眾新聞 Logo
眾新聞 CitizenNews
眾說

政府起大愚人工島違反效益


 

【撰文:劉康】
作者為葵涌循道中學學生,試過同林鄭月娥合照時高舉香港獨立標語

「……如果所做嘅嘢傾向促進幸福就係啱,如果傾向產生不幸就係錯。幸福就係人想要嘅快樂同埋免除痛苦,而不幸就係痛苦同欠缺快樂。」[1]約翰・米爾(John Stuart Mill)喺《效益主義》(Utilitarianism)呢本書講咗,效益主義嘅最基本觀點,亦即係傾向於快樂,就係符合效益(Utility),傾向於痛苦就唔符合效益。最近,政府諗住喺大嶼山海域起個大愚人工島,而咁係傾向於令香港人受苦,顯然大錯特錯。

照片來源:守護大嶼聯盟、土地正義聯盟
21日中午12:00-15:00「潮退行動」@南丫島

政府錯在,用錢嘅方式有愧於民。約翰・米爾講過:「喺人類嘅罪惡同過錯當中,令人失望佔咗重要嘅地位……」[2]政府今次諗住用成幾萬億(包括大愚附屬工程)起個大愚人工島,香港人眞係會滿意咩?香港人係想政府用啲錢嚟,搞好醫療系統。香港人係想政府用啲錢嚟,搞海水化淡廠。香港人係想政府用啲錢嚟,搞好退休保障金。香港人係想政府用啲錢嚟,買晒啲棕地。香港人想政府用啲錢嚟做嘅嘢,政府有做到咩?呢個政府實在愧對香港人,違反效益。

政府錯在,抽乾庫房。約翰・米爾講過:「金錢本身……如今已經變成咗個人對於幸福嘅理念其中一個非常重要嘅元素。」[3]起個大愚人工島(同埋附屬工程)要耗用成幾萬億,如果唔係抽乾庫房,仲會係啲咩呢?等到抽乾唒庫房,香港人嘅日子就必然會過得更加貧困,過得更加痛苦,過得更加民不聊生。呢個政府所做嘅事係違反效益。

政府錯在,罔顧香港人安全與否。約翰・米爾講過: 「……人人都覺得,係喺所有利益之中,最緊要嘅:嗰樣嘢就係安全……安全係不可或缺嘅呢個特質,亦都成為咗道德上必要嘅嘢……」[4]起個大愚人工島喺個咁嘅位,一嚟有機會沉,二嚟有機會受海浪侵襲。到時,身處嗰度嘅人唔通唔危險?政府係咪眞係有諗過確保身處喺嗰度嘅人係可以安然無恙呢?呢個政府唔係罔顧香港人生命,仲係啲乜?好明顯,政府係違反效益。

呢個政府其實唔單止喺呢件事度,違反效益,佢哋喺處理其他公共事務度都係咁。

註:

1. (英)約翰・米爾(John Stuart Mill)著,邱振訓譯:《效益主義》(臺灣:暖暖書屋,2017年),頁54。

2. (英)約翰・米爾(John Stuart Mill)著,邱振訓譯:《效益主義》(臺灣:暖暖書屋,2017年),頁162。

3. (英)約翰・米爾(John Stuart Mill)著,邱振訓譯:《效益主義》(臺灣:暖暖書屋,2017年),頁113。

4. (英)約翰・米爾(John Stuart Mill)著,邱振訓譯:《效益主義》(臺灣:暖暖書屋,2017年),頁149-150。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe