眾新聞 Logo
眾新聞 CitizenNews
眾說

唔好咁大聲比美帝知呢個女人有警轟


大家都是為國家,華為太子女孟晚舟(左)和民政局前局長何志平(右)所獲待遇大不同。美聯社

「華為太子女」孟晚舟被楓葉國拘捕,面臨引渡到美帝國,中共反應異常強烈,本港親中派亦跟隨到領事館外示威,招呼級數同淪為「八萬五」已經唔存在的「肥平」何志平截然不同。筆者有三個聯想。

一,中共同親中派平日教人正能量,唔係身有屎又洗乜驚嚴厲執法/立法云云,依家咁大反應,一個可能係佢哋缺乏正能量,二係此女真有問題。肥平罪名係在非洲行賄,講真邊個去非洲做生意唔行賄架。但華為係中國科技巨頭之一,超英趕美計劃重要一環,仲未計中共可能藉華為產品做了手腳,太子女隨時身持大量國家機密。

二,而中共越係大聲,反應同平日越係唔同,大概只會越令美帝相信依個女人有警轟。所以依家華春瑩 or whoever 外交部發言人就好似家有囍事的毛舜筠其中一幕:「唔好咁大聲呀!唔好比美帝知呀!唔好咁大聲呀!唔係會好大鑊架啦啦啦啦啦...」又或者吳君如講普通話:「領導,呢個女人呢,是華為的高層,明明是大陸人就冒充港商參加選美...對對對,得閒飲茶,再見。」

三,太子女同肥平在中共眼中天同地比,加上接連有持香港護照商人被美帝追捕,相信唔少親中港商睇到心寒。港商身份已經冇用,被美帝視為「首先是中國人」,在美中貿易戰開打下,同樣係被追捕同打擊的對象,繼續落去隨時連揸外國護照都冇用。而中共亦都唔當你係親生仔女,你被捉就你死你事。親中港商由想做牆頭草,邊揸外國護照邊攞大陸著數,變成兩面不是人,要走都冇路走。

對此,除咗「我真係恭喜你呀!」之外仲有咩好講?請準備香檳同有請小鳳姐!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe