回頭香港的特首選舉，氛圍上一直訴求嘅係選擇。如果有得揀， 我揀劉德華。不過冇得揀，第一任只有董建華。
睇返轉頭，董建華對我來說已經係歷任特首中最好的，八萬五政策如果唔係遇正亞洲金融風暴，也不一定是錯的。Good plan at wrong time永遠係一個manager最嚴重的失誤，搞衰咗不突止， 公司以後唔敢再buy同一條橋，妙策變成笨賊，永不超生。
記得小弟98年受惠八萬五政策抽中以92萬買入天水圍天頌苑一個實用650呎單位聚老婆生女，守足12年到2010年以100萬賣出以為醒目(你諗下當年天水圍天頌苑起咗15橦有兩橦短樁爛尾住唔到人，咁嘅建築水平嘅樓到價仲唔拿臨走咩)……結果5年後升到365萬，升幅之快真係快到尾燈都睇唔到，點追？只好疊埋心水台灣租屋住，返香港就投靠老豆老母屋企打地舖。
老董俾我最深印象其實係整頓重建旺角，搞到d雞飛遍全九龍，最鼎盛時期連尖咀半島下午茶側門行出嚟都有條女拉你衫袖問「 先生你去唔去？」而從此旺角推車仔小販再無棲身之所， 搵串街邊魚蛋拮吓都難。
煲呔曾就算啦佢只想打好佢份工，不過大時代我們都希望有個leader, 而唔係一個鬼佬面前就打煲呔上天主教堂，轉頭又可以換晒唐裝講「我流嘅係香港人嘅血」的醒目仔， 呢種人有乜嘢作為我哋日日返寫字樓工嘅見唔少啦。 全靠煲呔曾兩手一攤我層樓升咗3倍半(可惜我唔夠醒目自己賺唔到遮)。
之後輪到689，未上場就被鬧爆。唐公子衰在玩物喪志，地下違建知法犯法無非為咗佢自己推行個紅酒免稅計劃之後又入咗唔少紅酒唔夠地方擺，認錯推佢老婆出面更是丟盡香港男人的架， 不過佢中這一鎗，暗示對手果然陰險。
咁689最大政害是什麼？作為一個地方官，搞到警民分化，自從誠哥轉行炒地產之後香港的塑膠花絲帶花製造業早就息微啦，五六十年後的今日香港居然搞出通街黃絲帶藍絲帶，香港人個個自認醒目仔或古惑仔，向來動口不動手，自六七年暴動後從未如此暴力過，政治首要是太平，俾個地方官你做卻搞成咁放在唐宋元明清唔殺頭都發配到烏魯木齊啦 。
身為一個地道香港市民，我能夠記得的其實大概就咁多。憑良心你話佢哋邊個邊個有幾壞，如何搞冧香港，事實上又冇咁誇張，所謂廢柴做唔成乜嘢好事也很難做出大奸大惡的壞事，唔妥佢最主要係因為你冇得揀遮。
咁今期特首就真係精采嘞，四大天王好似好激烈咁，最重要你對佢幾個彷彿都有點認識，好似真係有得揀下喎，唔係無厘頭插個二打六入嚟陪跑喎。
不過，用political marketing角度去睇呢幾件候選貨色(終於扣返條題)， 其實真係有特色，冇起色：
葉劉呢世人都離不開掃把頭和23條呢兩款形象了。 一間航空公司經歷連續空難之後無論改名轉跑道換股東或買重保險搵鋼鐵人護航都無人會埋單，最近台灣復興航空就係因為咁執笠嘞，咁你話佢會有幾大機會呢？
胡大法官就跟當年楊大法官一樣，其實你對法官有幾多認識呢？香港人對於法官的形象向來含糊，由細到大煲電視最熟悉的執法人士多數係警察或律師之類。從《大丈 夫》、《男子漢》、《新紥師兄》到《法外情》、《壹號皇庭》之類之類， 或者你人生總有一次被抽中過去做陪審團，憑良心， 你覺得個法官係點嘅呢？
從第一屆楊鐵樑大法官選特首開始似乎就只係擺一種恣態：請大家記得尊重一下法律界人士啦，無忘本港法治精神啦，不要不尊重這些捍衛香港司法的法官大佬們啦…或者係：你睇下法律界幾咁位高權重，法官話參選阿爺從不say no…而事實上，我未見過佢地提名後有積極參選，有積極貼近民眾 …之類。不過大家也不用太失望，台灣三任總統陳水扁、馬英九、蔡英文都係唸法律的， 奧巴馬更是哈佛法學院畢業的。事實證明擁有專業法律知識的人不一定懂得政治， 不一定懂得如何治理好一個地方，甚至未必懂得立法或守法。
林鄭呢？坊間說法就是689後面的女人，數字2.0， 如果你剛剛發完一個惡夢，眼前恐怖景象歷歷在目， 而其中一個主要畫面突然在你第二個夢中出現，你好自然就會推斷這是惡夢的延續。這是蟬聯效應，大家先入為主，蝙蝠俠的小丑，跑到鋼鐵人的劇情裡，會變成好人的機率有多高？ 如果埋怨這是觀眾的偏見，不如檢討下當初為什麼揀這個劇本這個角色又演得咁成功(或失敗) 吧！
最後薯片哥。唔少香港爬格仔話佢篇演說是完美政治公關喎，一時間薯片哥幾乎已成功當選民意特首咁嘅款， 咁呢招的確可以在每個地方的選舉吹牛過關一次。 香港人的訴求是有選擇，薯片哥希望大家有選擇不要去移民，奮勇參選俾大家揀，揀咗佢就唔洗移民嘞，而且佢仲幾打得添，嘩！流居海外的我一時間真係有D感動想摸下佢撇鬚。
就像奧巴馬change，馬英九「馬上就好」，薯片哥的「有得揀不要去移民」 也是個大口號，但後面沒有任何具體政策follow。 美國空轉了8年，台灣空轉了8年，你估如果薯片哥上場， 香港會唔會大翻身呢？想想當年煲呔曾惡夢的畫面，旁邊成日有條友睇落好似幾打得架。
等佢過咗海，你去邊度搵神仙？
免治叉燒得個咸字，政治行銷永遠就只得個吹字。
如果真係有得揀，我真係會揀劉德華。祝華哥早日康復！ (第14集)
