眾新聞 Logo
眾新聞 CitizenNews
眾說

回一回馮檢基


聽完馮檢基上網台接受訪問,忍唔住要回一回佢。

第一,個議席本應屬於劉小麗嘅,佢係俾個無恥政府橫蠻咁剝奪咗個議員資格再攞走埋個參選資格,咁依家劉小麗意屬李卓人代佢出戰立會補選,搶番個議席,大家有乜理由唔去支持李卓人而去支持你?

第二,你起勢咁批評民主陣營,猛咁話民主派欽點李卓人,係唔俾你參選,令到你無咗政治參選權。嘩,虧你咁都講得出。你咁講,反映你連啲好基本嘅政治概念都撈到亂曬籠。政府搵個DQ主任出嚟取消劉小麗嘅參選資格,呢啲先至係真正嘅違反國際人權公約剝奪市民參選權;民主動力同埋民主陣營各大政黨只係民間組織,佢哋邊有公權力唔俾市民參選呀?佢哋依家揀咗由李卓人出戰立法會補選,只係表示民主陣營有共識全力支持單一候選人去同親共派嘅候選人陳山竹決一死戰。你攞唔到劉小麗同民主派各大政黨嘅支持,就抹黑人哋話人哋剝奪你參選嘅基本人權,咁係反映你緊張個議席多過緊張政治概念同埋政治倫理。

第三,你近排不斷咁批評民主派唔搞初選就欽點咗李卓人,係唔民主嘅做法。咁你馮檢基過去代表民協參加過咁多屆立法會同區議會選舉,請問你有邊一次係由民協向全體選民搞完初選之後先至決定搵你代表民協架?如果你一次都無,咁唔該你即刻收聲啦。

依家有唔少人話你俾親共派收編咗專登出嚟鎅票,不才暫且將疑點利益歸於馮生你,但如果你睇完呢篇短文都重係唔明重要不斷嘈嘈閉亂咁鬧民主派「欽點」、「唔民主」,咁即使你無收咗親共派錢,你都只係一個政治概念亂曬籠、政治倫理亂曬籠嘅議席愛好者。

講完。慳番啖氣唔再同你打泥漿戰,亦唔好因為你轉移咗視線。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe