眾新聞 Logo
眾新聞 CitizenNews
眾說

古巴行(12)被隔離嘅世界?


去古巴兩個禮拜,係以Varadero海灘區做基地,然後喺古巴週圍走。我哋鍾意自由行,但去古巴,竟然參加旅行團,點解?咁要講下挪威嘅旅行團模式。仲有,Varadero令人諗起Jim Carrey(占基利)套戲The Truman Show(《真人Show》),又點解呢?

從簡約到全包- 挪威嘅旅行團

以往香港嘅旅行模式,主要係包食包玩旅行團,一日去好多景點,行程密早出晚歸,一個字:抵!不過,呢三十年好多香港人鍾意自由行,就自己步伐隨心所欲。
 
香港嘅包食包玩旅行團,挪威好少。挪威嘅主流係「自由行旅行團」,淨包機票住宿,三餐閣下自理,零行程,但提供自費觀光行程。同香港嘅自由行唔同,挪威「自由行旅行團」有領隊,定時喺當地酒店恭候,俾團友問嘢同求助,呢種方式有自由行嘅好處,但同時提供「盲公竹」,更重要嘅係,如唔好彩遇到麻煩意外,唔會叫天不應。北歐人愛minimalism(簡約主義),追求less is more,旅行團都係行簡約。
 
不過,挪威嘅「自由行旅行團」,近年多咗All Inclusive(全包)呢個風尚。

All Inclusive仲犀利過香港嘅包食旅行團,三餐外,仲有近24粒鐘無休嘅snack bar免費提供飲食,包括酒類,仲有好多活動:水球比賽、語文班、瑜珈、Bingo,同晚上歌舞表演等,吃喝玩樂全包。呢啲機票+住宿+ All Inclusive嘅旅行團,目標客就係「拜日族」,佢哋總嫌拜日時間太少,All Inclusive啱晒佢哋 ,可以成日留喺酒店。

仲有,All Inclusive免費酒水,對挪威人特別吸引,因挪威酒稅好高,寓禁於徵,挪威人平日唔能夠盡情隊酒。我哋平日少飲酒,感謝All Inclusive,我哋每日都嘆一兩杯雞尾酒,幾乎試勻古巴雞尾酒。不過,古巴「自由行旅行團」最吸引係用包機,直航只11粒鐘,自己買機票要轉機要用20幾至30粒鐘。

咁多著數,係咪好貴?

但係喺古巴All Inclusive酒店餐廳,暴飲暴食嘅,實在唔少。本來,冇All Inclusive嘅話,挪威人放完假可大晒古銅膚色兼fit fit體型,俾人妒忌下,但All Inclusiv果然more is more – 體重會多幾磅。
挪威旅行團由主打簡約,到近年多咗全包,算唔算「墮落」?

講番Varadero海灘區,去到先知,原來係個被隔離嘅世界。

被隔離嘅世界?- Varadero海灘區

點解Varadero海灘區係個被隔離嘅世界?
首先,Varadero海灘區嘅土地規劃,有啲特別。九零年代,政府喺度大興土木起酒店,方圓20公里嘅海灘帶,冇民居冇當地居民生活有關嘅小店,海灘帶自成一角,好似個被隔離嘅世界。即係如住All Inclusive酒店,想喺酒店附近睇下古巴平常百姓家嘅生活,一啲都睇唔到,即使喺Varadero市中心,都冇咩,因為喺Varadero做旅遊業嘅古巴人,住喺市中心外十幾公里嘅社區。

另外,Varadero海灘區酒店嘅交通,好唔方便。去Varadero小城中心,公共交通只有一循環各酒店嘅觀光車,20公里路,差唔多一粒鐘。
 
我哋唔係「日日都要拜」嘅「拜日族」,所以寧願自費酒店去Havana同其他地方,誓要逃離呢個「隔離區」,要感受陽光以外嘅古巴風情。
 
被隔離嘅世界?係咪誇張咗啲?

隔離政策

Varadero嘅土地規劃 ,諗起Jim Carrey(占基利)套戲The Truman Show(《真人Show》)。

Varadero海灘帶只有酒店冇民居,因為海灘帶寸金尺土,可理解,但當地人住嘅社區,遠離市中心十幾公里咁遠,好似同遊客「隔離」,耐人尋味。如淨係喺Varadero,陽光海灘成為唔少遊客嘅主要reality,係政府嘅constructed reality?唔敢講,但古巴的確有過隔離政策。
 
1930-59年,古巴旅遊業蓬勃,係美國人賭黃毒嘅「後花園」,係「拉丁拉斯維加斯」。1959,卡斯特羅革命成功,實行共產主義,全面掃賭黃毒,加埋美國對古巴禁運,禁止美國人去古巴旅遊,曾經係第三大產業嘅旅遊業,進入嚴冬期。1991年,大靠山蘇聯解體,古巴經濟出現空前危機,政府冇法要推廣旅遊賺外匯。
 
但為咗將資本主義對古巴人嘅「污染」,減到最低,政府於是採取隔離政策,例如將渡假區隔離,好多酒店只為外國遊客服務,古巴人唔住得唔入得;甚至古巴人同遊客接觸,都犯法。隨住旅遊成為古巴第一產業,1997年,唔止禁止古巴人同遊客接觸嘅法例終於廢除,仲開放醫療旅遊,去古巴接受治療嘅遊客,每年約2萬(2014),最普遍係眼外科手術、神經系統疾病同柏金遜症等。
 
喺古巴嗰陣,觀光車每次入Varadero海灘帶,都有警崗截查車輛,控制出入人流同車輛,而酒店沙灘,經常有軍人同警察行「孖必」,雖隔離政策已成明日黃花,遊客同古巴嘅接觸,終於唔止陽光海灘,但遊客仍然受「高度保護」。

圖由作者提供並整理資料製圖
初稿26.01.2014,2018年11月修訂更新


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe