眾新聞 Logo
眾新聞 CitizenNews
眾說

唔做正能樣


網上照片

【撰文:勵志文】

新學年眨下眼就過咗一個月(筆者仲係法律學生),又到法律系準畢業生搵工嘅季節。筆者有個朋友(邊個唔重要,總之唔係我)好恨入國際律師事務所,但係就頭頭碰着黑。

「哼!啲人一係就有親戚喺入面做,一係就父母係啲大行嘅客,瞓喺度都碌到入去啦。」

怨下冇問題,之但係成日咁樣唔得㗎喎。邊有人鐘意同啲咁多怨懟嘅人做嘢㗎?

「唓。唔通啲人執紙皮、住籠屋,你叫佢睇開啲、正面啲就得?打完風啲農夫損失慘重,唔通佢地對住塊田笑多幾下啲菜就識生番出嚟咩?」

佢唔係完全冇道理嘅。有種人成日覺得只要夠努力,世上根本無難事;只要夠正能量,上帝就一定會眷顧;如果個人唔成功,一定係佢態度太差,抵佢死。咁諗嘅人簡直係「正能樣」——個樣充滿正能量咁話。正如陳奕迅所唱,「不開心就不開心,也別勉強的慰問」。價值觀、做人態度只能由際遇塑造或者比朋友潛移默化,冇得逼。

有時我個朋友(再強調:我朋友不是我)會突然鬥志高昂:「再咁落去唔得啦,已經去到毫無退路,要以死相搏!」隔離啲人唔知以為佢加入咗軍隊要去中東打仗。有鬥志唔係壞事,不過佢似乎講多過做,最後只係感動到自己,見冇乜成果就好快頹番。

講開正能量,某智庫近日拍片支持東大嶼山填海,當中緬懷殖民政府管治下「八九十年代嘅香港好有衝勁,地方細細、志氣遠大,好似乜嘢都有可能發生」,嘗試用啲美好回憶嚟宣傳填海。

不過,管治香港嘅由英國人變咗做中國人;依加亦係普選無期嘅2018年,唔再係憧憬立法局直選嘅1988年。咁樣嘅香港,唔通我哋擺返一副「正能樣」就會時光倒流、變返歌舞昇平?

的確,外在環境、政治氣候呢啲嘢未必係我哋控制到,但唔代表我哋可以乜都唔做(強調番,有作為唔等於藥石亂投,填海有冇用坊間大把評論,筆者就唔班門弄斧啦)。簡單講,就算上天保佑香港突然有條件全面民主化,我哋有冇信心可以選賢任能?

如果唔得,可以點增進香港嘅民主質素?好似法國咁要求中學生必修哲學,訓練獨立思考?重新設立市政局,監察番地區行政嘅質素?我唔知點做係最好,但係好似雨傘運動期間嘅「罷課不罷學」咁傾多啲、試多啲、做多啲已經係做實事。坐言起行,有物業嘅人積極參與多啲業主立案法團,令自己同其他業主冇咁易比人圍標呃錢,已經好叻仔。

又例如,依加成日話法治受侵蝕,我哋自己其實知唔知乜嘢先係法治?有研究過嘅又有冇同保守啲親戚朋友討論過點先係法治?呢啲議題唔係出現危機先要關注,而係日常就要睇多啲書、同人討論多啲。接觸自己圈子以外嘅人唔一定要全職做政黨社區主任或者議員辦事處,參加啲義工隊幫公公婆婆維修傢私已經做到。

網上照片

話說我個朋友早排終於收到個面試機會,但係可能佢嘅失敗者心態已經入晒血,好似話冇乜點準備就去面試,最後當然就冇得做暑期實習 (vacation scheme),更加唔洗講兩年嘅實習合約 (training contract)。記住,失敗唔一定係時不予我或者「佢個人太負面」乜乜乜,而係因為毫無準備。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe