眾新聞 Logo
眾新聞 CitizenNews
眾說

古巴行(13)放過我啦,我淨係想hea咋!



離首都Havana 140公里嘅Varadero(巴拉德羅)海灘,長十幾公里,係加勒比海最正嘅海灘之一,水清沙滑,近岸水淺可玩水,的確名不虛傳,所以淨係享受陽光海灘「拜日」,簡簡單單,已係最高享受,但咁卑微嘅願望,原來都唔易做到。

全包精神大愛無疆

照顧週全嘅All Inclusive package(全包),酒店除三餐外,仲有近24粒鐘無休嘅snack bar免費提供飲食酒類,範圍包埋酒店私家沙灘嘅café bar。於是,我哋邊嘆免費雞尾酒邊「拜日」,成為沙灘生活第一個指定動作。除咗café bar,諗唔到仲有車仔,速遞免費椰青!椰青嚟自酒店嘅椰子樹,椰林風月之外,更物盡其用;古巴係個充滿驚奇嘅國家。

沙灘嘅免費飲品選擇多,遊戲活動亦唔少,都係免費,跳舞班最受歡迎,日日都有。古巴係音樂同舞蹈嘅國度,唔少舞如mambo、cha-cha-cha、rumba同salsa,都源自古巴,任何古巴人,都可以隨時隨地聞歌起舞;有古巴人嘅地方,就有歌舞。
 
骷髏小姐鍾意熱鬧,鍾意手舞足蹈(請注意,係手舞足蹈,唔係跳舞),骷髏先生都鍾意,不過投入指數,同天后級嘅骷髏小姐比,唔同級數,但骷髏先生喺沙灘第二個指定動作,竟然係參加沙灘跳舞班,跌晒眼鏡,可見古巴音樂舞蹈嘅魔力。骷髏先生唔止跳舞,仲好鬼投入參加各種沙灘遊戲,骷髏小姐呢,嫌喇叭啲聲嘈得滯,對沙灘遊戲say no。
 
沙灘「拜日」,免費飲品要咩有咩,估唔到全包精神咁大愛,免費好玩嘅遊戲活動多多,連「拜日族」嘅心理都照顧埋,「拜日族」想離開酒店都幾艱難。但咁大愛係咪好?應該感激流涕抑或嬲嬲?

我淨係想hea咋!

咁鬼多活動,音樂又咁大聲,「拜日」搞成咁,都係All Inclusive Package唔好!其實,我淨係想好好享受挪威冬天好少有嘅陽光,淨係想聽吓啲潮聲,淨係想睇吓嗰啲一波接一波嘅海浪拍喺沙上嘅韻律姿勢.............我淨係想hea咋,點解All Inclusive Package唔肯放過我?

好彩活動都有休息時間,唔係non-stop。沙灘冇咗遊戲活動,可以留意到勾起挪威鄉愁嘅葉上幼沙、受傷嘅小動物,仲有第一次近距離接觸嘅kiteboarding(風箏衝浪),只因為夠hea。

結合滑翔傘同沖浪板嘅Kiteboarding,我哋好有feel,所以不斷研究佢點操作,有咗初步理解之後,骷髏小姐骷髏先生就扮專家扮評論員,從起飛角度同衝力,tip下起飛會唔會成功,好鬼無聊無知但又好鬼爽。
 
最普通不過完全唔起眼嘅嘢,只要夠hea,就可以睇到多啲細節。「到處留心皆學問」,長咗幾多知識,其實唔多重要,過程嗰份專注同快樂,先重要;講遠啲,一啲好單調重複嘅工作,可唔可以搵到專注嘅樂趣呢?

圖片1 : 網絡圖片,其餘圖片由作者提供並製圖
初稿27.01.2014,2018年11月修訂更新


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe