眾新聞 Logo

眾新聞 CitizenNews
眾說

美食車


今期講車,唔係我最鐘意的Land Rover,係講美食車。唔講由自可,一講就要引用堅哥的助語詞:「你老味!」我唔係老味那些美食車經營者,我係老味呢個離地超人嘅政府。

唔知有冇聽錯,美食車嘅目的係推廣香港旅遊同埋幫青年人創業,同時發揮佢哋嘅創作精神。你老味,唔講其他使費,單單搞架車出牌,都要六十萬起錶。有報導話有經營者足足花咗過百萬搞佢架車出牌。入場費咁高,計劃一出,馬上打破唔少青年㕑神的創業夢,更唔合理嘅就係點解要市民攞錢出嚟幫政府搞推廣旅遊業,有冇搞錯!

再睇美食車點樣推廣旅遊?食物,我冇食過,都好似茶記menu mix and match。香港以為好得的茶餐廳只係地產霸權嘅side product。食物無營養之餘,成本又低,日日食茶記,慳番D錢都唔夠睇醫生。再睇吓主角架美食車。睇咗以為係部五噸半,通街都係,乜嘢創意、乜嘢特色一一欠奉,乜香港出品就係咁嘅料?最難頂就係見到個高官so卡片,係電視食住個包笑住咁講話價錢貼地。咁樣揾呢人帶領香港?朋友,唔好唸住高官好香港好、富豪好香港好,靠自己啦!靠自己行條路出嚟,靠自己自給自足。

商務及經濟發展局局長蘇錦樑日前出席美食車開幕禮,試食「黯然銷魂漢堡」。蘋果日報照片

我認為美食車一定要港人優先,美食車應該為港人服務。台灣嘅夜市係招呼台灣人,將民間嘅智慧及生命力發揮,成為台灣旅遊嘅特色景點,使乜搞架美食車嚟吸引遊客!

美食車一早已經植根香港,只係比政府用地產霸權將佢哋封殺。車仔麵我細細個嘅時候係用手推車賣嘅麵食,重有格仔餅、雞蛋仔、假魚翅、鹵味、牛雜等等,都係用手推車嚟賣。一部手推木頭鐵皮美食車,就係香港嘅icon同精神,除咗獅子山,幫香港一齊掉那星頂住上嘅就係這部手推車。香港嘅平民百姓,一天辛勞,一部手推車美食就可以將我哋wind down 及 comfort下來。自力更生,不耍地產霸權,就係手推車嘅香港精神,就係因為同地產霸權對抗,所以命運只有死路一條。

除著持牌者年紀大退休,雪糕三輪車買少見少。蘋果日報照片

香港早早就有有牌的美食車存在,雪糕車就係有牌的美食車,有設計、有得食、有音樂,重更方便。另外就係經常係學校區及公園出現嘅雪糕零食三輪電單車,都係有牌嘅。好硬淨嘅前律政司龍哥,佢老豆就係三輪車美食車嘅經營者。只要政府大量發牌比三輪車、手推車food truck,低入場費,一定吸引到好多人創業,加上香港多元文化,又多來自大江南北的移民, 各地嘅家鄉小食都貼地價有得食。香港美食之都以外會多一個稱號──街頭小食之都,Street Food Capital!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe