眾新聞 Logo
眾新聞 CitizenNews
眾說

不反對他人持英國護照=隱晦支持英國殖民主義


選舉主任袁嘉諾DQ咗朱凱廸參加村代表選舉嘅資格,原因係佢隱晦支持港獨主義。

不明確反對他人主張港獨主義=隱晦支持港獨主義。筆者睇到呢度,真係拍案叫絕:唔怪得人哋咁高人工我冇,皆因人哋思維邏輯我地永遠都追唔上,佩服佩服! 不過我又另外開始諗啦,一眾親中派固然經常明確反對港獨主義,但我好似冇咩見過佢哋明確反對台獨主義、藏獨主義、疆獨主義、蒙獨主義、日本軍國主義、美國帝國主義、英國殖民主義,會否被人誤以為佢哋隱晦支持?

我建議佢哋應該立即搞返場萬人聲討大會,仲要叫晒國際媒體影住,逐一譴責台獨主義、藏獨主義、疆獨主義、蒙獨主義、日本軍國主義、美國帝國主義、英國殖民主義。而為表示明確反對,佢哋應該係場中間搞返個 bonfire,燒晒英國護照、美國護照、港英頒發的荷蘭水蓋、港督簽名的大學畢業證書等等。

而且,因為依家唔係講緊本人的主張,你唔明確反對他人都係等於隱晦支持嘛,所以佢哋仲要從親戚朋友手上強搶佢哋的英國護照美國護照嚟燒晒佢(btw記得好似周融同梁君彥咁正式申請退出),宣誓自己同屋企人同朋友永遠唔去日本旅行振興佢哋經濟,否則就係隱晦支持英國殖民主義、美國帝國主義、日本軍國主義啦。

最後記得聲討埋ISIS,否則可能被人以為隱晦支持恐怖主義添。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe