒體有興趣的朋友，應到Axios一看。
過年前跟《蘋果》舊同事在灣仔大榮華午飯小聚。報人係好認真嘅，老編彭基哥起題──群英聚義大榮華，由耀哥寫字。基哥狀態很勇，黑色貼身T恤，好heavy metal look，還去gym work out，下次再見面睇吓隻老鼠仔走咗出嚟未。耀哥更厲害，每日四圍走，停底就打大聖劈掛，或寫大字，文又得、武又得，得咗！
見番咁多舊同事，一幕幕的《蘋果》那些年又湧現出來。記得有一次三點鐘鋤報會，堅哥媽媽聲閙編輯，因為一條題「半百老翁」。堅哥罵：你老味！五十歲就係老翁？咁坐係度咪全部都係老嘢？」當時望望堅哥，睇睇董社，笑係要忍嘅，眨吓眼自己也當了老翁，呢次笑呢啲。
我2001年離開Next Media，依家Next Media名都改埋，叫Next Digital，我都係覺得Next Media啱聽啲，Media包括Digital，Digital就不一定有Media，點都好啦！沙蟹就沙蟹啦！見番咁多舊同事都係開心嘅。無論是自己離開或者被離開的，都要多謝Jimmy(黎智英)俾我哋一個機會大家認識過及努力過。望番轉頭人生有好多站頭，有啲站頭你會開心，有啲站頭你會唔高興，但過咗一段時間，你將唔同嘅站頭的人和事串起嚟，你會有多些體會，多些感恩，人生也豐富起來。
係香港這幾年有關傳媒新聞係離不開裁員、關閉等等，也有不少網媒出現，如財雄勢大的《香港01》，有創意的《100毛》，也有《D100》及2017的《眾新聞》等等，但當大多數的媒體都跑到手機上，那麼優勢係乜呢？唔like又點睇到你呢？曾經有位前輩向一位想投資傳媒的老闆講：「冇錢學乜人做傳媒」，係對係錯，時間會有答案。但我認為香港網媒的做法比很多市場係落後嘅。
Amazon的Jeff Bezos收購Washington Post（《華盛頓郵報》）三年之後，終於改革成功。Bezos注入的就是錢和科技，將Washington Post變成一家傳媒及科技公司。將readership變成data主導，加強marketing及conent distribution等等，但有一點是最重要的，Bezos先生沒有影響Washington Post的編採運作。經驗豐富的編輯們記者們，不斷將內容做得更適合在互聯網及手機上發放。Washington Post開始請人了，開始有錢賺了。各位行家，雞年加油！
