眾新聞 Logo
眾新聞 CitizenNews
眾說

免費民主派?不如一槍打死我



【撰文:胡人傑】

主圖:明報[2],青年曼德拉頭像:people.com(照片由筆者提供)

1990年,坐咗27年監嘅曼德拉剛被釋放,當時南非革命尚未成功,不過有國家已經急不及待開始解除對南非嘅制裁(英國囉,仲有邊個...),曼德拉喺一場大型音樂集會上演講,呼籲國際切勿放鬆,繼續制裁南非[1]。如果當時有香港嘅評論員在場,佢哋嘅反應會唔會係咁?

曼德拉仍然想借助西方外力迫南非白人政府讓步,不是一着好棋。客觀結果便是建制派對曼德拉的打壓突然「出師有名」。【改自「陳浩天不是人 是變數(文:曾志豪)[2]

當然,曾志豪嘅文章並唔係針對制裁啱唔啱,只係講制裁香港現時冇國際支持,鳩叫只會引嚟打壓。制裁南非當時有國際支持,制裁香港現時冇。不過,萬事起頭難,其實當日制裁南非條路係點行出嚟?

香港民族黨召集人陳浩天8月24日到美國駐香港總領事館請願,要求美國取消美國─香港政策法。照片來源:香港民族黨

事緣於1964年,有反對南非種族隔離政策嘅英國團體(係,都係英國,民間同政府立場可以唔同嘅),發動咗一場國際運動Disinvestment from South Africa[3],當時反應冷淡,即係鳩叫。不過,堅持到70年代後期就開始有迴響,個別機構逐步對南非實施制裁。80年代中,南非黑人抗爭升級,南非政府宣佈進入緊急狀態,全球關注,制裁運動進入高峰。
 
2004年,香港人大釋法,將普選三部曲變成五部曲,美國有共和黨議員認為要修改香港政策法,懲罰北京未給予香港高度自治,當時沒有成事[1],又係鳩叫。依家係2010年代後期,發展會係重複香港嘅2004定係南非嘅70年代尾?
 
萬事起頭難,總係由鳩叫開始,唔叫就唔會開始,而陳浩天並唔係發起者,只係追隨者。
 
另一個考慮,就係制裁即係打爛自己飯碗,咁係咪好柒?香港未來未知,不過對於當日嘅南非,有評論就咁講:Skeptics were wrong; South Africa divestment worked - decisions were difficult, but their effect on apartheid was significant.[4]
 
制裁係核彈,唔係隨便動用,當日南非嘅抗爭亦係走過一條好漫長嘅道路,反種族隔離政策者亦唔係一開波就嗌制裁,而係最後迫於無奈先至動用核武,咁佢哋又喺邊個階段進入核戰狀態?
Apartheid opponents needed to do something more than protest. The candlelight vigils were not working.[4]
 
蠟燭都燒光啦,人都捉晒去坐監,仲等運到?Freedom is not free,爭取民主唔平㗎,要付出好多,唔淨止係時間,如果唔諗住勇武嘅話,就係有強力經濟衝擊嘅制裁,否則一個獨裁政權點會咁易放權?
 
香港嘅民主路其實並不絕望,今日嘅無力感,係咪只係我哋唔願意付出太多?如是,其實唔駛搞咁多嘢啦,不如一齊加入保皇,因為大家都是一樣,只想免費。

註釋:
[1] Mandela Urges Support for Sanctions- NY Times, 1990
Nelson Mandela: An International Tribute for a Free South Africa- Wikipedia)
 
[2] 陳浩天不是人 是變數(文:曾志豪)- 明報
註:曾志豪不能以美領事一啲面面俱圓嘅回應就判斷美國冇興趣取消香港政策法。美國國會有條排緊隊嘅HK Human Rights and Democracy Act,當中有條文要求重新啟動定期報告,檢視香港係咪仍然合格接受政策法。人哋跟足手續啫,咪咁老定。
 
法案通過嘅機會,其實係同美中貿易戰掛鈎,現時支持缺缺(Overview - Prognosis: 2% chance of being enacted ),不過時局稍變就可以翻盤,譬如2018年3月,貿易戰剛剛開打,當時大家都唔知特朗普想玩幾大,預測就曾跳升至20%
 
或者,法案嘅發起人、參議員Marco Rubio 已經有啲不耐煩,2017年8月,喺雙學三子等候判刑期間發出警告,美方會檢視「香港在美國法例所附予的特殊關係」(咪係黃之鋒當日交俾法庭,彈出彈入嗰份最後信件囉),當時法官收到份信件都震咗一震,法庭總共recess 咗3 次,然後大家都奇怪點解判刑較想像中輕。
 
曾志豪有一樣嘢係啱嘅,就係「西方政客各有盤算,誰會為香港動真槍?」只不過,西方政客會為中国動真槍。
 
[3] Disinvestment from South Africa- Wikipedia
 
[4] Skeptics were wrong; South Africa divestment worked- Chicago Tribune


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe