眾新聞 Logo
眾新聞 CitizenNews
眾聞

葉劉形容林鄭管治作風「困擾」 長者綜援「最頭痛」 將向林鄭爭取擱置


行政會議成員、新民黨立法會議員葉劉淑儀,在眾新聞成立兩周年午宴暨研討會上,被問到她對特首林鄭月娥管治作風的看法,她指那是個「困擾」的問題。葉劉先後提到土地選項諮詢、三隧分流及長者綜援的問題,並指長者綜援「最頭痛」,她表明將會向林鄭反映問題,爭取起碼擱置一、兩年。

葉劉淑儀表示,長者綜援一役令建制派承受莫大壓力,對「三隧分流」亦有憂慮,「如果我哋支持咗你(林鄭),效果唔好,你可以同市民講:『佢哋批㗎』。我哋真係有個我認為係好合理嘅擔憂,因為你今次正式問我哋。咁點算好呢?我哋個個黨都諗緊。」

左起:眾新聞主筆楊健興;行會成員、新民黨立法會議員葉劉淑儀;貿易發展局研究總監關家明;香港大學法律學院教授陳文敏。何君健攝

研討會主持、眾新聞主筆楊健興先向葉劉淑儀提問,指林鄭月娥處理長者綜援、三隧分流、土地及房屋等方面,有人認為她「夾硬嚟」,問到葉劉如何看林鄭的管治作風,如此下去會否有更多事端,甚至落得焦頭爛額、「撞板」收場?葉劉答:「多謝你呢個……都困擾我嘅問題。」引起哄堂大笑。

葉劉形容,調高長者綜援申領年齡為「最頭痛」的問題,新政策的負面影響甚於「三隧分流」,「支持佢嘅人一定要負責任,如果今次我哋反對,冇法子爭取到暫緩執行或者點處理,建制派受嘅壓力好大,特別係行政長官講咗話喺預算案度『你哋批㗎喎』。我哋作為建制派,顧名思義,我哋支持制度、我哋信你吖嘛,我哋支持行政長官依法施政,包括程序。我哋都唔想拉布加劇,令預算案準時通過吖嘛,我哋係負有咁嘅重擔嚟投票俾你。咁嘅情形之下,行政長官話:『你哋批㗎喎』,咁我哋咪壓力好大?」

葉劉表示,起碼新民黨並不會接受政府說「冇得改」、「一定要照執行」,「羅致光講嗰啲,我係唔能夠接受。」她在會後補充指,新民黨會繼續向政府爭取起碼要擱置安排一、兩年,觀望新政策的影響。葉劉批評,政府沒有做正式的諮詢,立法會議員曾經提出反對,政府及後卻將新措施放入預算案,做法是「值得商榷」、對議員不公平,她將向林鄭反映問題,「如果唔係真係好對唔住嗰啲最有需要幫助嘅公公婆婆。」她又指,並非提出作出重大改變,只是要求政府重新考慮有關安排,認為其要求合理。

7名身兼行會成員的立法會議員中,繼工聯會黃國健率先要求政府暫緩調高長者綜援申領年齡,葉劉為第二人提出擱置新政策。

今早立法會大會表決「檢討綜合社會保障援助計劃」議案(邵家臻動議,經張超雄、梁志祥、梁耀忠、郭家麒及區諾軒修正),在51票贊成、2票反對、4票棄權下通過,包括葉劉在內的多名建制派議員均投贊成票。

葉劉下午與多位建制派政黨代表與林鄭會面,討論調高長者綜援申領年齡事宜。眾新聞晚上向葉劉查詢,她表示「唔方便講」,未有就她在研究會中的說法作補充。

葉劉淑儀指,削減長者綜援的影響長遠,新民黨不會接受政府「冇得改」的說法。何君健攝

葉劉在研討會上稱,上屆特首梁振英任內,行政立法關係惡劣,很多事都做不了,議會拉布嚴重,而林鄭初上任時向泛民示好,行政立法關係有所改善,「我覺得氣氛係好咗,起碼唔係以前梁特首入嚟(議會)就好多謾罵、好多動作,人身攻擊對林太係冇嘅、少咗好多,亦都當然係有關今屆立法會主席執行議事規則係幾嚴謹,你一叫口號就踢出去。」但她認為,林鄭爭取泛民支持,收穫比不上付出,「起碼資源上,佢俾咗葉建源83億(教育經常性款項),好多界別佢都係放咗水,但係喺票上的收穫係有限。」

在土地諮詢方面,葉劉指林鄭「進行一個史無前例、龐大、甚至我哋有啲建制派朋友形容為『冇方向』嘅諮詢」,惟諮詢尚未結束,林鄭就宣布「明日大嶼」計劃,「其餘選項點做抉擇呢?」「佢而家點樣埋尾呢?我諗佢而家都好頭痛。」

葉劉提到,政府沒有就「三隧分流」做諮詢,「因為(政府)同財團傾掂咗,行政長官解俾我哋聽係up or down vote嘅啫,一係支持、一係反對,你鍾意就做、唔鍾意就唔做啦。但係我哋而家好擔心,因為你正式諮詢我哋做唔做吖嘛。如果我哋支持咗你,效果唔好,你可以同市民講:『佢哋批㗎』。我哋真係有個我認為係好合理嘅擔憂,因為你今次正式問我哋。咁點算好呢?我哋個個黨都諗緊。」台下再次爆發一陣笑聲。

葉劉表示,在未來一年,林鄭要極力改善行政立法,「第一步要做到,係改善同我哋建制派嘅關係,同埋重新建立互信。」


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe