眾新聞 Logo
眾新聞 CitizenNews
眾說

如果呢件事發生喺香港,下場會係點呢?


 

今年9月,挪威媒體VG出咗條片,話挪威第二大城市Bergen脫離挪威獨立!

OMG!咁大鑊?骷髏小姐嘅Bergen朋友,同埋唔少Bergen人,的確覺得Bergen人係有啲唔同——比起其他地方嘅挪威人,Bergen人掂啲叻啲醒啲,但脫離挪威獨立?唔通係假新聞?睇吓條片講咩先......

挪威媒體VG條片「Bergen脫離挪威!」嘅大致内容(劇透慎入)

條片開始時一片歡樂,事因Bergen 球會Brann贏咗挪威聯賽冠軍,Bergen人狂歡慶祝。

照片來源:網絡照片

然後,VG主播話, Facebook group 「Bergen脫離挪威」(Bergen ut av Norge!)喺社交媒體強力動員咗千千萬萬Bergen人 。

「Bergen脫離挪威!」運動嘅紅衣女領導話佢哋嘅訴求係:「Bergen脫離挪威!因為我哋唔係嚟自挪威,我哋嚟自Bergen」,運動如火如荼,Bergen人上街,高呼「Bergen脫離挪威!」,然後,Bergen舉行公投,決定係咪脫離挪威。

公投前,VG訪問咗唔同人士,包括挪威學者,同埋世界女子職業拳賽嘅挪威冠軍等;VG亦有好多評論,例如將來係咪有兩隊(挪威同Bergen)參加歐洲歌唱大賽。大風暴前夕,挪威何去何從,舉國上下,都憂心恐懼。

公投結果終於揭盅: Bergen人決定脫離挪威。 Bergen領導仲下逐客令,唔係Bergen人嘅話,要48小時內離開Bergen。但點測試邊個係Bergen人?用Bergen話囉,讀得啱就過關,而操生殺權嘅竟然係一個好得戚好有威權嘅小朋友!咁都得?直覺話俾骷髏小姐聽,VG條片好唔對路。WOW,之後仲一對情人被逼分離,因為男仔唔係Bergen人,分離時女仔仲話'I love you!',亂世中嘅愛情故事,咁煽情,十足劇情片?

挪威政府點反應?大鑊! 派軍隊企圖進入Bergen,希望重奪Bergen。

正當大家好鬼擔心發生內戰,頭戴頭盔嘅VG女記者喺Bergen現場,一副戰地報導咁款。

照片來源:網絡照片

點知報導果陣,突傳出連串爆炸聲, 畫面冇咗幾秒,原來Bergen人竟然將Bergen炸離挪威!咁激?????

然後,VG條片打出一句話:「如果發生呢啲事,我哋會係第一個報導」。

哎吔,原來VG條片唔係假新聞,原來係一個瘋狂爆笑諷刺嘅古仔,原來係VG充滿創意嘅宣傳綽頭片!挪威人睇到好鬼過癮,叫好叫座,仲有唔少網民話應該攞條橋去拍戲。
 
如果交代唔清楚,請多多包涵,不過,相信聰明嘅你哋會估到劇情。好,去片!

挪威媒體VG用獨立攪gag,咁挪威政府有冇告VG鼓吹分裂國家?有冇告VG鼓吹暴力?

冇!挪威政府仲完全冇反應冇評論。呢啲搞笑之作,本來就應一笑置之,無須評論。

只有制度上文化上冇自信嘅政權,先會話連討論港獨都唔得,仲特登將討論港獨變成洪水猛獸,連FCC(外國記者會)副主席Victor Mallet都冇得留低,連講自決嘅劉小麗都被兩次DQ;龍門任佢哋搬,紅線越收越緊,其實目的只係製造白色恐怖,只係藉此打擊一大片,打壓反對聲音。
 
如果呢件事發生喺香港,呢啲媒體,會唔會被特區政府告鼓吹分裂國家?下場會係點呢?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe