眾新聞 Logo
眾新聞 CitizenNews
眾說

香港有個黃馬褂叫林鄭月娥


公司來了個新阿頭,由頂頭大老闆親自欽點,為人極其難頂,同僚頂唔順佢啲咀臉,搶功霸道A字膞等等惡行,想劈炮唔撈。我作為一條老屎忽,職場鬥爭都見識過唔少,同同事講:「出面大把世界,可能你出去走一轉搵得仲多,你走我唔會阻你。但你要先明白,呢啲黃馬褂一定做唔耐,你有冇見過黃馬褂可以做到退休?」同事諗咗一陣,又係噃,於是放返封辭職信入櫃桶。

辦公室政治這回事,個個打工仔都懂。做阿頭,點都會明白唔好太過搶下屬功勞,間唔中俾隻牌個細嘅上,平時收下把口,講嘢要經大腦,唔好下下劈頭鬧落去,更加唔好同外人講公司邊個唔掂。這些都是人之常情。偏偏這個世界有一類人don't fxxking care about this,這類人就是黃馬褂了。

老闆尚好,因為深知要睇住盤數,賺錢要靠員工,自然唔會為難佢哋。但黃馬褂唔同了,反正公司有錢賺又唔到佢分,又以為老闆唔會炒佢,久而久之,就好似尋秦記入面項少龍咁講:「絕對權力使人絕對腐化。」

這可以說是一個循環:既然是黃馬褂,自然有大班擦鞋仔埋身,平日捧到佢飄飄然,即使上任時講到自己幾咁謙卑,過得一年半載必然原形畢露。若有同事頂唔順佢辭職唔撈,仲啱,可以俾佢安排啲親信上位;即使嘈到上大老闆度,大老闆明白呢個人係自己assign,唔通唔撐佢?就算明知係親信做錯,表面上都一定會讚佢做得啱。於是,黃馬褂就更加覺得一切唯我獨尊,稱霸一方了。

咁公司結果會點,自然係業績下跌。畢竟一間公司要賺錢,要靠全公司上下共同努力。若個個員工都同你hea做,個個諗住跳糟,做管理嗰班又變晒擦鞋仔,試問又點會有成績?老闆唔係傻的,最後自然隨便找個可以俾黃馬褂下得到台的借口,快快送佢走了。

這可以話係幾乎必然發生的定律,所以同僚應該同黃馬褂鬥長命,睇佢幾時死。不過公司好大可能自此沉淪,底子好的話尚可能翻身,但難,所以走唔走,同僚自行決定。

超級颱風山竹襲港後上班交通大混亂,市民怨聲載道,林鄭沒有反醒之餘,覺得「攞特首出氣」。

相信聰明的讀者都看得出,這情況其實同樣可以套之於香港的現況。記得當年林鄭上場時,曾說過要謙卑,要讓市民活得有希望。但自從上任年半以來,就連這些油腔滑調的門面嘢都少了。大家還記得她曾在記者面前,話用英文覆述一次發言係浪費時間?在山竹一役,她拒絕宣布全港停工令社會大亂後,連一句反省的說話也沒有,只係話:「攞特首出氣冇問題,特首可以畀人鬧。」嗎?

到上月底林鄭得習近平親自開腔支持,這種傲慢的態度更登上頂峰。於是在提高申領長者綜援年齡一事上,即使面對社會全面反對,連一向最橡皮圖章的民建聯都話要檢討,她也懶得再做門面工夫,直接拒絕、直接反擊說:「我一直都是直言的官員!」

為什麼香港會有這種傲慢的特首,還不是因為沒有普選之故?現行特首都是由中央欽點,個個都是黃馬褂(試問邊個特首在任時冇受過中央祝褔?),結果自然是香港難有作為,愈做愈衰了。再看過去香港的三名特首,沒有一個可以做足十年,也總算應驗了沒有黃馬褂能做得長的辦公室睿智。

被曼聯炒魷的前領隊摩連奴。美聯社

題外話,曼聯自從換走領隊摩連奴之後,旋即六連勝,成為爭取下屆歐聯入場券的大熱。再看香港GDP於全國城市的排名,自回歸後由班霸變Big 4,再由Big 4變Big 6,甚至連天津重慶都話要向我地叫板,就好似連愛華頓,甚至屈褔特都話要超越曼聯。現在香港搞成咁,龍床盤都要賣成三百萬(以香港人均收入計,要唔食唔住近十年才買得起),仲衰過當年689。香港想翻身,係唔係都應該換下領隊先?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe