眾新聞 Logo
眾新聞 CitizenNews
眾說

古巴行(11)突然間,骷髏小姐被人錫咗一啖.....


 

有日喺小城Matanzas(馬坦薩斯,離首都Havana 90公里),有人竟然突襲,錫咗骷髏小姐一啖......

英明神武的骷髏先生

叩門,骷髏小姐係貪得無厭,幾乎有門都想叩大小通吃,可惜時間永遠唔夠,而骷髏先生呢,寧缺無濫。
 
有日喺Matanzas游蕩,路經一間屋,骷髏先話要去入睇睇,咁奇怪,呢間屋一啲唔起眼,門又冇咩標記,唔通你有先見之明,門後別有洞天?不過,既然中門大開, 我哋就唔客氣啦,一於睇吓門後係咩東東。 

「骷髏先生,呢間只係空屋,好破破爛爛噃。」然後,傳來人聲,一男一女出現。原來呢間前身係廢置小學,佢將會360度大變身,成為Matanzas省嘅公務員再培訓中心,落成後,會收生300幾人,對象係技術部門嘅公務員,女嘅係中心負責人,男嘅係將會教法律嘅中心導師。骷髏先生果然英明神武,我哋仲撞到成個旅程中,少數可用英語100%無障礙交談嘅古巴人。
 
叩門成功,mission completed,骷髏小姐同骷髏先生決定分頭搵食,點知就出事。

突然間,骷髏小姐被人錫咗一啖.....

一件放喺門口,類似表演用嘅「戲服」,好吸睛,骷髏小姐梗係要去八卦吓。

睇完用拉鍊同汽水蓋做嘅「戲服」,正想走人,點知喺門口把關的婆婆甲拉住我唔放,用手勢叫我繼續入去睇,身體語言話我知 :「好戲在後頭」。

哦,原來裏頭仲有話劇海報,牆上掛咗啲相,睇嚟係Matanzas市中心廣場嘅表演。當地嘅文娛活動資料唔多,但總算知多啲啲。睇完問路人,呢度係咩地方,語言不通,估計佢話係省政府嘅有關文化單位?

功德完滿,搵路人婆婆乙(咁啱佢竟然係婆婆甲嘅朋友),同我哋影相,等骷髏小姐記低呢位熱情嘅門房婆婆甲。

之後,婆婆乙叫骷髏小姐幫兩位婆婆影相。

兩位婆婆一邊睇相一邊笑到唔停得,突然間,骷髏小姐被婆婆乙錫咗一啖,喺面珠度。

事出突然,嗰刻骷髏小姐唔知點反應,只記得幾秒後,先指住婆婆乙傻笑。事後諗,實在反應遲鈍,應該回禮,喺佢面珠錫番啖至啱?
 
婆婆厚愛骷髏小姐,但骷髏先生都唔弱。

「喂,過嚟啦!」

Trinidad(特立尼達)嘅殖民建築,係世界文物遺產。

喺Trinidad hea遊,周圍見到好多古巴人喺門口唞涼,同隔籬鄰舍同朋友吹水談天說地,呢啲就係我哋城市人失去嘅鄰里關係,古巴呢啲傳統小社區無處不在。

為咗重溫呢啲美好感覺,骷髏先生老實唔客氣,喺街上空凳仔坐低,一於入鄉隨俗。

坐夠唞夠,又再起動,但只行咗幾步,骷髏先生就被人用西班牙話喊停。
唔通坐人哋凳仔,唔合當地習俗?

擰轉頭一睇,原來坐喺路邊「喊停」嘅兩位男士,用手勢話:「喂,過嚟坐吓啦!」

我哋揀咗自我感覺良好嘅解讀:「佢地當我哋係自己友噃。」於是,骷髏先生高興高興坐低。可惜要趕車,身體語言嘅交流係「十分有限公司」,只交換咗名、喺邊度嚟、有幾多仔女,大家輪流表演幾下Bruce Lee功夫,以及天氣笑呵呵等;交換最多嘅,係大家嘅笑容笑聲。
 
因語言障礙,同古巴路人嘅交流,其實大部份都極有限,真係好後悔唔記得帶西班牙文小字典,但佢哋嘅笑意善意同誠意,超越語言同文化差異,古巴人嘅親切感和熱情,比古巴嘅驕陽更熱。
 
圖片由作者提供並製圖
初稿22.01.2014,2018年11月修訂更新


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe