眾新聞 Logo
眾新聞 CitizenNews
眾聞

90後港式青春片《吊吊揈》入圍金馬獎 


今晚舉行的台灣金馬獎頒獎禮,呈現中學生狀態的港產片《吊吊揈》入圍金馬獎最佳劇情短片,是唯一一部入圍的香港短片,內容談及學童自殺、操past papers、考試壓力、「happy corner」等。27歲導演李駿碩(Jun)與三位主角,包括:今年在浸大藝術系畢業的余淑培(Bobby)、中大新聞與傳播學院四年級學生龔志業(阿業)、明年應考DSE的張迪文(Jayden),接受眾新聞訪問時,細談「香港式青春」。

《吊吊揈》男女主角(左起):張迪文、龔志業、余淑培、導演李駿碩。莊曉彤攝

女主角「任千瑩」:反叛、邪惡想像

《吊吊揈》女主角、浸大視覺藝術系畢業的余淑培(Bobby),擅長以藝術裝置或行為藝術表達想法,稱按照自己的陰道製作木雕、以乳房模型製作展品《你的胸部真精緻,真中國》。

導演李駿碩說,任千瑩這個角色的特色是反叛:「似係一個好大嘅,每個人心入面都有個好反叛嘅,係個好邪惡嘅想像,但個想像其實係最真實嘅一個化身。」

李駿碩續指:「女主角好難揀嘅,要有個好強嘅特質,同埋um......嗰種霸氣得嚟又有啲性感,好啱Bobby做,我覺得呢個角色佢做到。(望向Bobby)你接呢個角色嘅時候,有無遲疑呀?」

Bobby:「我又無喎。」

李駿碩:即係你完全感覺自己做到?

Bobby:係,完全無(遲疑)。哈~~~

Bobby表示,演任千瑩的時候,帶有自己的期望,也有羨慕。「任千瑩嗰種詮釋嘅方法,我一路都好羨慕,我就係用咁嘅心態去做。」任千瑩是你想成為的人?「想持續可以做到,即係嗰種反叛。我相信每個人一定有啲時候好反叛,但係有無辦法可以持續地反叛,而且又可以聰明呢,係好難嘅。」

余淑培(Bobby)飾演女主角「任千瑩」。

第一男主角「男主角」:好努力,但永遠考第二;第二男主角「任意行」:天才波考第一

男主角名叫「男主角」,是一個好努力,但永遠考第二的學生,由龔志業(阿業)飾演;第二男主角叫「任意行」,是一位天才學生,由張迪文(Jayden)飾演。

李駿碩以「一對」作為單位選角,覺得「兩個夾得來的演員」比起「兩個演戲很好的演員」更重要。

就讀中大四年級的阿業,第一次參與短片幕前演出,以往曾演出舞台劇。「我記得我嗰張casting嘅相,佢哋要我整嗰啲comp card(模特兒照),但因為我嗰時做舞台劇唔使做呢啲嘢。我就影相,我拎起部手機就咔嚓影咗張,我頭都無gel嘅好似。」至於為何參與選角,他指:「初初係純粹想試嘅,最主要都係無嘢做。」

至於正準備考DSE的Jayden記得:「Facebook有個group,會有啲『求演員』嘅post,嗰時我唔係做咗戲好耐,跟住我就諗乜嘢都試下⋯⋯因為要搵十幾歲嘅演員嘅戲好少。本身我都唔係好清楚呢個係乜嘢,就嚟咗。」

李駿碩說:「做得好,佢都係整咗張好奇怪的相嚟。」Jayden尷尬笑道,自己沒有好好的相片,「純粹係有啲裝B相。」Bobby大笑著覆述「裝B相」三字(意指好chok的相)。

Jayden表示,演「任意行」這個角色時,尚未為DSE發力。他讀書成續還好,認為校內天才多數不合群,「即係如果我係一個好普通人,我真係完全唔明白佢諗乜嘢。但係如果當我做緊呢個角色嘅時候,我開始諗,佢做呢樣嘢、咁樣諗都係有佢嘅原因。同埋佢後面講嘅嘢其實好有趣,反而令到我係現實生活裡面,開始想同嗰啲人交流下、傾偈,令到自己進步,我講真的。」

李駿碩細聲地笑說一句:「你答得好官腔。」然後對Jayden說:「你係時候要努力,你知唔知三三四之前,係有三年嘅大學制度⋯⋯真係唔知。我係尾二嗰屆A-level入去中大新傳系。但係呢,真係時間努力,基本上都係最後嗰假期嘅事。」

男主角(左)和任意行(右)。

四人對談「青春」

阿業:我個人覺得「男主角」呢個永遠考第二的角色,對青春係有某一種幻想,或者有一種掙扎係到。青春係咪有一刻好燦爛呢?但可能去到最後,就係我過咗咁多嘢,但係青春的遐想從來無出現過。我覺得有少少係咁樣嘅一種狀態,同埋佢對自己想要啲咩,其實唔清楚。即係不斷去努力,不斷地擺好多時間去讀書、補習,但係佢可能唔知自己想要啲咩。

李駿碩:「男主角」係好典型青春成長裡面嘅一個主角,即係呢個類型嘅主角通常都係咁,即係嗰個狀態。但係因為佢這樣一個人物,配以另外兩個好超現實嘅人,所以先令「吊吊揈」呢件事work。但係如果你話單從佢嘅角色去睇,佢個角色係好典型嘅青春片會想嘅嘢、會發生嘅嘢,好期待青春會點,然後就會發現,咦,突然之間完咗。

Bobby:我覺得青春係一啲,你一sense到佢,就會無嘅嘢。所以我覺得「男主角」呢個角色,可能係從來都無享受過青春,因為佢一路都太過著緊青春。

李駿碩:你解讀得好好。

阿業:我同我個角色幾乎係完全唔一樣。因為我嘅青春就係糜爛啦、夾band啦、同班friends流連在學校每一個角落去玩啦、打機、追女仔、拍拖,所以我係調番轉,我真實嘅故仔係,我去到form5、6真係會讀書。我反而有個好大嘅感覺,有一晚我哋傾呢個青春係咪有一刻好靚嘅,開到乜乜......嗰首歌。

李駿碩:《開到荼蘼》(王菲主唱歌曲)

阿業:開到荼蘼嘅一刻,但係跟住我自己諗諗吓,我覺得好似一個好大嘅衝擊,我都以為自己已經經歷咗一個好燦爛嘅青春,但實際上係咪真係好燦爛,我又唔係好說服到自己。總係覺得,當你意識到青春係點樣嘅時候,我嘅青春已經準備逝去嘅感覺。

四人出席金馬獎入圍酒會。受訪者提供



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe